قررت الطلاق اخيراً ، ومحتاجه نصايحكم الله يخليكم

السلام عليكم ورحمه الله وبركاته
بكتب قصتي وابي مساعده ونصيحه لاني محتاره مره ولا اعرف كيف بتصرف




في البدايه حياتي في بيت اهلي كانت صعبه مرره   ، عباره عن سجن ما فيه طلعات ، ولا عشت في جو العائله "لغه الحوار في بيتنا سب ودعاوي " ووضعنا المادي سيء ، ماكان عندي غرفه مستقله كنت انام في مجلس الحريم ، عددنا 9 افراد في البيت وكلنا حمام واحد ،انا اكبر اخواتي واخواني
لما صار عمري 21 تزوجت وكان اكبر سبب لزواجي اني بطلع من بيت اهلي وبعيش حياه طبيعيه




نجي الحين لزوجي 
ابو زوجي متزوج ثنتين ،ام زوجي ما عندها الا زوجي ولدها الوحيد و3 بنات ومدلعته مرررره ، و عنده اخوان واخوات من زوجه ابوه بس علاقتهم مع بعض  رسميه شوي 




تزوجت من 3 سنين تقريباً ، وسكنت معاه في منطقه ثانيه بعيده عن اهلي،  سكنت مع امه واخواته في نفس البيت بس انا لي ملحق مستقل
 
ماكان فيه شهر عسل ولا طلعات ،ولا حسيت اني عروس ابد 
 
بدأ دوامه وصارت حياته يصحى من النوم يروح الدوام يرجع ينسدح عند التلفزيون الين ما ينام ،ينام اكثر من 12 ساعه في اليوم 
ولا عنده  صداقات كثير ولا يطلع الا نادراً ، اوقات حتى ايام الاوف ما يطلع من البيت




طيب جداً معي ويحترمني، و مو بخيل  ويحاول ما ينقصني شيء ، واذا تهاوشنا يجي يعتذرلي حتى لو انا الغلطانه 
واهله طبيين جداً ويعاملوني كأني بنتهم ، ويقدروني ويحترموني ،حبيتهم مرره واحسهم كأنهم اهلي 
 
علاقتي فيه غريبه ،  ما ننام في غرفه وحده ، هو ينام في المجلس عند التلفزيون ،و كنت الاحظ كل يوم تقريباً لما يصحى من النوم مناديل كثيره عنده ، كنت حاسه وعارفه وش كان يسوي بس سكت ،لاني من بدايه زواجي ما كنت متقبلته ولا حبيته ابداً ، نومه لحاله وبعده عني ما كان بالنسبه لي مشكله بالعكس ارتحت  




زوجي عنده ضعف في العلاقه الخاصه ، ولا تصير الا مره كل شهر او شهرين ، محاولات بس لاني لسى بكر ، ما احد يدري بهالموضوع حتى اهلي ما قلتلهم ، قلت في نفسي مريض يحتاج علاج والموضوع مو بيده 




راح للدكتور بعد اكثر من سنه من زواجنا ، بعد ما انا كلمته في الموضوع ، يعني لو ما تكلمت ما كان فكر يتعالج
عطاه الدكتور علاج و كان متحمس مره  للعلاج لانه يبيني احمل وكان كل كلامه معي ومع الدكتور عن الحمل ، وكأنها هذي بس المشكله 
طبعاً العلاج ما جاب نتيجه ، استمر فتره يتعالج و بعدها وقف 




نجي الحين للصدمه
عرفت الباسوورد لجواله وفتحته ، لقيت صور كثير مرره مره لشوااذ ، كلها لرجال ، صور بأوضاع قذره كلها لرجال ، ولا صوره ولا صوره لبنت ، واغلبهم اشكالهم مو اجانب ..ما فتشت المحاداثات والبرامج
تأكدت انه مو طبيعي 
تمالكت نفسي وقفلت الجوال ورجعته مكانه
ما حس ولا يدري اني فتشت الجوال حتى الان




ما كنت متخيله اني ممكن اشوف شيء زي كذا ، المفروض من البدايه الاحظ ،  بس صار الي صار وضيعت 3 سنين من عمري مخليني فيها شغاله اطبخله وانظف البيت واكوي ملابسه واروح  لاهله ، وهو عايش حياته مع الي مثله ومبسوط 




هو ما عنده رغبه نهائياً في الحريم ، لاحظت هالشيء من بدايه الزواج،  بس قلت يمكن بسبب الضعف، 




الحين انا مقرره اتطلق طبعاً 
بس ما ابي اتصرف غلط واضيع  حقوقي واندم بعدين 




الرجوع لبيت اهلي صعب مره ، وضعهم الان اسوء من ما كان عليه قبل 3 سنين 
لازم اتوظف قبل ما اتطلق وارجعلهم ، باندفن لو رجعتلهم بدون وظيفه 
 
طبعاً انا ماليه نيه  اقول انه شاذ بالمحكمه، بستر عليه 
 حتى اهله ما ابيهم يدرون ، لان اهله طبيين ولا لهم ذنب و ما ابي اصدمهم  
 
ما عندي خبره  ولا اعرف اجراءات الطلاق .. وهل يحقلي فسخ العقد بما اني ما زلت بكر، وهل يكتب القاضي اني بكر مع انه صارت خلوه بس بدون فض الغشاء ؟




وهل الاجراءات تطول ؟ ولازم انا اروح او ممكن اوكل احد من اهلي 




انا لحد الان ما قلت له باللي شفته ، ساكته الين ما ارتب وضعي وبعدها باعبي شنطي واطلع بدون رجعه ان شاء الله
خايفه اواجهه ويصير فيه شيء ، لانه شخصيته ضعيفه وجبان مره ، كل مره نتهاوش فيها يخاف ويبكي ، مره تهاوشنا وهددته بالانفصال انهار  مره كأنه طفل ،هو انسان مريض ، استيعابه بطيء ولا يفهم بسرعه بشكل مرضي ، و شخصيته مهزوزه وخواف مرره ، ما اعرف كيف بتصرف معاه .




بليز بنات الموضوع حساس وابي اراء حكيمه 
شتنصحوني اتصرف الحين وكيف اضمن حقي؟