طبيعي اللي جالس يصير

بنات انا مشكلتي ب اختصار
انولدت بمجتمع يقدس الجمال
نكون صريحين شوي
هنا بالسعوديه اول شي يخقون عليه سوا
رجال حريم بنات الجمال
يعني البنت الجميلة هذي واو غير
هذي لازم تعامل معامله خاصه
هذي لازم تتزوج امير او صاحب منصب
حتى لو نفسيتها وأخلاقها شينه كل هذا بس
عشان الله خلقها جميله !!
نلاحظ الحين الامهات اول ماتجي تخطب لولدها
اول شي تدوره الشكل بعد الشكل تبداء
تسال عن أخلاقها
لكن انا انخلقت بمحافظه
مو يعشقون الجمال لا يقدسونه
مهما كانت أخلاقك سمعتك انتي جميله
خلاص انتي ضامنه حب الناس لك
ضامنه انه يجيك شخص صاحب منصب
انا بكل امانه
اقل من عاديه بكثير يعني اتكلم
شوي بمعنى عامي معكم
انا انولدت شينه !!
يعني ملامحي جسمي لوني كل شي فيني مو مقبول
بتقولون اهتمي يكمن اكثر وحده انا بالحياة
اهتم لكن مايوضح فيني عشان شكلي
لاني انا نسخة ابوي
لي أختين وحده بعدي جت فرق بيني وبينها ٨ سنوات
عمرها ٢٢ ماشاء الله ماشاء الله شوي فيها
كلمه جميله اصلا معروفه اختي هذي
بالعائلة كلهم من اقارب ابوي وأقارب امي مصنفيها
من الاوئل بالجمال بالعائلة 😂
بعدها اختي اخر العنقود عمرها قريب ٢٠
حلوه شقراء وبيضاء لكن مو زي جمال اختي الوسطيه
انا وأختي الوسطيه مع ان بيننا فرق ٨ سنوات انا اكبر منها
لكن كاننا توام يعني طلعتنا مع بنات اقاربي
مع صديقاتي مع بعض
بالسفر مع اهلي دايم انا وأختي لحال بكل مكان
يعني نفس جو بعض
لكن تعببببببببببببت يابنات انا احب اختي
وانبسط لما احد يمدح جمالها لكن اكره للناس
الوقحه اللي يحطوني بمحل مقارنه مع اختي
يهمشون وجودي ويستغربون اننا خوات
وفيه ناس للأسف من اقاربي كارهيننا
فيبون يزرعون الفتنة بيني وبين اختي يجلسون
يمدحون ويصورن اختي بالسناب ويكتبون القصايد بجمالها
وقدامي يحتقروني يعني اسمعي ماتجين ربع اختك
لدرجه كم مره يقولون اختك بتتزوج قبل
ونحس بنتاخذ احد فوق عشانها جميله عكسك
قلت لهم اختي تستأهل بفرح لها
ومره حصلت مشكله بيني وبين خالتي
قامت تدقني باختي
قدامي تنادي اختي تعالي ياحلوه تعالي يازينه
ياشبيهتنا ياللي طالعه على خالاتك اقسم باالله بكيت من قلبي من حركاتهم
انا اطنش اطنش وأدري كلامهم صدق
وأدري ان اختي بتتزوج قبلي لان ماشاء الله
اصلا دايم يكلمون امي يخطبونها
وأدري انها بناخذ احد فوق
هذي شي معروف اي جميله لازم حظها حلو بالزواج
لكن شدخلني انا شذنبي انا وللي مثلي
كاننا حنا خالقين انفسنا
اللي جد خلاني اكتب كذا
اليوم طلعنا مع صديقات بنت عمي
وكانو اول مره يشوفوننا ماحكي لكم عن كمية الصدمه
لما عرفو اننا خوات
لدرجه وحده قالت كيف كيف انتم خوات
مره ماتتشابهون جيت مسويه برقع
قلت حنا كل بيتنا كل وحده شكل
قالت اختك فرق حلوه !!
سكت
جينا نصور سناب كل وحده تصور نفسها وكذا
وللله يابنات ان بنات اعماوهم٢٨وفوق
يجون لاختي
عادي نصور معك بسنابنا
نبي نتميلح فيك قدام اقاربنا وصديقاتنا !!
انا كنت جالسه بالوسط ويشوفوني اصور
يعني لو مجامله صورت معي مقطع ومع اختي
هذا اللي يصير لو انا بمكانها لكن هي وش سوت
قالت ممكن تبعدين بنصور!!
أبعدت
واسكت مادريت الا تجي صديقة بنت عمي
الثانيه لما شافت سناب صديقتها مصوره اختي
وكانت اختي جنبي جلست تستاذن عادي اصورك
قالو اختي ايه عادي
كنت جنب اختي قسم بالله يابنات انها مصوره وكانت
اختي جنبي بالضبط صورتني وحطت على وجهي فيس !!
يعني غطت وجهي
وجت بنت عمي كلمتها جلست تصور اختي معها
وانا كنت بالأخير يعني اوضح لما جت توصلني
قصت المقطع
يعني للدرجه هذي شكلي يفشل بالسناب ؟؟
عجزت أفسر حركاتهم اليوم
يعني اعرف ان فيه ناس عبيد
الجمال بس معقول فيه ناس كذا
والله مامدح نفسي لكن انا نفسيتي احسن من اختي بكثير
وطول الطلعه ماغير اقهوي واسوي فعاليات ع النار
ولا وحده قالت شكرا
لكن اختي باقي شوي ويبوسون رجولها
عجزت أفسر حركاتهم ندمت انيً طلعت