في وحدتي

السلام عليكم 
اليوم حابه استشير الحكيمات بمشكله عندي او بالاحرى قصه زواجي وابي منكم نصيحه او دعوه 
وتصدقون معي بايش انا غلطانه 

انا متزوجه من 16 رجل اعمال رجل بمعنى الكلمه وسمعه ممتازه 
لكن زوج جاف وصامت ومشغول 
برنامجه يسهر في خارج البيت الى الساعه 4 الفجر كل ليله يجي يحط راسه احيانا يتكلم بشكل بسيط واحيان كثيره لا 
يصحى الصباح وما اسمع الا كلمه وحده فطور 
يفطر ويطلع لاذان العصر يرجع يتغدا وينام شويات ويقوم يلبس ويطلع ولا يطلبني اجي اسولف عنده وان جيت ماعطاني وجه 
جاف ما اسمع منه كلمه حلوووه ابد ابداً 
غامض ما اعرف عن حياته شي ابداً 
كثير السفر ولا مره طلب اروح معه صحت بكيت طلبته مافيه استحاله 
طبعاً ما اعرف مع مين رايح ومع مين جاي ويكلمني يومياً 3 دقايق ع عجاله وياويلي اسأله انت وش تسوي او وين فيه 
يعصب ويسد التلفون بوجهي 
يرجع مو مشتاق لي حتى الهديه مافيه ولا مره جاب شي لي

مواعيده لي كثيره بس مافيه شي يطبق كلها مواعيد عرقوب 

عصبي نقاش موضوعي مافيه 
ان ناقشته في شي لو شي تافهه او مصيري كلها تنتهي بمصيبه وزعل 
او قلت انا محتاجتك ابيك اقعد معي قاعد يسب ويلعن وانتهى النقاش بتهديد والله لاطلقك والله لاتزوج عليك وتشوفين ان قهرتك 
وهذا شي اتعب اعصابي وترني وجاب لي المرض 

ماعنده مدح ابداً دايماً انتي كسلانه انتي مريضه نفسياً البيت ضايع 
وهو غلطان كل حياتنا ماشيه تمام من دونه انا قايمه بحياتنا في البيت بشكل كامل 

دايم يسب شكلي ومظهري ووجهي وانا الحمدلله جميله ونظيفه في نفسي 

كل ليله اتعطر واتزين والبس ويغطني النوم ماجاء اقوم الصباح محتقنه منه بشكل كبير واحس بقهر وحقد عليه وودي اخنقه 
كانثى محتاجه رجل يحسسني بالاهتمام 

دايماً اهلي مايحبونك انتي تكرهين امي انتي حقود وهالكلام مو صدق علاقتي باهله ممتازه جداً كانهم اهلي 
اعاملهم بالضبط مثل ما اعامل اعلي وما اقصر معهم بشي 
والي اشوفه منهم انهم يحبوني صح فيه حزازيات بسيطه لكن انا ما اوقف عندها اطنش حتى هو مايعرف انو يقط علي كلام 
ما احب اشكي ولانه شي تااافهه يحصل بين الاخوان كيف بين الكنه واهل زوجها 

دايماً يحطمني ويحاول يهز ثقتي بنفسي 
في البدايه ماقدر لكن الحين 
احس اني انهزيت وتحطمت وجاني قلق وتوتر وارق ومعاد انام الليل 

هو واهلي علاقتهم ممتازه 
اهلي يحبونه ويدعون له 
اولاً لانهم يحبونه بشكل عام
يحبون عيالي 
وثانياً لاني دايماً امدح فيه 
ابوي وامي يدعون له ويحترمونه ويعدونه من عيالهم مع انه مايجيهم كثيير 

كل الي حولي واعرفهم 
عارفين انه ساحب علي ومايحبني اول كنت ادافع واقول غلطانين 
الحين طفشت وصرت اخلى الناس تحكي لاني اقتنعت اني فقط ام ومربيه لاطفاله 

نادراً يطلع فيني مكان
واحنا عايشين بجده
حتى البحر ما اشوفه ولانطلع له
ولا نروح مكه الا كل كم سنه 

صرت اشك فيه 
الحياه معه ممله مافيها جديد 
روتين قاسي كل يوم وكل ليله 
في داخلي احتياج عاطفي كبير احس بفراغ بحياتي 

عندنا اطفال والحمدلله مهتمه فيهم ومربيتهم لكن هو دايماً يسبني اني مهمله لهم ومالي داعي بالحياه ولا اي فايده عندهم 

المشكله الان 

اني اصبحت انسانه متوتره وام عصبيه وقلقه والروتين والملل جاب لي الكأبه وغير انو حياتنا صارت كلها مشاكل لاني كل يوم اطلب منه يحس فيني لكن من دون فايده 

من كلامه انو يفكر بالطلاق كثير 
ويبيه بس يرده مستقبل اطفاله 
خايف يتشتتون 

ما ابي منه الكثير 
القليل القليل يرضيني 
لو كلمه حلووه بتسعدني اسبوع كامل بس مافيه 

علموني وين الغلط 
عادي اقسوا ع كيفكم 
بس انصحوني 
بتقدرون تعيشون حياه كذا
وتعطلون جميع مشاعركم وتموتون قلوبكم