غــرابـة قصتـي؟ راح ترفع معنويات البعض

الـسـلام عليـكم : )

قال داؤود عليه السلام : " رب أي عبادك أبغض إليك" ؟
قال : عبد استخارني في أمر فخرت له فلم يرض به .


قصتي مشوقه

ترددت كثيــــــــــر في إني اكتب قصتي و اللي حصل معـي قبل فتره, راح اتكلم في قصتي على طول .

أنا قبل فتـره انخطبــت من شـاب ثري جدا جدا جدا مع العلم انه كان يوجد فروقات و عدم التكافؤ بيننـا من ناحية التعليم فأنا خريجه جامعيه متفــوقه و راح اكمل تعليمي بإذن الله و هو شهادته ثانويه مع كرهه للدراسه, و غيره ايضـا ً فكانت حالتة الاجتـماعيه (مطـلق) مع صغر سنه و أنا لم يسبق لي الزواج ,,, عمـوما هـذي الأمور ما أعرتها إهتمام كبير.. مع اهتمااامي الكبير بالتعليم....

الأ اني تغاضيت عن هالشي! أو بالاصح عن هالاشيــاء و قلت فيه ناس متعلمين بس اخلاقيتهم قبيحه! التعليم مو شرررط يرفع من اخلاق الواحد الا اذا اجتمع العقل و التعليم و لحد الآن انا مقتنعه بهالشي .. عمـوما هذا الشـاب اللي هو خطيـبي كان فيه اشياء تانيه سيئه بس قلت ( ما كـل ما يتمناه المرء يدركه) .. ويا بنت الحلال استخيري و اللي يكتبه ربـك فيه الخير ..

إستخرررت واستخرررت واستخررررت كثيير ومرت اسابيع و ما احس لا بـ (إيـه) و لا بـ (لا) .. قلت راح اوافق واتوكـل على ربـي واللي ربي بيسرره فيه الخير لي و اللي بيعسره ايضأ فيه الخير لي ... عموما وافــقت و حددنا الشوفه شافني و شفته و ما حسيـت لا بكـره و لا بـحب! ما حسيت لا بـراحه و لا بإنزعاج!!! شي غرييب

طـلع خطيبي و هو مبسووط و يقول لبـابا البنت مزيونه! .. مع العـلم بإن اخلاقي الحمدلله يشييد بها اللي يعرفني و غير الجمال و الجسم اللي ربي معطيني اياه (صحيح اني مو جميييله و لكن جذابه و البعض يقول اني جميله) و الحمدلله على كل حال , عموما موضوع الجمال هذا انا اطريته عشـان بعض الجميلات يعرفون مقصدي في نهاية الموضوع! .. و خطيبي غيـر جميل ابدا اسمر و مو حلو .. وربــــي يعلم انه هالشي ما همني و لا اهتم لا بجماله و لا بغيره !! اللهي اهتم فيه امور ثانيه مثل اخلاقه و هو عصبي على فكره و انا هاديه ,, لسانه قوي بس علاااقته بأهله جيييده و انا همني بصراحه هالشي و أهله ناس رائعين ..

بعــد الشوفه بفتره جدااا قصيره وقبل الخطبه الرسميه و الاعلان عن الخطبه كلم خطيبي و قال مافي نصيب .. انا في البدايه جاني شي فرحني انو الحمدلله انو مو من نصيبي و فررررحت و ما استمررت فرحتي ساعتين الا و انقلب فرحي حزن على نفسي بديت اشك في شكلي و قلت اكيد فيني و مافيني,, عمووما مر كم يووم و انا مكتئبه و ما اعرف ايش السبب !! مع اني فرحانه انه مو نصيبي بس تقدرون تقولون لأنه هو اللي رفضني و انا موو ناقصني شي الحمدلله يا رب و ربي هو الربحان لين خذاني بشهادة الكل بس حسيت بالاهااااانه و كرهت نفسي و بنفس الوقت حنيت على نفسي قعدت ابكي لوحدي و ماااا ابين لأي احد من اهلي هالشي .. اسوي رووحي مبسووووووووطه و فرحانه و انا ربي يعلم اللي بداخلي عموما بان علي اني شوي مكتئبه من الموضوع!!

خطيبي كلم بعد ما انتهى الموضوع مرره ثانيه من بكره كلم بس محد رد علييه و كم مره يكلم بابا بس ما رد عليه بابا بسبب انشغالع عموما بعد حوالي 4 ايام ما اذكر بالضبط كلم اخوي و الا بابا .. عموما قال اعذرووني و ابي ارجع و من هالموال يقول انا مدري وش اللي جاني يوم رفضت بس في البدايه كنت فرحان و فجأه حسيت بخوف يمكن بسبب زواجي الاول و انه حالتي النفسيه غير مستقره و فيه حاله نفسيه بسبب زواجه و طلاقه؟؟ بابا قال لي فكري بالموضوع و انه فيييه الأخير منه لا تجبرين نفسك عليه .. قلت خلاص راح افكر .. فكرررت وفكرررت لمدة اسبوع و نص و قــلت لا ما ابيه ,,, بابا فرح شوي و قال لي خلاص تبين اكلم الحين اقول له لا !! قلت لا خلها بكره .. في الليل جاني شي قلت لماما قولي لبابا قبل ما يكلم يناديني عشان اشوف اذا غيرت رأيي والا لا !!

ناداني بابا و قلت له اني و انا اقول لا مو مرتاحه .. ابي اعرف اسباب رفضه اول و على هالاساسيات راح اقرر قراري الأخير ... كلمه بابا و طلب يشوفه و يستفسر منه بس خطيبي ما اعطاه لا خير و لا شر ! بس اللي لاحظته على بابا انه مرتاح بعد الحديث اللي صار بينهم! و استخرت و وافقت للمره الثانيه...

و انخطبت رسمي و عملنا التحاليل و جاني المهر و اعــــلـــنـــا .. و مع ذلك ما احس بشعور الخطبه و قعدت اجهز للزواج و جهززززت كل شي كل شي في الدنيييييا جهزته مع كرررهي للدوران في الاسواق و مع صعوووبة ذوقي الا اني رحت و جهزت لأنه هذا المفروض قعدت 3 شهور .. مابين هدايا منه لي و هدايا مني له .. بعدها كلم و قال الظاهر مافيه نصيب !!!!!!!!!!!!!!!!!!!!!!!!!! وش بعددده! انتو متخيليين قد ايش الموضوع يقهر : s .. طبعااا اهلي كرهوووه كره بس هذي المره تأثير الصدمه علي غير .. هالمره فرحت كمان في البدايه بس الفرق بين المره الاولى والثانيه اني في المره الثانيه أعلنا و جهزت جهازي !! طبعا ماما و بابا و خصووووووووصا بابا منصدم منه و قلبه علي و ما ينام الليل فأنا رحت لبابا وقلت لنا انا فرحااانه ترى ماااهمني اصلا انا حسااافه عليه و نفس الكلام قلته لماما و انا انصصصصصصب انوااااع الألم بداااخلي جرح مررره كبييييير تألمت من جد لأني أنا لما وافقت عليه رضيييت بكل مساااوئه و مع ذلك يجي الرفض منه!!

في اليوم الأول سويت رووحي فرحااانه و ما همني و اني افتكييت منه بس من بكره بديييت ابكي و انهررت نفسيا مو على خطيبي و الله ولا همني .. بس شي قهرني اني مع التغاضي عن اشياء كثيره سيئه كلم و انهى الموضوع مع عدم ذكر الاسباب ! قعدت ايااام منهاره نفسيتي و ابكي و تدمع عيوني (رحمت نفسي حييييل حيييل) و اعمل نفسي اني مو مهتمه للموضوع قدام اهلي بس وربي يتقطططع قلبي على نفسي بس الحمدلله يا رب على كل شي .. من جد احمد ربي على اللي صار لي و الله يأجرني على كل دمعه و كل ألم تألمته بسببه و الله يأثرني عليييه آمين .. مع انه الموضوع له شهرين بس حبيت اشارككم فيه و أأكد لكم و لنفسي انه اللي صار لي هو الخير و ربي ما يبي الا الخير لعبده اللي احن على العبد من امه و ابوه .. يا رب لك الشكر و الحمد مهما تألمت و دمعت عيوني على نفسي بسبب هالموضوع اشكر ربي واحمده على اللي خلصني منه ربي راح يعوضني بأفضل منه في كل شي بالقريب العاجل بإذن الله و كل الناس عارفين انه هو اللي خسررررني مو انا الخسرانه ...

اللهم اجرني في مصيبتي و اخلفني خيرا منها!!

ربي ما يكتب الا الخييير صدقوني و ربي اللي صار لي كله خير لي ما خاب من استخار و لو انكشف القدر لإخترت ما اختاره الله لي...


عموما هذا نصيب و الجمااال ابدا ماله دخل في نصيبي و كل وحده هنا في المنتدى لا تتألمين على نفسك لأنك ما انخطبتي و الا ما جاء نصيبك و الا تفركشت خطبتك ترى وربي الجمااااال ماله دخل .. ياما فيييه جميلات ما تزوجوا و ياما فيه ناس اقل من عاديين و ربي وفقهم ..


أنا ما أبي غير دعوااتكم لي بهالايام الفضيله بإنه ربي يعوضني بالأفضل منه عاجلا غير اجل

اعذروني اذا الموضوع مخربط شوي بس السالفه من كثر ماهي معقده انا اختصرتها وطلعت لي بهالشكل و اخفيت بعض الحقائق



و أرجوا المشاركه بأي قصه مشابهه حصلت معاك