قبل نبدا شوفو هالمقطع بالله ضروري عشان نفهم الموضوع
WIDTH=400 HEIGHT=350
ثُمَّ لَتُسْئَلُنَّ يَوْمَئِذٍ عَنِ النَّعِيمِ
بحكي لكم موقفين حدثن لي شخصيا العام الماضي قبل ندخل بالموضوع الرئيسي
الموقف الأول
في رمضان الماضي جت عندي الوالده وقالت عندنا الفريزر اللي فوق مليان اكياس تمر من العام الماضي وجاينا تمر جديد ولا ندري وين نحطه فأبيك تتصرف بالتمر القديم
صراحه احترت وش اسوي وكان حولنا واحد بالحاره عنده حوش غنم ويعطيهن الخبز والتمر وكذا
بس كنت متحسف لأن التمر بحاله جيده وودي احد يستفيد منه وحتى الهنود حقين المحطات صارو يتغلون ياخذونه يقولون عندنا كثير المهم مصادفه وهالكلام برمضان
قالي واحد من الشباب ان عندي كميه كبيره من التمر ونفس حالتي بالظبط ونبحث عن مكان نصرفها فيه
وقالي فيه بحي العود عوايل محتاجه ممكن نطق عليهم الباب ونبدا نعطيهم
قال وش رايك ؟
قلت قدام
تواعدنا انا وياه بكرا مع صلاه العصر نطلع
وجاب سيارته وشحنا فيها بالشنطه وبالمرتبه اللي ورى يمكن فوق 100 كيس تمر وكراتين صغيره
ونروح لحي العود والبيوت بحي العود متهالكه جدا ولا فيها احواش او شي مجرد ادوار صغيره ذات باب واحد وبحاله يرثى لها
وشيبان الحاره فارشين بوسط الحاره واطفال الحاره يعبون المياه البارده بالجوالين من برادات المسجد لعدم وجود الثلاجات عندهم
قلت لخويي وش رايك نطق على باب كل بيت ونحط قدامه كيس ونمشي للي بعده يعني اوسع للأجر وكذا ويستفيد اكبر كميه من الناس
الله يشهد على كلامي
انه اول بيت كان بابه مفتوح شوي
وفيه طفل واقف عند الباب وعليه ملابس رياضه عثى فيها الزمن
اول ماعطيته كيس التمر
والله العظيم وفي مشهد صعب صعب صعب صعب اوصفه
طلع من نفس البيت كمية بزارين يبغون اكياس تمر والتفت وراي اثر ناس جايين من بعيد على رجلينهم وشاقين البراحه على رجلينهم بسررررعه جايين وكبار بالسن
وكلهم وش يبون ؟ يبون كيس تمر اي والله
والله واحد يركض يركض كبير بالسن ومعه عصا متكأ عليها
تدرون وشي العصا اللي معه ؟ والله عصا مكنسه ورابط بطرفها من الأعلى سييم عشان يكون ممسك له
تجمع على السياره حقتنا اكثر من 100 رجل وطفل وامرأه وخلال اقل من دقيقه وربي يشهد على كلامي جميع التمر اللي بالسياره رااااح
وبنفس الوقت جاني كبير بالسن
يقول ياولدي عطني 10 ريال او رح جب لي دجاجه
يقول والله الدجاجه ماأكلتها لي فوق السنه ويحلف ويقسم بالله
خرجنا انا وخويي من الحي بصعوبه
وكلنا بعيوننا علامات التعجب
لم اصدق ان الفقر اللي هم فيه الى هذه الدرجه
ولم اصدق انا كل هالركض والحماس والطلب اللي عندهم عشان اكياس تمر لها سنه بالفريزر عندنا وزادت عن الحاجه
//
الموقف الثاني
العام الماضي حصلت لي زياره الى منطقه الجوف
وكنا اخذين سكن ومقررين بفجر اليوم التالي بنواصل مسيرتنا لتبوك
الدنيا برررررررد ودرجه الحراره تحت الصفر
صحينا وهو يذن الفجر
صلينا وقمنا على طول والشمس للحين ماأشرقت وركبنا السياره
الأشجار والمزارع بالجوف يكسوها اللون الأبيض من الثلج
يوم خرجنا خارج نطاق المدينه
ونشوف نار كبيييييييره جدا بوسط البر وكانت الشمس توها مشرقه
خرجنا من طريقنا للنار بنشوف وش قصتها وبهالحجم
يوم وصلنا حول النار
اثرها مجموعه من الخيام المقطعه يسكنها مجموعه من الناس المساكين مع عوائلهم واطفالهم
وشابين النار من خشب وحطب وكراتين
عشان يتدفون فيه ويسخنون الماء الجامد عشان يقدرون يتوضون ويصلون ويسعون في الأرض
في مشهد صدق تدمع له العين...
//
مانستفيده من الموقفين
احيانا الواحد يكون عنده اشياء زايده عن حده ويرميها بالزباله او يحطها بكيس ويرميها بأي ارض فاضيه
وللأسف فيه ناس والله محتاجينها اشد الحاجه
ايضا
فيه ناس لايشكرون الله على نعمة الراحه والسكن والأستقرار اللي هم فيه ولا شافو هالفقراء اللي ماوجد المسكن والمشرب والأكل
ايضا
التقصير الكبير فينا من ناحيه التبرعات للناس المحتاجه مأكل و مشرب ومسكن وملبس
احيانا الواحد منا يكون في حسابه 3015
يعني ال15 ريال هذي اتوقع ماراح تقدر تصرفها لأن الصرافات ماتسحب اقل من 50 ريال
طيب وش بيضرني انا وانت والثاني والثالث اننا نجعلها كتبرع ؟
دايم بحساب كل واحد مننا في كسور وفي ريالات زايده مستحيل نصرفها وش بيضر الواحد انه يتبرع فيها وعن طريق الحساب وانت قاعد بالأنترنت
والطريقه ببساطه بالشكل التالي عن طريق بنك الراجحي
اول مانفتح الحساب بنلقى هالخيارات على اليمين نضغط على خيار الحوالات
واخر شئ
طريقه سهله ولا تاخذ منك دقيقتين وعندك اكثر من خيار لأكثر من جهه للتبرع
بعدين فيه شي ثاني
كل واحد جنبه جواله اللحين وكل وحده جنبها جوالها وكل واحد جنبه ابوه وامه واخوانه
لو كل واحد ارسل بجواله رساله للرقم 5040
رساله فاضيه
بهالطريقه بتتبرع لمشروع الأمير سلمان الخيري للأسكان
يعني بهالطريقه ممكن تساعد عائله او اكثر انها تسكن ببيت ملك مثل العالم والناس بدال الخيمه او بدال هالبيوت اللي زارهن الشيخ العريفي هالخرابات
مانقدر نساعد ب12 ريال ؟
ولعل الله يجعل لنا بيوت بالجنه يارب
و12 على 12 تسوي اشياء كثيره
كل واحد اللهم لك الحمد والمنه قاعد وفاتح النت ويتصفح وتوه متغدي ومشغل المكيف ومتلحف وعايش اجمل جو اللهم لك الحمد
بس لو الواحد سكر عيونه لمده خمس دقايق بس
وحس انه وسط الصحراء بدون النت وبيت سقفه شينكو وجدرانه ليحان خشب وحررر ولهم ايام ماتروشو ولا شربو ماء بارد واللقمه حقتهم بدون نفس وطعم
الحمد لله حنا بنعمه فمايمنع نخلي غيرنا يشاركنا بهالنعمه
واللي عنده ملابس ولا كتب ولا شي فيه دايم عند المساجد حاويات يحرص انه يحطه هناك افضل ويمكن بلبسك اللي ماتبيه تكسو واحد محتاج صدق لهالملابس
واللي عنده اكل او شي حي الفيصليه وحي العود وهالأحياء المساكين بالرياض بس محتاجين والله بقايا غداكم وعشاكم
عندكم عزايم كبيره فيه ناس يجون وياخذون باقي اكلكم وهم يتصرفون فيه ويوزعونه وهذي ارقامهم
وقبل النهايه
هالموضوع والله لم يكن القصد منه الرياء او شي لا والله بس للتذكير وللعبره فقط
الشي الثاني
اتمنى من كل واحد حصل له قصه مشابهه للقصتين اللي صارت لي انه يقصها لنا ممكن بهالقصه تفتح باب اجر وطريق خير للناس بهالقصه ومنها نشوف الناس المساكين شلون عايشين
وأي واحد عنده اضافه او عنده طريقه لعمل الخير مايمنع يضيفها بهالموضوع وله أجره بأذن الله</B>
وصلى الله على نبينا محمد وعلى اله وصحبه وسلم تسليما كثيرا
هذا الموضوع منقول من منتديات الاقلاع