علموني كيف اتصرف تعبت من شخصيتي قدام خوات زوجي

السلام عليكم حبيباتي عندي مشكله ان شاءالله انها بسيطه لكن يبغالها وحده شخصيتها قويه..
انا متزوجه من سنتين وزوجي احبه ويحبني وحياتنا ماشيه طبيعيه ولله الحمد..
المشكله زوجي عنده اخت وحده فقط لسى ماتزوجت واخت ثانيه بالرضاع تصير اصلا بنت عمته،
اخته اللي بالرضاع كبيره اكبر من زوجي بسنه انسانه ماتستحي تلبس كل شي قدام زوجي قصير الفخوذ طالعه الصدر باين وعلاقي واحيانا جينزات وعليها بلايز مره قصيره يعني تشوفين
تفاصيل جسمها الله يستر عليها بس ويهديها لأن الاخ بالرضاع مو مثل الاخ الشقيق!
لحد هنا انا ماني مهتمه ومريحه راسي تسلم عليه تبوس وتضمه لازم كل مره وتناديه بأسم دلع وماقلنا شي مثل ماقلت لكم انا ماهمني وساكته ومكبره مخي و واثقه من نفسي ولله الحمد ومن حبه لي،،
اليوم انصدمت كنا مجتمعين وهي موجوده وطبعا فيه ام زوجي وعمات زوجي وجدته وحريم كبار
قامت عمتي تقول قصتها لما رضعت اخت زوجي بالرضاع ان امها كانت متنومه بالمستشفى وجلست هذي بنت عمته معها وتبكي طول الليل الين اضطرت عمتي ترضعها علشان تسكت..
شوي الا وتتكلم اخته بالرضاع تقول خربتو علي كان المفروض يخطبني انا وانا اتزوجه وبعدين لفت راسها علي ووجهت لي الكلام وقالت لي حتى انتي خربتي علي!!!!!!!!!
طبعا كأن من كب علي مويه بارده انصعقت ماعرفت ارد بحرف جلست اطالع بأم زوجي وام زوجي انصدمت اكثر مني
اخت زوجي الشقيقه جلست تضحك وعجبها الكلام وقامت تقول كان انتي الحين خطيبة اخوي!!!!!
ياناس ياعالم انا وين رحت وين مشاعري وش هالعالم المش متربين من الصدمه ساكته ومبتسمه احترموني على الاقل انا زوجته قدامكم قدام الحريم احس جتني حراره كيف ماتستحي تقول كذا وهو اخوووووها بالرضاع!
اليوم تأكدت ان نظرتها لزوجي مو نظرة اخت لأخوها!!

والشي الثاني خوات زوجي هذول نفسهم الثنتين اذا اجتمعت معهم لازم طول اليوم يمزحون معي المزح الثقيل ويستفزوني لدرجة احيانا يطالعون فيني الثنتين ويضحكون ويتسرسرون بكلام بينهم وانا ماعرف كيف اتصرف احس شخصيتي ضعيفه قدامهم مدري وش اسوي هذا غير لازم يستلموني بالتعليقات السلبيه والطنازه طووووول الجلسه وهم كذا من النوع اللي دمهم ثقيل يمصخونها وانا طبعا كالعاده احتر واعرق واسكت ساكته وابتسم واحيان اسوي نفسي ما اسمعهم الين يتركوني بحالي...
ام زوجي انسانه رائعه احبها مثل امي وهي تموت فيني تقدمني حتى على بنتها ويمكن هذا الشي الي يخليني اسكت عن بنتها احتررراما لها.
المهم الزبده ابي اتعلم كيف ارد كيف اتصرف ماصرت اتحمل تعليقاتهم على شكلي او لبسي او مكياجي من الوقاحه يجلسون يتطنزون ويتريقون براحتهم ومو حاطين لنفسهم حد وصلت الوقاحه يفتحون شنطتني يفتشونها حتى محفظتي وفلوسي يفتحونها وقحات مدلعات مايقدرون اني محترمه نفسي وساكته عنهم بنات تكفون كيف اتصرررررررف قاهريني صرت اكره مقابلتهم وما ارجع الا وانا كارهه نفسي ومعصبه وضغطي مرتفع!!
ابغى حللللللل تكفوووووون وآسفه ع الاطاله