عبي فراغك العاطفي/قديم

مثل أي مواطنه سعوديه بريئه
تعاني سلمى من فراغ عاطفي مفزع
حيث ان محد من الاهل والاقارب ملقيها وجه
ولا يقولون لنا كلام حلوو زي بنات اللبنانين ولا بنات المصرين
الا تزريب و ترويع في الطالعه والنازله

وبما ان قلوبنا فضخها الفراغ العاطفي واحلامنا حطمتها العنوسه
قررت انا
اني اجد الحل
واستبدل الفراغ العاطفي عندي بطريقه مناسبه اقدر اسميها المنقذه
طبعا في فيما يرضي رب العالمين
وبما ان المغازل مهوب نافك يا سلمى

قررت
املى حياتي و اجيب شي يملى علي البيت
واعبي الفراغ العاطفي
اعبيه في غير معصيه
كيف تعبينه يا سلمى كييييييييف تعبينه يا سلمى
اعبيه 91 ولا 95 <<< تنكت هي ووجها

المهم
قررت اجيب مجموعه من الحيوانات الاليفه
منها اعبي الفراغ
والقى احد اهتم فيه
ااكله اشربه
العب معه
يوسع صدري
انومه في حضني <<< يا حياتي رحمتني

وبعد مفاوضات ومناقشات وملاقط وشيل وحط مع ام نواف << امك يا سلمى
تم اصدار البيان التالي

ابنتي العزيزه سلمى
تحيه طيبه وبعد
حيث انك فتاة مدقومه وممزعن قلبك الفراغ العاطفي
وحيث اني اميمتك واخاف عليك من الانحراف ومن غياهب الخطيئه
قررت اني اسمح لك بتربية جميع الحيوانات اللي تبين ما عدا الحيونات المذكوره ادناه

كلاب لا
قطاوه لا
حيايا لا
دجاج لا
بط لا
حمام لا
ببغاء لا
كتاكيت لا
فيران لا
سحالي لا
عصافير لا

طيب وش اشتري اجل ؟؟
ما علينا
اصبر واحتسب واكيد ربنا يسهلها
وانا معبيتك معبيتك يا الفراغ العاطفي
بس اعبيك 91 ولا 95 ؟ <<<< حديث الروح ينكت

وانا اللي القط القائمه
حقت امي
واطلع اقرب محل حيوانات
اسلم على الهندي واعطيه الورقه واقوله

سلمى: شوف صديق معلوم هذا حيونات مكتوب في ورقه
الصديق : ايوه مدام
سملى : كلوو هذا انا ما يبي
الصديق : @@
سلمى : وده يقول لي لي جايه .... وش عندك غيرهم يا محمد لا تقعد تطير عيونك

وبعد ان قلب الورقه فوق وتحت وقراها بجميع الاتجاهات وبعد ما شاور كل الهنود اللي في المحل رد علي وقال لي
الصديق : فيه سمكه فيه سحلفه فيه ارنوب فيه ضوب
سملى : كلو جيب يا محمد المهم اعبي
الصديق: 91 ولا 95
سلمى : تنكت بعد انت ووجهك @@

المهم وارجع الى بيتي الحبيب اللي بملاه بالحب بعد ما جبت معي حيواناتي االعزيزه
وتبدا المرحله الاولى
لازم نسمي الحيوانات
وش تسمينهم يا سلمى
وش تسمينهم يا سلمى
الارنب اسميه اسميه اسميه
كيكي !! بارني ؟؟ سفروت ...
سفروت
ارنبي اسمه سفروت

طيب الضب وش اسميه؟؟
اسميه مناحي ؟؟ ولا اسميه عشق !! لا لا لا اسميه مازن مازن
الضب سميته مازن

والسمكه ما احترت فيها سميتهاعلى صديقة امي
ام ناصر
وش رايكم بس في الاسم ؟؟

اما السلحفاة وبما اني بنت واصله وحبيبه
قررت اسميهم على الميته
شاديه >> سلحفاة مربيتها بعد يومني صغيره ووافتها المنيه

ومرت ايام وايام وايام
وانا وحيواناتي عايشين في سبات ونبات وطل اخلف صبيان وبنات
وفجاءه

ويشاء السميع العليم ويموت سفروت
عطس عطس عطس عطس ومات
ما اعتقد اني سبب وفاته لكن سبب الوفاة واحد من اثنين
اما لاني اكلته بقدونس
او لاني حطيته في الثلاجه علشان يختار الاكل المناسب له

انا حطيته في الثلاجه وقلت اخليه يختار
وعلشان ما اضغط عليه صكيت عليه الثلاجه علشان يتخذ القرار بنفسه
بس الظاهر اني ابطيت عليه
وعموما
يوم فتحت الثلاجه لقيته يطالع البقدونس
حسيت انه مشتهيه
واكلته البقدونس وكان اخر وجبه اكلها في حياته
عاد انا ما قدرت اكتشف سبب الوفاة
الله يرحمك يا سفروت
وحزت عليه جدا وحسيت بمرارة فراقه
ولكني قررت ان اتبرع باعضائه لصالح البحث العلمي <<< كفوو
وانا اللي انطله على خواتي الصغار نوف وساره يلعبون فيه تشريح
منها يستفيدون علميا ومنها انا افتك من الجثه
وانا لله وانا اليه راجعون

وفي هذه الاثناء داهمتني امي وفي عينها نظره حسيت انها شمتانه
وقالت لي
ام نواف : عظم الله اجرك يا بنيتي
سملى : من مات من مات من مات من مات من مات من مااااااات ؟؟؟؟؟؟
ام نواف : البقى براسك.. سلحفاتك.. سبحان وهو يطلع السياره من القراش وطاها وانفقشت
سلمى : مع اني والله اشك ان سبحان " سائق العائله " ماكل سلحفاتي ويصرف
وانا لله وانا اليه راجعون

وما يمر يوم الا وانا اشوف ام ناصر طافحه
عسى ماشر يا ناصر
ام ناصر ام ناصر << تناديها
ماش سميكتي مهيب ترد
الله العالم انها تفاوق ... يعني بتطلع في الروح على قولة المصارين
سبب الوفاة
مويه في الرئه << تنكتين انتي وراسك
اجل فيه سمكه تموت غرقانه
اندري عن حظي النحس

فكرت اني اقليها ... بعدين قلت لا احطها في المايكرويف يمكن تتحمر
لا لا لا خلني اعطيها شغالتنا تاكلها تحب هالخرابيط
واخر قرار اتخذته
هو اني اتبرع باعضائها هي بعد
لكن هالمره بتبرع بالاعضاء للقطاوه
مع تمنياتي لهم بافطار شهي
وانا لله وانا اليه راجعون

طيب ومازن
مازن حبيبي طبعا اكيد فاقدينه
بيني وبينكم مازن ينفقد
لانه يستهبل
هههههههههههههههههههههه
يضحك كل ما مسكته سوا فيها انا ميت
يسوي لي فيها الضب المتوفي
ماجبتك تمثل يبو الشباب انا جايبتك تونسني
وبصراحه طلع منسم
واستفزني
انا ابي واحد خفيف دم مابيك انت يا السامج
اقلبه على بطنه ادغدغه ما يضحك
فقررت اني اصير حازمه معه شوي
وانا اللي العب بالنعله في ظهره علشان يعرف يمزح مزح بايخ
وطبعا انتقل الى رحمة الله هو بعد
بس مدري هو من النعله ولا من شي ثاني

اصلن هذا بالذات لو ما مات كنت انا اللي بشنقه شنق
لاني اكتشفت ان تربية الحيوانات شي مهين للانسانيه
و ضد الادميه
وغلطة عمري

ولو اني صابرتن على صكات بقعاء مع اهلي
ومتحملة فراغي العاطفي الين يجي ابن الحلال اللي يشيل
ابرك لي من هالخساير اللي ما جابت همها
وهالحيونات اللي فطست في اسبوع
لا انا اللي عبيت 91 ولا 95
قصدي لا انا اللي عبيت فراغي
ولا اني اللي حشمت عمري
ولا انا اللي حفظت فلوسي
انا لله وانا اليه راجعووووووووووووووووووون

ملاحظه : 91 – 95 اسم نوعين بنزين في السعوديه