ضجيج ~ اخت صديقتي تقولها الف واحد يتمناك

السلام عليكم ورحمة الله
صديقتي اللي اعتبرها تؤم روحي عرضت علي مشكلتها وعرضت عليها انزلها وسمحت لي
واحتمال لو تفاعلتوا اعطيها معرفي تدخل فيه ..لانها تعبانة حييييييييييييل
..
مشكلة صديقتي تتعلق بخصوص الزواج
هي فتاة مقبولة شكليا وجامعية وحاليا تحضر رسالة ماستر عمرها 26 وهي آخر خواتها يعني عنقودتهم
قبل سسنة ونص تقدم لها شاب جامعي موظف بقطاع خاص راتبة 4000 أصغر منها بسنة والكل يشهد له بالصلاح والصلاة في المسجد

..
هم تقريبا من نفس القبيلة بس هي ما تعرفه أول ماعرفت انه اصغر منها رفضته
وبعد هي كانت تتمنى احد ينافسها في الطموح ووو
لكن اهلها أصروا عليها لان ودهم يفرحون فيها مثل باقي خواتها ووافقوا بدون علمها
هي استخارت وقالت لعله خير
..
ومع مرور الوقت عرفت انه لما كان يزور عمها وهم صغار كان معجب فيها وحاول يتقدم لها كثير بس اهله رافضين بسبب العمر ..,
وبالنهاية استسلموا
..
الزبدة ان صديقتي بدت تدخل على حسابه بتويتر من باب الفضول انها تعرف الشخص اللي بتربط فيه
ولقت انه انسان اغلب وقته مرح وكشتات ..وطلعات شباب
..
في البداية كانت فضول بس مع الوقت بدت تتعلق فيه وتتابعه بشغف
طبعا هو مايدري عنها
بس توصلها اخبار انه وده يعقد عليها واهلها يماطلون احيانا بسبب واحيانا بدون سبب
البنت نفسيتها تعبت لهم سنة ونص مخطوبين ولا صار اي شيء جدي
..
وحددت بينها وبين نفسها مدة معينة لو ما صار شيء بتفركش الموضوع لانها تعبت وعمرها ما يسمح تجلس معلقة بدون سبب واضح ..لكن ترجع وتقول دام انه مناسب ومابه عيوب ويصلي تستنى عليه هو واهلها ..
..
هالاسبوع جتهم اختها الكبيرة زيارة
وقالت لها بدون مقدمات وش رايك بفلان |(اللي هو خطيبها ) وهل انتي مقنعة ترتبطين فيه؟؟
صديقتي تقول ان قلبها انقبض وحست ان الرجال مل وخلاص مافي نصيب
قالت لاختها : ليه في شيء
قالت لا بس مستجعل ووظيفته مب زينة وكيف بتعيشون
قالت لها :المهم انه مو سيء
قالت اختها :فكري عندك وقت وترى الف واحد يتمناك
..
صديقتي انقهرت كيف تقول عنه مستعجل واهلها يماطلون سنة ونص واذا مايبغونه ليه يخلونها توافق عليه
احيانا تقول لنفسها تستاهلين رجل احسن منه بس يوم تتذكر كيف يحبها وكيف ما يترك مناسبة الا ويرسلها هدية تحزن عليه وتتراجع ..
..
يعني مشكلة صديقتي انها مستغربة من اهلها ليه يماطلون دام يبغون يفرحون فيها
وخايفة تكون تسرعت ووافقت ترتبط بانسان مب كفئ لها
..
سامحوني كتبت القصة زي ما فهمت منها والله امس اكلمها تقولي من كثر الهم مو قادرة تتنفس واقفة عند الشباك متكتفة ..

الله يفرج همها شوروا عليها انا قلت لها تلزم الاستغفار لان ماعندي خبرة بهالامور
..........