فضفضه ارجو منكم النصيحه الطيبه

السلام عليكم خواتي


انا بدخل بموضوعي هو للفضفضه وكمان ابغا مشوره لاني ماقدر اقوله لاحد من صديقاتي او اشتكي لاحد السبب
لانه يخص امي امي غاليه عندي بس تصرفاتها معي جدا غريبه انا وحيدتها ما عندي خوات ولا اخوان تزوجت الحمدلله وشاء الله ان انا وزوجي نعيش مع امي وابويا لان ابويا كبير بالسن وراتبه ضعيف وانا موظفه والحمدلله زوجي انسان هادي جدا جدا جدا مايحب العصبيه ولا الصراخ ولا المشاكل ويحب الهدوء بالبيت والراحه امي عكس عصبيه جدا جدا جدا لاتفه شي تعصب وتصرخ وتغلط بالكلام زوجي يتحملها كان ويصبر لاكنها صارت تزيد وكل مره تغلط عليه اكتر من صراخ وكلام مثلا من كلامها له (انت عايش ببيتي انت مو محترم انت معقد انت جاي من قريه ماتفهم شي ...)ومثل هالكلام يسمعه دايما لو صارت اي مشكله بسيطه مشكله زوجي غير طباعنا نهائيا زوجي فعلا اهلو من قريه ومحافظين وامي تشوف هالشي تشدد وانه معقد ومايفهم شي تمت الملكه وانا اقول لزوجي ماينفع نعيش مع بعض لاني عرفت طبع زوجي وطبع امي خصوصا مستحيل يتفقو وتصير المشاكل طايحه براسي انا بالاخر امي تتمشكل مع زوجي باي شي تافه وانا صراحه ماصرت ادخل ولا اكلمها وزوجي يسكت يسيبها تتكلم وتصرخ وبالاخر يكلمها وبرضو ماتبغا الا كلامها يمشي ماتعترف انها خطا نهائي حتى مع ابويا نفس الاسلوب بالصراخ والكلام مع ان بابا مرض وازعل عليه لانه ساعات مايسمعها عدل انا حاولت اكلمها كتير بس تقلب عليا واحسها صارت تكرهني وتقلي اني صرت مع زوجي خلاص وانا والله خوفي عليها وعلى صحتها مو كويس تعصب كدا بتتعب حاولت انا وزجي مافي فايده كلمت جارتي هيا مره قريبه لامي وتعزنا وهيا تعتبر متل خالتي كلمتها عن الوضع قالت لي انا ملاحظه امك جدا عصبيه صايره هالفتره وماتتحمل كلمه ابدا قلت لها ايوا مااعرف ايش السبب لو كلمتك بشي قوليلي يمكن تقولك شي ماتقوله لي بس قالت لا ماتكلمت معي بشي

امي قبل لا اتزوج كانت دايما تقول للحريم صحبتها ادا بتزوج ماتبغاني عندها ولا تبغاني اسكن معها لان كتير يقولولها هيا وحيدتك وصعب تبعد عنك تعيشو مع بعض عادي زوجها حسبت ولدك تقول الالالالا تعيش بعيد عني ماابغها معايا وسبحان الله من كتر ماتقول صار العكس وعشت معها عشان ابويا مايتعب لانه لو وضعه المادي تعسر يتعب وصارت له من قبل وجاته جلطه بالدماغ والرئه بسبب التفكير والهم من الفلوس والايجار حتى زوجي يقلي انا متحمل امك وكلامها لي عشان ابوكي مافي زيه بدنيا ومسكين بس امك جدا ماشفت بعمري حرمه زيها ماتحترم الرجال وانا ازعل على امي كمان زوجي حنون جدا بس امي ماكسبتو ابدا خلتو يكرها وهيا كمان تكرهو انا لو سويت اي شي اي شي لزوجي على طول تعصب وتتكلم مثلا لو سويت له عشا طبخ مثلا دجاج او شي تقلي ليش يعني سويله اي شي مو لازم قوليله تعبانه اقولها هو نفسه بدا الشي تقلي خليه اصلا يكرفك ويبهدك استغرب من كلامها لي هيا تروح لصحباتها الحريم تقلي تعالي مثلا زوجي ساعات مايرضا اروح يبغاني معه بالبيت مثلا او نخرج انا وهو نتمشا تقوم تزعل وتقلي الله يعينك معقد وحابسك وكلاااام كتير لو مثلا عزم اخوانو بالعيد غداء تسوي مشكله يومتها تعصب وتقلب وجهها ليييش بيجو عندنا طيب دول اهلو اطردهم مثلا اقوله اهلك لا يجو كييف وهو اخوهم الكبير يعني مره عيب مع ان انا الي اطبخ وانا الي اسوي الغدا مو هيا وصارت لما يجو اهل زوجي الرجال امي تاخد ابويا ويطلعو من البيت يتغدو برا وابويا الله يهديه مايبغا يزعلها بس عيبه بحق زوجي كانو ابويا مايبغا يشوفهم ولا يسلم عليهم ودايما يسئلو عنه وزوجي يتفشل يقولهم تعبان ونايم او اي شي
انا مااقول زوجي ملاك واهلي لا اهلي ناس طيبه جدا جدا بس عيب امي العصبيه والعناد وماتفهم الامور صح يعني ماتفهم الا الي تبغاه بكيفها وانا تعبت لان زوجي الحين بعد حصيلة سنه ونص مشاكل صار عصبي ولما تعصب امي عليه يحطها فيا انا ويزعل مني انا وتصير المشكله بينا وانا تعبت اراضي مين فيهم
اقوى مقوف صار بعيد رمضان دا وانا طالعه من النفاس اهل زوجي كالعاده يجو اول العيد غداء وزوجي قالي انا بطبخ معاكي وبساعدك انتي اجلس بالكرسي وقولي لي بس ايش احط وايش اسوي امي عرفت انهم بيجو وقلب وجهها علينا انا وهوا وصار ترمي كلام تقلي توك طالعه من نفاس توك تعبانه عندك بنتك الصغيره وانتي بس تطبخي طيب انا مافيا الحمدلله الا الخير ولو تبعانه بقوله جيب من برا ماهي شغله بس هيا مشكلتها ليش يجو هما عندنا وصار ان انا استخدمت قدر الضغط حقها اسوي فيه مرقه اللحم وطول اللحم مايستوي بسرعه وصارت تصرخ على زوجي بطريقه غريبه انا استغربت هدا القدر تبعي وانت مادفعت وانت ماسويت مشكله يوم العيد زوجي ماتحمل وكلم ابويا قدامها وقاله خليها تحترم نفسها انا تحملت لانها حسبت امي بس هيا بقلبها شي عليا مو طايقتني وخلاص قرر زوجي نطلع من البيت لبيت بروحنا وانا زعلت على ابويا وامي صارت تطرد زوجي وتبهدلو وعادي ولا همها وجود ابويا ولا هما انا بس طبعا جالسين ندور شقه ولا لقينا كلها ب 33 الف مانقدر عليها امي هديت لها فتره لانها عرفت انو بننقل بس الحين احسها بدت تعصب على اي شي وترمي لي كلام وانا اسكت واراضيها وكلمها بس لازم لو جلست معها وتكلمنا تدخل زوجي بالنص زوجي هوا الي غاسل مخك زوجك وزوجك طيب احنا نتكلم بشي مايخص زوجي ايش دخلووو ياناس مادري حتى لو باخد رائيها بشي يخص الحريم تقلي زوجك عندك اقولها امي انا اكلمك انتي ايش دخلو هوا بدي الهروج تقلي ايوا بلاخر هو كلامه بيمشي هو زوجك ومسوي رجال طيب طبعا زوجي بيكون رجالي وبمشي كلمتو اجل اطلق واجلس بحسرتي عشان بس كلمت زوجي ماتمشي تبغاني اعاندو باي موضوع كان خرجه او كان فلوس او نشتري شي تبغاني انا امشيه على كيفي وهو بس يقول طيب وطيب مايقول لا ابدا وانا زوجي مايجي بالعناد ولا الصراخ وصراحه من كتر الزن صرت اتمشكل معه كتير وصرت اصرخ زي امي عليه وابغا اعاندو وهو لاحظ هالشي فيا وصار ينبهني اني مره زودتها بس مو بيدي كل يوم اسمع زن وكلام من امي كيف بلله ماراح اتوتر من كلامها
الغريب كمان عند امي وابويا ان الطلاق عادي يعني لو تزاعلت انا وزوجي بموضوع طبعا بحكم اننا ببيت واحد يبان علينا انو متزاعلين اهلي يجو ليا لو هو خرج ايش تبغي فيه مبهدلك وحارمك ومايخليكي براحتك اطلقي منو وبلا هم وبنتك بتكون عندك لين تكبر ياخدها خليه يبتلش فيها ياهو دي بنتي اصلا كيف بخليها بسهوله دي والله مره سويتها وهم كلموني بهالكلام وانا رسلت له رساله طلقني ماابغاك سكت هو والحمدلله انه عاقل ولما هديت انا وهو جا كلمني بالموضوع قالي مو كل شي يحله الطلاق ولا تفكري انه حل بيريحك ابدا
وانا فعلا كلمت شيخ وقالي الي اسويه غلط المفروض محد يدخل بحياتنا نهائي لا اهلي ولا اهله ونصحني ماافرط بزوجي وان امي غلطانه بصرفها بس انا تعبانه من حال امي ماابغا تغضب عليا ماابغها دايما زعلانه وتعصب ابغها مرتاحه مبسوطه تضحك وتعيش مو كله هم وطفش ولا مره احسها مبسوطه من قلبها دايما طفشانه ومنكده على نفسها مع انها تخرج وابويا ابدا مايقولها شي باي شي كلو بكيفها تسويه العيد الحين قرب وماابغا يكون مشاكل زي العيد الي الي راح ماتهنينا فيه


طولت عليكم بس انا اختصرت مشاكل كتير ماذكترها بس ابغا مشوره او نصيحه كيف اتعامل مع امي بهدي الموقف وكيف افهمها الصح لان لا انا ولا زوجي نقدر نترك ابويا يتورط بايجار بيت ومسؤليه كبيره عليه