فوبيا " الجديد " , بين الاحكام المسبقة وسوء الاستخدام !

في موضوع كان يقرقع براسي
كنت ألاحظه بحياتي الشخصية عامة ولما جيت المنتدى إتأكدت أنه مو بس محيطي يتصرف بهالشكل
طبعاً كلامي هذا من البداية أقول مو تعميم , لكن لاحظته بشكل حابة أتناقش معاكم فيه , وحابة اعرف لو مر عليكم او لا


شيء لاحظته اسمه فوبيا " الجديد " , فوبيا عند أي شي جديد يطلع , سواء برنامج سواء أكلة سواء موضة
هالفوبيا أقدر اضرب عليها مثال مثلا غسالة الصحون , لو جينا للتاريخ فهو اختراع قديم له أكثر من 20 سنة
أول ماطلعت غسالة الصحون عندنا كانت محدودة جداً ونادر أحد يلقاها , وكان الأغلب غير مهتم فيها ولا باستخدامها ولا السؤال عنها
بعد مابدأت تنتشر أكثر وأكثر بدأ فضول الناس حولها , بهذه الفترة كان ردة فعل كثير جداً من اللي حولي
أنهم كانوا يذموها !
وأفتكر الي يقول تكهرب والي يقول تخلص الموية والي يقول تخرب صحونك وكلام كثير ,
ويوم كنت أسأل كان معظم الي يقولوا هالكلام اصلا ماجربوه ! واستغربت ليش الفوبيا من شيء جديد والذم كله دام ماجربتوه !


بعدها بفترة برضه لما انتشر اكثر وصار الضغط الاعلامي اكبر وبعد الابتعاث وبعد ماناس جربته برة
طلعت فئة جديدة تقول لأ مو زين وماينظف وتذمه وهي جربته , هنا قلت أوك هذول موضوعيين
الين حصل شيء قدامي نبهني , كان في واحدة تستخدم الغسالة من سنوات وواحدة من الي جربته وتذمه
قعدت الي جربته وتذمه تشتكي وتتكلم وتحذر وتهول , الين جات الي تستخدمها من سنين سالتها كيف تستخدميه !
طلع انه طريقة استخدامها من الأساس غلط , وانها اصلا نشرت فكرة بناء على تجربة خطأ قامت بها
من بعدها صرت اسال كل واحدة تذم كيف استخدمته هي بنفسها !


بعد هالفترة فعلاً طلع فئة الحالية الي تعتبر غسالة الصحون جزء لا يتجزأ من البيت


طبعا انا ماسوق بكلامي هذا لغسالة الصحون لكن حبيته كمثال عشت تجربة فيه


هالشيء الآن صرت انتبه عليه , لانه استوعبت ممكن الحكم المسبق على اشياء جديدة تخلينا فعلاً نحرم نفسنا من مميزات عدة
صرت ما أمشي مع الخيل ياشقرا الين أجرب الشيء بنفسي


للعلم سويت انا نفس الشيء اول ماطلع الواتساب , قلت لأ مو حلو ومابيه وانا اصلا عندي فيس بوك ماحتاجه
لكن بعد ماجربته واستخدمته صح , واركز هنا على كيفية الاستخدام , قلت في نفسي انا اتاخرت كثير الين عملته


الموضوع حتى أشمل من البرامج , حتى السلوكيات او العادات الجديدة الي تظهر يكون منها فوبيا كبيرة
مثلا ببداية الابتعاث صار فوبيا كبيرة جداً من الموضوع وكلام وآراء بعد التجربة صارت الارآء موضوعية لها سبب واقعي سواء مدح او ذم


حتى ممكن يكون سلوك انك تقعدي على سوق معين وماتجربي سوق جديد فقط لانه " أخاف جديد مايكون كويس "


ولاحظت دائماً يكون الحكم على هالأشياء يا أبيض يا أسود , يعني يا ينحكم بالشيء انه سيء وتظل فوبيا انه سيء الين ينتشر ويقدم
او ينحكم انه جيد ويظل ينقال جيد الين يظهر العكس !


انتم ايش رايكم , هل تشوفون بنظري هالشيء موجود فعلاً ,

هل تشوفون انه فعلا لازم نخاف من الاشياء الجديدة ؟
كيف انتم تجربتكم بهالموضوع ؟
هل تشوفون مثلي أنه هالفوبيا ممكن تحرمنا من مميزات كثيرة ؟


أول موضوع لي واتمنى مايكون ماعندي سالفة
انتظر آرائكم