قصة غيرت شيء في شخصيتك🌈

مساء الخير والله يسعد اوقاتكم بكل خير 💜
موضوعي زي ماهو في العنوان علمينا قصة صارتلك بحياتك او موقف غير شي بشخصيتك🦋 وحبدأ بنفسي
الشي اللي تغير فيني هو الثقة واحسان الظن بالناس كنت اي موقف امر فيه وفيه اساءة لي ابرر واحسن الظن واقول لا حرام مو قصده... لكن موقف صارلي وغير ذا الشي وهو تقرب جارتي مني (جارتي مستأجرة بعمارة زوجي) انا عادي يعني فريندلي مع كل الجارات واسلم واحضر مناسباتهم لكن دي الجارة تقربها مني كان غريب وجا فجأة بعد سنة من استئجارهم كل كم يوم تطلعلي صينية اكل ولا ترسل عيالها يقعدو ويلعبو عندي ولا تعزمني عندها في العصر وانا طبعا محسنة الظن واقول هي معتبرتني صديقتها وتحبني بعد شهر الا شوي من تعاملها معاي قامت تهرج عن الاجار وانو غالي ومدري ايش والعقار نزل والاجارات نزلت وانا اقولها ايوة صح فجاة رمتها بوجهي وقالتلي قولي لزوجك يخفضلنا الاجار قلتلها انا مالي شغل بدي الامور خلي زوجك يكلمه وانا على فكرة ما اخد ولا ريال من العمارة دي عمارة زوجي واخوانه قعدت تحاول تقنعني وقالت شوفي جارتنا نقلت عشان الاجار غالي قلتلها الله يسهلها بس انتي قاعدة تطلبي مني شي صعب ما اقدر اتدخل بدي الامور
وبعد دا اللقاء اتغيرت الحرمة ١٨٠ درجة ولا عاد شفتها ولا كلمتني وبلكتني من الواتس ولمن اتصل تديني مشغول😂 وقتها من جد قررت اني ما احسن الظن بالناس واثق ثقة عمية واكون على حذر واحاول اعرف الصديق الحقيقي من صديق المصلحة
يلا يا بنات قولو مواقفكم نستفيد من بعض ومنها نتسلى في الويكند 🤩


سبحان الله الحمدلله لا اله الا الله الله اكبر