M!ss cOOkies @mss_cookies
عضوة نشيطة
عودا ً على بــــــــــــــدء ، الكيراتين( استماتتی? لإحياء شعری? ) ©
بسم الله الرحمن الرحيم
أتعثر دوما عند البدايات
بدءا ً أستجدي مراعاتكم لسيئ أسلوبي
رغم عشقي للفصحى الا ان للعامية لذة ..
الزمن : قبل رمضان بأسبوع
المكان : الرياض
الوجهة : الأخت بشرى ( ام عبدالعزيز )
قريت - كما غالب العضوات - مواضيع الكراتين ( بين الترغيب والترهيب )
ورسخ في بالي تجربة الاخت / محترفة
والسيدة ملعقة وسارة222 .
قررت بالصيف اسافر جدة وحجزت رغم صعوبة الحجوزات والوقت الضيق
سمعت عن مشغل معروف بأسعاره الغالية
كلمتهم للأمانه كلامهم ذوق ، وسألت عن السعر قالت : اسعارهم تبدأ من 1500 ريال ، قالت الوالده : مو مهم الفلوس المهم النتيجة ( الله يغنيكي يمه )
ولازم تشوف شعري عشان تسعر مضبوط ، وحجزت موعد
توكلت على الله واستخرت ، وسبحان الله تأجل السفر مرتين ( لظرف شبكة عمي عقبال الصبايا )
تمنيت كثير اسافر الشرقية للأخت / أحب أمي ، وراسلتها اذا تعرف احد بالرياض
وما قصرت ارسلت الرقم
ووعدتني الوالدة - الله يرزقنا برها - تاخذني الرياض.
المقدمات ما فادتكم بتحديد نوعية شعري ؟ .. صحيح
شعري متوسط الحال ( لكم أن تتخيلوا مقدار سوء هذا التوسط )
أجعد ( حكما ) ، قوي وتحمل الكثير ( صبغات - وفرد - واستشوار بكثرة )
كان كثيف وما كنت ألتفت للتساقط وان كثر ، ما احب الحنا وأشرد من ريحتها
لكني احب الماسكات والزيوت.
انا أخشن شعر بأخواتي نعم لكن ميزتي الكثرة ( ما شاء الله و الله يرده لسابق عهده )
يضبط تجعيد ، يضبط استشوار ما شاء الله
رغم تدليلي لشعري وتغييري لشكله وقصه وصبغته كل فتره - هذا الاهتمام يفرحون فيه قريباتي اكثر مني لانهم ذوق ويشوفون اي شي علي حلو ويتعلمون مني ( لا فخر ولا غطرسة ممنونة لهم كثير ) - الا انه مع مرور السنين بدا يبهت ويخشن اكثر ويخشب ان صح التعبير
بخلال السنين بجانب انواع الفرد الموجوده بكثرة بالصيدليات سويت فرد الحنة السوداء ( خلطة عجيبة - خلطة ام فلان - من البحرين ) ، وما استوعبت الا الان : ان شعري ما اهلكه الا الحنة السوداء ، رغم ان اخواتي شعورهم عليها حرير ما شاء الله
هذي السنة شعري بدون مبالغة : خشن ، مخشب ، باهت ، الغرة ( أقصد التندة ) واقفه ( مدري وش تشوف بالسقف :dry: ) لازم تجعيد اواستشوار ، ويتساقط بشكل فضيع ، متشابك لليل ، واطرافه كنها محروقة
بالعربي برطم وقال أوريك
تعقدت منه ، واشيل هم الطلعات ولازم اقرر وش اسوي فيه من بدري ، واذا فيه طلعه مستعجلة ما اطلع
توكلت على الله وكلمت الاخت بشرى ، وما اخفيكم حبيتها من ذوقها واسلوبها ( تسأل عن امي وهي ما تعرفها ) ، ادري ان هذا المفروض من الكوفيرات لكن تعودنا على كوفيرات الوجه المقلوب والاخلاق السياحية ، واللي متعوذة من ابليس ما تتكلم
زيارتها كانت ممتعة لأقصى مدى ، مرحة وممتعة ومريحة ، وحاولت تشيل اي رسمية ممكن نحسها - حبيتها فعلا وحبيت اولادها - وزاد احترامي لها ان الزيارة كانت في بيتها رغم تخوفي كون شغلها في البيت مو بمشغل وبمجرد دخولنا ابلغتنا ان البيت ما فيه الا اطفالها نايمين ، وزوجها طالع
فعلا حسينا - امي واختي وانا - اننا نعرفها من زمان
الكراتين لي ولاختي.
شافت شعورنا وكانت امينه لما بلغتنا انه مو فرد لكن علاج ، وان شعري النتيجة راح تكون 70 % ، وتحسنه 100 % اذا سويته مره ثانية
راقبتها بدت بأختي ، وجابت مادة الكيراتين وفتحتها لاختي وورتها علامة جلوبال وشممتها نكهة العلاج ( وانا اراقب الموقف واضحك لاني ادري ان اختي من جنبها :biggrin2: وانها ما جت الا لاني
اقنعتها بجدواه )
اقولها بصراحة تعبت معانا وراعتنا بالسعر ، والاغرب قصت شعر الوالدة وببلاش ، ورغم تكرارها طول ال 6 ساعات تقريبا ان : اعتبروا البيت بيتكم ، وخذو راحتكم ، وما فيه احد ، الا اني حسيت باحراج نكون تعبناها واستهلكت جهدها .
طول مدة شغلها بشعري اتذكر العضوة محترفة واتذكر كيف كانت تدعي وتقرا على شعرها ، وكنت اتذكر كلامها واردد ادعيتها ( الله يكتب لها الاجر )
خلصنا على خير وقالت روحي شوفي شعرك ، توقعت النتيجة : مثل الفرد لكن مستشور
لكن المفاجأه : كني ولدت خلقة بشعر حرير ، لدرجة جذور الشعر اشوفها
وتذكرت العضوة سارة222 لما قالت ان وجهها طلع وتوها تعرف انها حلوة وان جمالها كان مخبيه الشعر
طلعت لهم اقول طلع وجهي :icon20:
تنعمت بفضل الله بشعر حرير طول الـ 4 ايام وغسلته وخفت يطير ، صحيح هو ما استمر حرير لان السيراميك هو اللي فارده ، لكن غسلته بالشامبو والبلسم الخاص بالعلاج وطلع شعري طري ولين
سويته طاقية / حواية ، وطلع مفرود يارب لك الحمد
وهجدت النفشة وتمددت الطعجات وصار يلمع الحمد لله وين كنا ووين صرنا
للأمانه العلاج بيقل تأثيره مع الايام ، يمكن لان موية الرياض زينة ( يارب اكتب لي في الرياض قرارا وارزقني فيها رزقا حلالا )
شلت هم يوم العيد اني أتأخر على عيدية خوالي ، وما تحممت الا بعد ما رجعت من الصلاة
واستشورت على عجلة وطلع الاستشوار سهل والشعر بعده يلمع ويجنن وما أخذ وقت
رغم ان شعري طاح بشكل مفزع بعد صبغة الأخت حور الجنان ليلة العيد ، ولين الحين أعاني من التساقط وشعري خف الحمد لله على كل حال ان شاء الله آخر الاحزان
لكن لما اتذكر روعة الكيراتين اتجاهل المصيبة اللي سويتها بالصبغة ومقررة جدا اعيد التجربة
كل الشكر ومن قلب لأم عبدالعزيز على روعة تعاملها وأمانتها ( الله يرزقها من واسع فضله )
وافر الإمتنان للحظاتكم الثمينة التي اهدرتموها على موضوعي
اعتذر على اسهابي في الشرح ( لكن احببت ان تعيشوا جزءا من تجربتي )
اسأل الله لي ولكم ان يجملنا بطاعته ويرزقنا جمال الخٌـلق والخـلق
٭
6
1K
يلزم عليك تسجيل الدخول أولًا لكتابة تعليق.
يعطيكي العاااااافية ياعسل على طرح تجربتك طيب بعد ماغسلتي شعرك كم مرة كيف صار شكل شعرك؟ يعني رجعت النفشة والخشونة ولا جلس حرير؟ جزاك الله خيريعطيكي العاااااافية ياعسل على طرح تجربتك طيب بعد ماغسلتي شعرك كم مرة كيف صار شكل شعرك؟ يعني...
حرير على الطبيعة لا أبدا ً ، مع الاستشوار أحلى
بدون مبالغة : شعري أحسن حال من قبل ، لكن ما زال متعب ، والنفشه هجدت لكن الشعر ما اتفرد لانه معالج
وأنا أزيده وأهلكه ماسكات وتمشيط
التموجات صارت اقل ، لكن ما اختفت
ملمس الشعر يتحسن ، بعد اسبوع استشورت الغرة وفرحت بمنظرها : تلمع وناعمه
فرق عن أول
على حسب شعرك تكون النتيجة
غسل الشعر يأثر أتوقع ، خصوصا بمنطقتنا
الله يعافيك ويجزاك الجنة.
الصفحة الأخيرة
طيب بعد ماغسلتي شعرك كم مرة كيف صار شكل شعرك؟ يعني رجعت النفشة والخشونة ولا جلس حرير؟
جزاك الله خير