قرايبي فقعوا لي مرارتي,, هالمرة مشيت على كلام زوجي

سلام يا حلوات
الموضوع و بأختصار
عمتي أخت أبوي العودة تكره أمي كره العمى لان أمي عكسها تماما,, متوفقة بحياتها الحمدلله و عرفت تربي عيالها صح و امرأة عاملة و علاقتها طيبة مع أبوي و أهلها يعني خواتها و والديها الحمدلله.. أما هي علاقتها جدا سيئة مع الناس و عيالها ما يحترمونها و قاعدين على قلبها, وكل ما يدقون على باب ناس عشان تختطب لعيالها يجيهم رفض بسبب طريقة تربيتها لهم و سمعتهم اللهم لا شماته.. عمتي هذي قاطعت امي من زمان و لا عاد بينهم اي اتصال.. امي مو شايلة بقلبها بس عمتي ما عاد تبي تكلمها

المهم, السالفة و ما فيها ان عمتي هذي بنتها متزوجة و عايشة في استراليا, علاقتي بها كانت جدا طيبة و أمي تحب هالبنت موت, صارلنا 4 سنين لا شفناها و لا شفنا عيالها, دوم ارسل لها و ما ترد
اليوم الصبح اقوم من النوم على صوت رسالة بجوالي, بنت عمتي راسلة لي تقول أنا رديت الديرة اجازة و قاعدة في بيت امها (بيت عمتي) و تبي تشوفني بروحي تبيني ازورها انا و عيالي بس.. قلت لها طيب
رغم اني اكره عمتي بس قلت خلني ازورها نص ساعة اسلم عليها و بس.. حتى اني فكرت امر السوق بسرعة اشتري حلاوة و ملابس لعيالها
دقيت عليها اسمع صوتها و اقولها اني بجيها العصرية, و قالت لي انها رادة استراليا بعد يومين و صارلها في الديرة 3 اسابيع!!! صراحة انصدمت من الاقراب هالايام ما يخافون ربهم و لا يهمهم صلة الرحم
صارلها 3 اسابيع و بيتهم يبعد عن بيتي 10 دقايق! ولا كلفت على نفسها تتصل فيني, حتى لو هي مشغولة اعذرها اهم شي تقولي انها جت و انا ما عندي مانع اشوفها قبل سفرها بيومين, بس لا دقت ولا قالت لي, مجرد رسالة تقولي تعالي ابا اشوفك.. أنا عطيتها كلمة اني بمرها اشوفها بس والله احس اني استعجلت,, قلة الأحترام تجرح القلب
استشرت زوجي و قالي سوي مثلها دام هي ما تحترمك لا تحترمينها و ردي عليها برسالة قولي لها غيرت رأيي ما بمر عليكي لان زوجي يبينا نطلع العيال الالعاب.. و فعلا رسلت لها هالشي
ردت علي برسالة تقولي: عادي
!!!!!!!!!!!!!