فركشت خطوبة اخويه

السلام عليكم ورحمة الله وبركاته

ندخل في الموضول على طووووول


انا با بنات كلما اقرى مواضيعكم عن حركان الحريم وقت الخطبه احس بالذنب وودي لو اني ما تدخلت في اللي صار ابد



انا قبل فترة راحت امايه عشان تخطب لاخويه وحده من البنات عن طريق وحده من الاهل يعني ما قد شافتها ابد ولا نحن البنات شايفينها في مناسبه او غيره
وبحسب الوصف البنت حليوة وزينه واهلها طيبين وكل شي تمام

واخويه هذا اصلا ما كان ناوي يتزوج بس من كثر ما امايه قعدت تحن عليه رضخ للامر واعلن موافقته خلاص ووكل المهمه لامي وعلى فكره هو مش صغير وصل 30

مب هنا المشكله

المشكله انه في كل بيت سبحان الله لو الكل زين لازم يكون فيه بطة سودا مب زينه
يعني اخويه هذا الصراحه فيه عيوب انا اشوفها كبيره يعني يكلم بنات وعينه زايغه وخرابيط لدرجه اني انا لو كان متقدم لي واحد مثله في يوم مستحيبيييل اوافق عليه اذا عرفت عنه هالشي

المهم امايه راحت تزورهم مبدئيا تتعرف يعني وشافت البنت وعجبتها وايد وكلمت اخويه عنها وما قال شي عادي مشى الموضوع وانا كنت ساكته ماقول شي

لما بغت تروح عشان تخطب البنت مع مرت خالي قبل ما يروحون الرياييل طلبتني اروح معاها وفعلا رحت وشفت اهلها عسل ما شاء الله ولما جت البنت شفتها زينه مملوحه وطيبه وتمام ولو انها مش بذاك الحلاه لكن نحن ما ندور الحلاه كثير يعني الجمال عندنا جمال الروح وما ندق وايد في الشكل بس اهم شي يكون مقبول

لما جت البنت كانت خجووووووووووووووله وايد ومبينه الطيبه من ملامحها والله بس انا مادري ليش ما ارتحت للموضوع وحسيت اني قاعده اخدع الناس واغشهم في اخويه
انا متأكده انهم كانوا بيوافقون على طوووول على اخويه لو تم كل شي بنجاح كان هذا مبين ووااااضح وعرفناه من اللي دلونا عليهم ولان سمعة عيالنا الحمدلله طيبه وايد لكن مثل ما قلت لكم لازم يكون فيه بطة سودا اللي هو اخويه هذا بس الناس لما بتتكلم عن عيالنا ما بتقول الا كل خير وهالشي بيشمل الاخ العزيز بعد خاصه ان حركاته هاذي قليييل من يعرفها والناس الايام هاذي قامت تمدح الكل ما تصدق

انا في نفس ذاك اليوم بعد ما قامت ام البنت والبنت شوي راحوا يجهزون الفواله تجادلت مع امايه ومرت خالي وقلت لهم لا ما تصلح
تموا يسالوني ويجادلوني بس كنت ملزمة وبسببي ما خطبنا البنت وكأتا ناس متطفلين مثل ما دخلنا طلعنا

تخيلوا شعور الناس احسهم كرهونا من خاطرهم خاصه انهم كانوا يتوقعون الخطبه لانه مافيه اي داعي للزياره غير جذا

عاد لما وصلنا البيت تمينا انا وامايه ومرت خالي نتكلم عن اللي صار وهن يلومني وانا مصممه واقول لها لا ما تاخذه وخلاص كانوا يعتقدون ان اعتراضي على البنت مو شي ثاني

الصراحه كنت ماحب اتكلم جدام مرت خالي ولما راحت قلت لامايه ولدج هذا اغسلي يدج من سالفة زواجه واذا هو يبي يتزوج يجيب مرته بنفسه ونحن بس نروح نخطب

وقلت لها انه ما يصلح نخدع الناس فيه وحرام هي لو تشوفونها كيف طيبه واهلها تقولون والله حرام فيها هالانسان


وامايه سكتت وما قالت شي وشكلها اقتنعت بكلامي لانها عارفه كيف ولدها لكنها مسكينه كانت تقول يمكن يتغير بعد الزواج

انا الصراحه اكره هالعباره لاني ادري كيف صعب ان الحرمه تغير زوجها هذا اذا تغير اصلا

وسكتنا عن السالفه ومرت فترة والبنت هاذي سبحان الله تزوجها واحد من اهلنا وان شاء الله يكون فيه خير لها بس تعالوا شوفوا في المناسبات اذا اجتمعنا والله احس مادري وين اودي وجهي وانا اسلم عليها
لا والقهر انها اكيد تحس اني انا السبب لان امايه قبل شافتها وعجبتها وردت لهم وخذتني معاها ومن بعدها ما صار شي يعني اكيد بتحس اني انا السبب وانا والله كسرت خاطري وقلت مابي ااذيها مع انسان اعرفه عدل

مادري بنات احس انها واهلها يمكن يكرهونا على ذيك السالفه وانا لو مكانهم بسوي مثلهم لاني ماحب احد يسوي فينا هالحركات وساعات اقول يمكن اني غلطت ولو خليت السالفه تعدي كان خير لها ولاخويه

وهل قراري صح اني اخلي اخويه بروحه يجيب حرمة لنفسه يعني ما نتدخل نحن ابد ولا نختار مهما كانت اللي بيجيبها هو يتحمل المسؤولية كامله بسبب فعايله ؟

مادري وهو للحين ما جاب طاري العرس بس انا ألمح له دايم ان نحن مالنا دخل فيه وان هو اللي يبيها نحن بس بنخطبها

حتى امايه تعدته وما عادت تجيب له طاري العرس وراحت لاخويه الاصغر عنه ودها تخطب له

وهاذي كل السالفه
واسفه طولت عليكم