عيالي يابنات عيااالي

ورب البيت اني اكتب لكم ومالي 5 دقايق ظاربتهم ظرب توقعتهم يموتون منه
امي دايم تقول لي ظرب الاطفال يحبط الاعمال وانا اتظايق لظربتهم بس وش اسوي
عندي ولد وبنت وربي من يصحون اللين ينامون ظرب × ظرب
مافيه بينهم اي انسجام البنت عنيده جدا وعسره ودمعتها ع الباب
والولد عنيد وعصبي جدا جدا حتى انا مايحترمني
يظرب اخته ظرب وربي اقول بينكسر لها عظم ومع كذا ماتتوب ترجع تعانده
وتكايده ويرجع يظربها انا من النوع اللي اسكت اسكت اسكت بعدين انفجر فجئه واظربهم سوى
الغلطان والمغلوط عليه عندي سواء ادري ان الظرب اسلوب غير تربوي بس ورب البيت تعبت منهم
مابقيت طريقه من طرق التحفيز والتشجيع الا سويته وديتهم ملاهي شريت لهم العاب
الولد جبت له بلاستيشن ابيه يلهى عن اخته شوي ونفس الحاله راميها وراسه براس اخته
بنات لاتقولون عادي يكبرون وتنسين المشكله بين الصغار واكلوها الكبار
ابوهم يدخل ويسفل فيني انتي ماربيتيهم انتي وانتي ويطلع
ومشكله دايم يظرب الولد حتى لو موب غلطان يقول انت كبير اتركها احس انه عقد الولد
وربي لو يمر او امر من جنبه يحط يدينه على راسه على باله بنظربه
والبنت مشكلتها صياااااحه واللي يسمعها يقول ذي مقطوع من جسمها لحمه
وربي هواشهم وظربهم مايزيد الا لدخل ابوهم صار الان منعزل عنا وعايش يملحق بالحوش
ياكل من برا وينام ويطلع قسمن بالله لو ينفجر فيه الملحق مدري قافل الباب وياويلي لو ادق عليه
الا لشيئ ظروري جدااا ورب البيت اني اطل على الحوش اذا سيارته فيه ادري انه موجود
والا ماادري عنه نهااااائيا
مانعرف نسافر مثل الخلق بسبب عيالي مانعرف نجلس جلسه عائليه بسبب عيالي مااعرف مطاعم بسببهم
وزوجي هو اصغر واحد عشان كذا مايحب الاطفال ومايحب ازعاجهم والان للاسف مايواطن عياله
ودي ادخل ولدي لنادي رياضي بس امي تخوفني تقول هالدنيا تخوف والشر كاثر والولد ينخاف عليه اكثر من البنات
وودي ادخل بنتي تحفيظ قران العصر بس المشكله رافضه وتصايح وحلف ابوها ما تروح
من جد انا كرهت نفسي بسبب مشاكلهم والله اني اصلي وادعي ربي واستغفر عسى الله يفرج همي
بنات تكفون اللي بتكتب رد جارح ماترد احسن لاتجيها مني دعوه تراني محتررره وربي شاهد
ان هالمشكله كرهتني عيشتي ابي حلول تكفون