بسم الله الرحمن الرحيم
السلام عليكم ورحمة الله وبركاته
كيف أخباركم ياحلوين؟!!
إن شاء الله تكونوا بأحسن صحة وأحلى مزاج
:27: :35:
اليوم جايتكم بقصة ولادتي ببنوتي اللي ياما تمنيت أدخل وأكتبها لكم
:04:
بس ربي كتب أن هالأمنية تتأخر شوي وأعووووشر ولله الحمد
أخذت لي منه عشرة أياااام
كانت معي الطلوق من بداية التاااسع وتعبتني مرررة ومع كذا عوشرت
:44::44:
المهم .. مالكم في الطويلة
ربي يطول لي بأعماركم وأعمار من تحبون
في يوم الجمعة 21/11/1431هـ .. طلعت مع أهلي وزوجي للبحر وتمشينا وفليناها واستانسنا وانبسطنا اللهم لك الحمد
كانوا أهلي قبلها مرتين يروحون ويطلبوني اخاويهم بس كنت أخاف تجيني الولادة وابتلش .. طبعا المشوار من عندنا للبحر طويل ,, ياخذ تقريبا ساعة الا ربع
بس بهاليوم قلت ماأطوف الطلعة .. دايم أعشم نفسي واقول يمكن أولد ولا فيه حس ولا خبر
بروح وأمري لله .. خاصة ان نفسيتي كانت عدم فقلت اغير جو
ولما رحنا .. أول شي تمشينا بالسيارة عند البحر .. وبيني وبينكم زوجي ماخذ سلاح الصيد معه .. نسميه "أم صكمة" .. وصدنا لنا هناك كم من دحروجة وخذناها معنا نشويها للعشا
عاد خبركم أكيد عند البحر رمل .. ومايخلي من المطبااات
انخضيت كويس ذاك اليوم .. وغير كذا تمشيت مع زوجي يجي حول الربع ساعة على رجولي
<<< يقولون المشي على الرمل يسهل الولادة .. وأنا من عقب ذاك اليوم بدت العلامات
خلصنا تمشي ورجعت لأهلي جلسنا شوينا عشانا وأكلناه وعينا من ربنا خير
بعد العشا .. رحت جلست مع زوجي وأبوي وأخواني وسوالف وضحك ووسعة صدر
ومع الضحك والفرفشة ماحسيت بنفسي الا بذيك الرطوبة بملابسي الداخلية تكرمون
كلمت زوجي وقلت له أبي الحمام << كرم ربي من يقرا
خذاني ووداني للحمامات ودخلت وحصل قطرات موية بالكلوت
وقلت بدا الجد
رجعت خبرت الوالدة .. وقالت لي إن شاء الله انك قربتي وتكون موية الجنين
أنا شكيت تكون هي موية البيبي ؟!! اللي خبري أنها إذا نزلت تنزل وتعبي الملابس
أنا لا قطرة وشي بسيط
المهم طنشت الموضوع وكملنا رحلتنا ورجعنا للديرة بسلام
رجعت لشقتي ونمت .. وصحيت الصباح ونفس الشي الملابس مطبعة
وطنشت .. قلت يمكن تكون افرازات وبتروح
كملت يوم السبت كله على ذا الموال
يوم الأحد الصباح كانت الموية زايدة علي شوي .. وكانت معي آلام بسيطة ومحتملة وجدا عادية
زوجي شغلته مدرس .. شافني على ذا الحالة وقال بوديك للمستشفى بس أنا رفضت
فقال بغيب أساس إذا صار لك شي لا سمح الله أكون بجنبك
قلت بكيفك وحتى لو ماصار لي شي يكون أفضل لأن عندي موعد بكل أحد الظهر وأتأخر عنه بسبب أن زوجي يكون عنده سبع حصص فا بذا اليوم قلت أحسن غيب ونروح مبكر
غاب زوجي واتصل على مديره واستأذنه ووافق المدير بس شرح وتعذر من زوجي
جا الظهر ومشينا من هنا الساعة 12 وربع تقريبا
ولما رحت الموعد قال لي زوجي لا تنتظرين دورك ادخلي واطلبي الدكتورة على طول وخبريهم عن المويات
دخلت وكلمتهم وبعد حنة ورنة دخلوني على الدكتورة
ومن حظي .. دخلت بعدي على طول دكتورة ثانية وحضرتها بدت سوالف وضحك وكثرة هذرة
وانا ولا كأني موجودة
خلصوا هذرتهم وانقلعت ذيك .. وبدت الثانية تتميلح
كيفك ياستي وايه عاملة وكيف الماما والبابا وووووووو .. إلخ وسألت عن العيلة كلها
بعدها تفرغت تسألني عني .. اليوم لك 10 أيام مطوفة الموعد
حسيتي بهالفترة بأية آلام أو مويات أو دم أو أي حاجة غريبة ؟!!
عاد انا خلقة كان مرتفع ضغطي .. قلت لها فيه موية
<< ذيك طاااارت عيونها .. ليه مارحتي ع الطوارىء طيب ؟!!
شرحت لها انها كان بسيطة وغير كذا أنا أخرتها قلت أخليها مع الموعد مرة وحدة وتكشف هي علي
قالت لي يالله فووووق السرير كشششف
رقيت ع السرير وجات دخلت فيني حاجة غريبة ماشفتها
بس اللي حسيت فيه انها سحبت من الموية اللي فيني شوية
وقاست لي رحمي وقالت لي مفتوح 2 سم
وسوت لي تحرييييض وآآآآآه من التحريض مووووووت
سألتها الموية وش طلعت ؟!!
قالت افرازات عادية ومالها دخل بالجنين
وقالت بتكتب لي تنويم بس رفضت
قلت بروح لبيتي .. قال تراك قريبة خليك عندنا افضل
قلت لا بروح واذا حسيت بشي رجعت لكم
قالت طيب بس نركب لك تخطيط للطلق
وافقت وركبوا لي التخطيط وطلع معي طلوق بس كانت خفيفة مرة
حاولت فيني أظل عندهم ورفضت ورجعت لديرتي
بالطريق قال لي زوجي وش رايك نروح نتغدا عند أهلي .. قلت أوكيه ماعندي مانع
رحنا وتغدينا عندهم وظليت هناك للمغرب
بعد المغرب انشغل زوجي مع ابوه وقال قومي بوديك بيت أهلك
رحت لبيت اهلي وعلمت أمي باللي حصل
قالت لأختي قومي سوي ينسون بدون سكر
سألتها ليش وقالت تشربيه محلى بالعسل .. وإن كانت اللي فيك طلوق ولادة بتحمى وبتزيد
قلت أمري لله
طبعا بعد التحرض بدا يجيني الطلق بس كان خفيف مرة ومو منتظم
شربت الينسون مع العسل .. وحسيت ان الطلق فعلا وانتظم وزاد شوي
وقلت بكمل على روحي وبقوم اسبح واتنقع بموية حارة
قمت وعبيت البانيو موية حااااارة وجلست فيه حوالي الربع ساااااعة
قبلها وعقب الينسون لما انتظم طلقي كنت احسب له كل ثلث ساعة يجيني
بس في خلال الربع ساعة اللي تنقعت فيها بالموية الحارة
جاني الطلق ثلاااااااااث مراااااات
تخيلوا كيف حمته الموية الحارة سبحان الله
خلصت سباحة وقمت ولبست وطلعت لأمي وأبوي وجلست معهم وشوي وجانا زوجي بعد
ظليت جالسة معهم حوالي الساعة تقريبا وكل ماجاتني الطلقة صحت وأمي وزوجي يحسبون لي
مرة كل 10 دقايق مرة كل 9 ,, 8 ,, 7 ,, 6 ,, 5
قالت امي بس يالله المستشفى
قال زوجي خلينا نصبر شوي يزيد عليها بعد عشان ماتطول هناك .. خاصة انها بكرية
قال ابوي لا روحوا تتنظرونها هناك وتولد ولا تأخرونها هناك وتولد عندكم والا بالسيارة وتبتلشون
منا ومنا قلنا يالله خلاص وقررنا نروح للمستشفى
رحت ودخلوني بس مارضوا امي تدخل معي قالوا ممنوع وغير كذا القسم زحمة والولادات فلللل
انتظروني كلهم برا ودخلت انا لوحدي
ركبوا التخطيط وطلع معي طلق قوي .. بس لما كشفت قالت مفتوح 4 سم
والدكتورة مع وجهها متكبرة وتقول بدري عليك ياماما انتي مطولة مابتولدين الا الصبح
نرفزتني بقوووة قلت اي صبح ومفتوح الحين 4 يعني قريبة
قالت لا ياحبيبتي انتي بكرية وتحلمين يزيد حتى 1 سم خلال ساعة
قلت الله العالم والتساهيل من الله .. طنشت كل كلامها وتوكلت على ربي
جلست اقرا في أذكار الولادة اللي معي واشرب من موية زمزم ونفس الشي مقري فيها اذكار الولادة
وامي كل شوي تتصل ماكشفوا عليك ثانية مازاد الطلق ما ما ما ما ... ؟؟؟؟؟!!!!!!!!
قلت ولا اهتموا يقولون اني مطولة
قالت عندك حلتيتة منقعتها انا لك بموية وحاطتها مع اغراضك بشنطتك
شميها واغتسلي منها من تحت بتفتح عندك الرحم بسرعة بإذن الواحد الأحد
قلت ان شاء الله .. بس ما خذت بكلامها قلت ماراح آخذها الحين بأجلها شوي
ظليت حوالي الربع ساعة وشوي الا تجيني الممرضة وتعطيني لبس وتقول غيريه وتعالي الحقيني على غرفة الولادة
<<< عااااد كل هذا عقب حنة وصياااح مني انهم يودوني لأني حسيت من الآلام اني قريبة من جد
دخلت الحمام وانتوا بكرامة غيرت لبسي وقلت خلني اجرب الحلتيتة مرة وحدة .. شميتها واغتسلت بها
وودوني لغرفة الولادة
<<< هالكلام تقريبا كان ع الساعة 1 بالليل طبعا
خلوني شوي وعقب حنة مني جات الدكتورة وكشفت علي وانصدمت بس مابينت
وقالت مفتوح 7 -8 سم تقريبا إن شاء الله قريبة
<< خخخ كانت تكلمني ومو حاطة عينها بعيني حستها افتشلت
جلست على حالي يجي نص ساعة وانا كل ماجت الطلقة صرخت بكيت
والممرضات يسكتوني ونفس نفس مافي يبكي ياماما
غثوووووووني
يوم جت الساعة 2 الا شافوا الطلق عندي وصل حده تقريبا وجاو كشفوا عليه والحمد لله طلع 10 سم
قالت لي يالله شدي حيلك وكل ماحسيتي بالألم ادفعي .. وخلتني اقلب ع جنبي تقول عشان ينزل الراس بسرعة
وفعلا سبحان الله ماطولت طلقة طلقتين واحس بدف قوي مرة
اقول لها تعالي شوي احسه بيطلع
جات وطلت قالت شطووووورة كملي يالله اشوف شعر النونو كويس شدي حيلك بعد
وعدلت لي وضعي وتشجعني كل ماجت الطلقة ايوه احسنت شطورة كملي كويس .. وياحلاااااة كلامها وتشجيعها
<<< طبعا هذي الممرضة اللي ولدتني فديتها وربي ادعي لها كل ماتذكرتها ربي يوفقها وين ماراحت
وظليت ادفع مع كل طلقة وطول وقتهم تشجيع لي ما شاء الله على اسلوبهم ممرضات التوليد صراحة رووووعة
دفعت ودفعت وشرفت لي لطيفة ولله الحمد الساعة 2 و5 دقايق فجر يوم الأثنين 24/11/1431هـ 1/11/2010م
بس صارت معي بعض العوائق بولادتي ولله الحمد تم التصرف معها ومعالجتها بنجاح
جاني نزيف شديد بس الحمدلله تصرفوا معه وجابوا لي الإستشاري وتدخل
وتعذبت بعد مع الجراحة والخياطة .. وربي مووووووووت تأذيت منها وتألمت أكثر من ألم الطلق والولادة
.. أخيرا لله الحمد والمنة على كل شي ويشهد علي ربي دعيت لكل محروم ربي يرزقه بالذرية الصالحة ولا يقطع أحد من هالنعمة الحلوة ويخلي لنا ماعطانا ..
الكاااادي33 @alkaaaady33
عضوة نشيطة
يلزم عليك تسجيل الدخول أولًا لكتابة تعليق.
الصفحة الأخيرة
مبروك ما جبتي
بس وش سبب النزيف؟؟؟