عديلتي وزوجة ريلي الثانيه هي ...

السلام عليكم ورحمة الله وبركاته

ما قررت أكتب لكم خواتي الا لما شفت انه الموضوع زاد عن حده .. ولا أطلب منكن الا دعوه صادقه بظهر الغيب انه الله يهدي زوجي :(

قصتي أو مشكلتي يمكن تمر فيها الكثير من الأخوات بس أنا يمكن بزياده
لأنه عديلتي أو ضرتي هي صديق زوجي اللي والله وربي من عرفه انه ما يمر يومين إلا تستوي مشاكل بيني وبينه لدرجة انه في آخر مره قالي اياها حرفيا ( أنا لو أبا أبيعج ببيعج في نص ساعه وما بفتكر فيج ) !!! تخيلوا قوة هالجملة وكيف كان شعوري لحظتها :( وهذا غيض من فيض من الجمل اللي لما تسمعها الوحده تتمنى لو تمسكه تشنقه بايدها وتفتك منه مع انه ما مر على زواجي غير 4 سنوات والحمدلله عندي ولدين ومب ناقصني جمال او شي ونا مب مقصره في حقه في شي بس ما ادري ليش انقلب علي فجأة .. صدقوني ما اظلمه بس هالريال ما يحبني ما ادري كيف انا عايشه وياه أحس اني يوم ورا يوم أكرهه ويزيد حقدي عليه وعلى ربيعه والله ادعي عليه مرات من كل قلبي انه الله ياخذه وأفتك منه بعد ما يسمعني اهانات كل يوم كأني انا خدامته مب زوجته :( بس ارد وأستغفر ربي وأفكر فعيالي بس .. أنا توني والده كملت شهر ونا للحين ما طلعت من الأربعين تخيلوا نفسيتي يعني كيف منحطه ما اقدر اصلي واحس اني وحيده و ما اقابل غير جدران حجرتي واصيح كل يوم وهو خبر خير

الاساس في مشكلتي هذي هو ربيع ريلي هذا والقهر انه عزابي يعني مب متزوج وما يفكر في أحد همه بس يخرب على غيره .. شفتوا في واحد يدق على واحد متزوج الساعه 3 أو 4 الفجر يبا يسولف !! مب مره او مرتين حصلت بس دايما ويدق على ريلي لما يشوفنا طلعنا مع بعض نتمشى ويسأل عن كل صغيره وكبيره وتخيلوا والله ما تصير ساعه او اقل واحنا طالعين يرجعني ريلي البيت ويقولي انا عندي شغل مع انه كان اتفاق بينا في البدايه انه هاليوم حقي ويخلي كل شي عشان نقعد ويا بعض شوي :( طلعتي للسوق صارت عقب حجز مسبق قبله باسبوع ولما اطلبه شي يقولي انتي كله طلبات طلبات وطلباتج ما تخلص .. والله اني انا ما ابا اقصر في حقه بس هو يجبرني أحس في حواجز وايد انبنت بينا كل شي صار بحدود .. تخيلوا اني كنت ناويه اشتري شيء واسوبه مفاجئه بس اختي قالتلي شاوريه احسن فييت عنده وقلت له يا بو ... ابا اشاورك في شي .. رد علي بعد شو من الطلبات اليوم خلصيني خلاص انا تعودت على طلباتج ما يمر يوم الا طلبتي مني شي .. والله انه حطمني وزعلت لانه هالجمله كل ما ابا افتح وياه موضوع او اكلمه في شي قالها لي .. يليت اني اطلب منه شي لي انا كله لعياله الصغار :( ..
تلفونه مليان رسايل حب من ربيعه هذا اللي من عرفه ونا حياتي سواد في سواد .. اذا ما دق على ريلي نصايف الليل بيطرش مسجات ( انت ما تتخيل انت شو بالنسبه لي أنا ما اصبر عنك وأحـــبــــك ) :( ما اتخيل انه هذا مسج يطرشه ريال لريال ونص الليل بعد بس كله عشان يخرب اللي بيني وبينه ولما اصارح ريلي يقولي انتي تغارين منه .. انا ما اغار صدقوني بس انقهر انه في اليوم بيدق لريلي اول ما يقوم من النوم وعند الغدا والعصر الين نص الليل وهو قاعد وياه وهو ما يشبع بعده يرد يدق على ريلي لما يرجع البيت ويخبره متى بيرقد وما ادري كيف يعني اشيا انا لما اسويها لريلي ما يعطيها اهميه اما هو لما يسويها تعني له شي ثاني

بعد في موقف ما بنساه كان يصادف يوم ميلاد ريلي اول يوم من عيد الفطر ونا كنت مسوتله هديه ومفاجئه للعيد وريلي بطبعه ينسى كل شي ما يعرف تاريخ ميلاده ولما خبرته انهم اعلنوا انه العيد يصادف كذا وانه هذا يصادف يوم ميلاده فرح وقال انتي ليش ما تخبريني واول ما سواه راح دق على ربيعه هذا وقاله انا يوم ميلادي باجر والعيد باجر عاد ابا الهديه .. تخيلوا انه زعل ربيعه منه قال ليش تقولي انا ادري اصلا ونا كنت مسوي لك مفاجئه وهديه تخيلوا !!!!!! ريال يذكر يوم ميلاد ريال وهو نفسه ريلي ما يذكره ..

لا تقولون لي هذي غيره لانه مافي ريال يسوي جذي :(

توه طلع ريلي من الحجره زعلان ويقولي انا اكره اقعد وياكم ما احب اقعد في البيت ونا بتأخر وبرجع نص الليل عنادا فيج بس والسبب ربيعه هذا لانه كان واعدني انه يوديني بيت اهلي بس عشان ربيعه لغى موعدي وخلاه هو فوق كل شي :(

الحمدلله على كل حال انا مليت حتى من الصياح لانه ما يستاهل اصيح عليه من الاساس

بس أطلب منكم اخواتي انه تدعولي وتدعوله انه الله يهديه :(