في شهري الاخير وفي حال ما يعلم فيها الا الله

السلام عليكم

أنا حامل في شهري الاخير

قصتي أني من بداية حملي وانا اتناول فيتامينات الحمل اللي توصف للحامل ، ولاني كل يوم بعد الدوام اروح اتغدى في بيت امي ، وكنت احيانا انسى اخذ معاي حبوب الفيتامينات

عشان كذا قمت واخذت الفيتامينات واعطيتهم لامي تخليهم عندها عشان اخذ حبه بعد الغدا

وهكذا طول اشهر الحمل

ومن 12 يوم كنت شاريه علبه جديده من الفيتامينات واعطيتها لامي وكنت اخذ منها بعد الغدا واحيانا ادا ما اتغدا في بيت امي اخذها بعد العشا او احيانا انسى

المهم والادهى أني امس بعد الغدا قلت لامي عطيني حبوبي ، واعطتني الشيته وطلعت من الشيته حبه وكنت انتظر زوجي يصب لي ماي وقمت قلبت الشيته عشان اجوف اسم الحبوب لان صديقتي طلبت مني اسم الحبوب عشان تستعملها بدل حبوب المستشفى الحكومي ، والصدمة ان الشيته مكتوب عليها بروفين بقوة 400
أنا صرخت وقلت هذا مو حبوبي وامي وزوجي خافوو

وكنا بحال لا يعلم فيها الا الله

وبعد ما حسبنا الكمية من حبوب فيتاميناتي طلع أني خلال 12 يوم اخذت من فيتاميناتي 9 حبات
يعني ناقص 3 ايام يا أني ما اخذت فيهم فيتامينات يا أني اخذت بدلهم البروفين

ويوم دورت في النت عن البروفين في الحمل
طلع انه خطر كثير خصوصا في الثلاث شهور الاخيره من الحمل وانه يسبب تشوه وثقب في قلب الجنين او يسبب له تخلف عقلي لا سمح الله

نفسيتي تعبت والله وامي تقول انها قبل يومين كانت مرتبه فيها كيس الادويه وانها الظاهر اخذت البروفين اللي كانت تستعمله لالم اسنانها وحطته في عليه فيتاميناتي لان البروفين شكله مثل فيتاميناتي بالضبط من قدام بس الاسم من الخلف يفرق


من امس ما نمت ونفسيتي تعبانه خايفه اجيب طفل مشوه او مريض

مو حابه أني اكمل تجهيزاتي ولا رحت شغلي احس أني منهاره