السلام عليكم ورحمة الله وبركاته
يسعد صباحكم ـ مسائكم>>كلن على وقته...
اكيد استغربتوا من العنوان..وزادت الغرابه من الصوره ..
ندخل بالموضوع ع طول ..
انهبلن لالاااا اكيد انهبلن >> اوووومش على المقدمه الحماسيه :S_45: >>خخخ حسيت اني بالتلفزيون..
قريبتنا وجارتنا .. بديت اشك بعقولهن هن ورجالهن ..حضرتهن بيسافرن للخارج >>ايه ادري بتقولون عادي خليهن يستانسن ..
....ماقلت شيء بس بيتركن عيالهن وبناتهن !! وعند مين ؟؟ " وحده عند امها والثانيه الادهى والامر عند الشغاله...
اللي هذا تفكيرهن انا مادري ش يحسن فيه عسى محدن غاصبهن على الزواج (من بغى الدح مايقول أح) يعني حضرتك تفلينها أنتي و زوجك وأمك حلوة اللبن هديتها كرف وسهر وتغييرحفاظات خير من جد بنات آخر زمن ياحسافة اللبن اللي شربتيه صايرة مثل طير بن برمان يدربه ويدلعه وأول ماتركه للصيد جاب له حية قرصته ومات.. كفو يابعض البنات..حضرتكم مستانسين والعجوز بيتها انواع الازعاج تقول روضة اطفال والا فسحة مدرسة ابتدائية..
والا مع الشغاله!! مامدانا ننسى قصة مشاري وين القلوب وين الضمائرالحيه ..والله ناس تمنى الاطفال وهذولا مهملينهم..
عاد بالله وش داعي السفر..!! علاج مرض مستعصي مثلا..! ..او جهاد في سبيل الله..! ..او دعوه الى الله..! اصلاً لو كانت دعوه الى الله مايجوز تروح للواجب
وتترك الاوجب حفاظها على بيتها ومراعاة ابنائها..
عيالهم ينتظرون الاجازه ..فرصتهم يغيرون جو.. يطلعون مع اهلهم وينبسطون..
ـ يجون يقهرونهم يتمشون ومخلينهم منطقين بالبيت ـ اللي يغث اعذارهم البايخه
.. صغار والا برد والا فلوسنا ماتكفي >> عذر انهم صغار ش مطيركم على السفر خلو بزارينكم لين يكبرون ورحوا ان بغيتوا للمريخ.. والا خوذوا الشغاله معكم .. وان كان قصدكم التكاليف >> ياملا الصلاح دام وضعك المادي صعب خلك بديرتك ابرك لك المنتزهات والمهرجانات بكل ديره.. وان كان قصدك برد عليهم.. يعني ماقد مر عليهم برد بديرتهم >> جانا بردن ماقوى منه وعدى ياربي لك الحمد مامات احد يعني دحملهم وماجايهم الاكل خير...وان كان قصدكم شقاوتهم الزائدة والله عاد هذي تربيتكم تحملوهم اذا ماتحملتوهم انتم من بيتحملهم جدتهم وليش الجده تبلش بعيالكم ما يكفي ربتكم وشقت عليكم ..بعد مطالبة تربي عيالكم صحيح ناس أنانيين هذا جزاها بدل ماتريحونها اللي ماصدقت تكبرون بترتاح تجي أنتم ترمون بزارينكم عليها ..الحمد لله والشكر بس..
..ان كان قصدكم تبون الرومانصيه>>يابعدها عنكم افلقني بحديده اذا شفتها..الرومانسيه ماتحتاج بحث اللي يبي الرومانسيه وفيه رومانسيه يحصلها حتى لوانه بين عياله..
اي رومانسيه التي تبعدكم عن عيالكم ..طيب ليه تخلفون اذا همكم السفر كان سافرتوا لين يطيح اللي بروسكم..بعدين خلفتوا...
ماقول الا الله يخلف وترجون برهم بكرا وهذي سواتكم...
ختاما ..كل من فكرت تسافر وتترك عيالها لها هالقصه ...
زوجين سافرو دبي وتركو ثلاثه اولاد مع الشغاله.. الشغاله زلقت وطاحت على راسها وماتت وباب الشقه مقفل والاولاد اكبرهم اربع سنوات بعد اربعة ايام رجعو الزوجين ولقو الاطفال ميتين بجنب الشغاله وماسكين ثوبها هاذي القصه حصلت في الهياثم جنوب الرياض....
..ياناس ياعالم ياهوه هذولا عيالكم يبون اهتمام يبون مراقبه حنا بوقت كثرت فيه التحرشات الجنسيه من القرايب ومن الخادمات...وكلن مشغول بنفسه ..
والجده يا الله تقوم بنفسها..ماحد ملزوم بعيالكم بيراقبهم ويحرص عليهم مثل حرصكم..
..حرام عليكم والله حراااااااام.. كلكم راع وكلكم مسؤول عن رعيته ....
اخواتي الغاليات..نوروني بتعليقاتكم وهل انتم مع اوضد هالشيء..
ابي دعوه بظهر الغيب