عمري مافضفضت بس دحين قررت أتكلم...يارب عوضني خير

السلام عليكم ورحمة الله وبركاته
بنات انا ماقررت اكتب مشكلتي في المنتدى إلا بعد ماخلااااص قربت أنفجر. الله يسعدكم أقروا كلامي والله ماليا بعد الله غيركم.الله يجزاكم خير.
ليا 4 سنوات أعااااني من هذا الزوج البارد جدا. اقصد بالبارد يعني لايهش ولا ينش وشخصية ضعيفة وباردة ولايسوي اي شي بالحياة.
زوجي مشكلته مو زي باقي الرجال عقل ورزانة.. زوجي شخص يهتم بتوافه الأمور...لبس وشكليات وايش آخر جوال نزل..وبالبيت اربع وعشرين ساعة جالس ع البلاك بيري او اللابتوب.
نفسي في يوم يجي يناقشني بموضوع مهم..نفسي يجي يوم يقول ايش تخطيطه لمستقبلنا...نفسي أحس ان عنده اهتمامات زي باقي الأزواج اللي يسعون ويتعبون لتامين حياة افضل لعائلاتهم..أصلا ماعنده هرجة ولاحوار..اجلس بالساعات عنده بالصالة أهش ذبان...لان الأخ مقابل أجهزته..وفجأة يضحك وفجأة يكلم نفسه..هذا كله تفاعلا مع جواله واللي يقراه ياليت معايا.
حتى كلامه مع الرجال يفشل...ومايعرف في الأمور الاجتماعية شي...دايما انحرج من تصرفاته او ردات فعله...مثلا مرة قابل شخص معرفه من بعيد وعلاقة رسمية جدا معاهم..قال لزوجي كمجاملة الله يحييك تعشى عندي...زوجي قال طيب! وراح وعلى العشاء مافيه غيره هوا والرجال اللي عزمه.
أحس الرجال انفجع من ردة فعل زوجي ماتوقع بيوافق ويقول طيب :-
ادري شطحت بعيد...بس والله أني ماعمري فضفضت فاستحملوني.
 وظيفته حالتها حاله...والطموح عنده صفرر..سافرت بره قلت اذا هوا مو متحرك انا بتحرك وأنقذ عائلتنا ادرس وارجع اتوظف..وهوا جاا معايا ع أساس يدرس كمان...لكن مكانك سر...ماغير متكي في البيت وع التلفزيون..وبرامجه المفضلة قوت تالنت والايدول...قبل شوي خاصم ولدي عشان طفى له التلفزيون.
والله العظيم بدون مبالغه صرت أحس انه مو زوجي..صرت أحسه ولدي..حتى الصلاة لازم اقول له قوم صلي.
فيه كسسسسل مو طبيعي ...اغراض البيت لازم أزن أسبوع عشان يجيبها...ماعنده إحساس ...الزبالة تكرمون أناحل عشان يتحرك يطلعها.
ماعنده خبرة في الحياة...تعطل علينا كفر السيارة جلس يتلفت لمن جاء رجال سواه له.. اقول له طلع الزكاة..مايعرف...قبل شوي أقول له انت بتضحي؟ يقول ان شاء الله وهوا جالس يحلق بالحمام! بالله هذا ايش أسوي فيه. 
والله يابنات انا تعببببت...كبرني معاه سنين من الهم...صرت أنا شايلة مسؤولية البيت..وصايرة جدية وراح دلع زمان...لأني انا اللي أخطط وأدير البيت ..حتى الميزانية أزبطها...قرفني في حياتي.
كفاية إني أم وأدرس ومتشحططة عشان مستقبل بيتنا والضغط جاني.
أوقات أحس يعاملني كأني أمه...اقول له شرايك نطلع المول...يقول أوكي...شرايك نسوي كذا ...يقول أوكي ...مافي مشاركة او رأي..ياخذ كلامي على انه أوامر. إنسان سلبي مو قادرة اتحمله.
ماعنده ذرة مسؤولية...مايبغى يفكر...ما أثق فيه او أتكل عليه يعمل لي شي..لانه تفكيره محدود وسطحي حتى كلمة سطحي قليله.
يابنات قولوا لي هذا ايش أعمل معاه..قسما بالله انا الام والأب في البيت...تعبببت 
للعلم هوا مو صغير...في بداية الثلاثين...لكنه مرااااهق وعنده قاعدة عيش ليومك..ولاتفكر في بكرة او تخطط.مدري لفين بيوصلنا معااه.
ونسيت أقول لكم...أهله وخصوصا أبوه بدل مايوصوه ع بيته..يوصوني أنا..يوصوني ع تربية احفادهم..ع الدراسة..و تجميع الفلوس.
وولدهم فين..مع أصحابه في الكافيه.
لا ويحرص عليا إني أشجع ولدهم ع تكميل الدراسة والبحث عن وظيفه افضل
يبغوني أربيييه من جديد.
قولوا لي فيه وحدة زوجها كذا؟ انصحوني
او قولوا لي ايش أسوي مع هذا الإنسان .