قصة ولادتي بولي العهد

سلام عليكم ...
شخباركم كروشات وأمهات ...
بعد طول غيبة رجعت لكم بقصة ولادتي بأحلى ولد .... بس عاد انا ما قطعت اخبار المنتدى كنت على طول ادخل المنتدى واشوف اخباركم بس ما كنت اشارك لاني كنت في النفاس وكان النت مقطوع عندي وأول ما شغلته حبيت اسأل عنكم وبشركم بولادتي بولي العهد واروي لكم قصة ولادتي ...

بعد الصلاة على النبي وآله الطيبين واصحابه الخيرين

هذا الله يسلمكم انا من دخلت الشهر التاسع وانا كل يوم امشي مع زوجي مدة نصف ساعة واشرب زعفران منقوع وفي تاريخ 21/9/2010 مدري ويش حصل لي ماشفت نفسي إلا خاطري في سمك مشوي في العشاء وحققت لي امي الله يخليها لي امنيتي وبعد ما رجعت من المشي اخذت السمك واكلته وشربت عصير ما ادري حسيت نفسي تعبانه وكأن نسبة السكر ارتفعت علي خاصة اني كنت اعاني منه في فترة الحمل فقلت الى زوجي قوم نروح نمشي مرة ثانية عشان لو السكر مرتفع ينزل زوجي ما رضا وقال لا توسوسين لا ارتفع ولا شي هذا من كثر تفكيرج فيه ... المهم قعدت امشي في الشقة ساعة اخفف السرعة وساعة اسرع الى حد ما تعبت ... ونمت ساعة إلا الألم مدري من وين يجي لي في البطن الظهر ماني قادرة احدد من وين يبدأ (( طبعاً والحبيب نايم )) صار اجيني الألم مل نصف ساعة اطورت الحالة الى كل ربع ساعة بعدين كل خمس دقايق دخلت الحمام وانتو بالكرامة إلا اشوف دم خفيف وكل ما يجي الألم ينزل معاه ماء مدري هذا ماء الجنين او يتهيأ لي واستمر معاي الألم الى الصبح واحاول ما اقعد زوجي لانه كان نايم تعبان على قلبي وكنت كل ما تجيني الطلقة احاول ما اصرخ عشان ما يقعد .. لاحد ما استنفذت طاقتي ما قدرت اتحمل قومت زوجي من النوم الساعة خمس الصبح عشان يوديني المستشفى .. قال ها ولادة قلت شكل جذي يالله قوم نروح قال تعالي تبين تولدين بسرعة قلت اكيد قال تعالي أنام شوي (( يعني انتو اكيد عارفين شنو )) الربع يقولون ان هذا الشي يسهل الولادة قلت صدق انك رايق قوم ورحت المستشفى وصلت خلال 5 دقايق لان قريب من البيت
ومن هنا بدأت معي قصة الرعب .. اول ما دخلت هناك هندية بغت تفحص لي كم سانتي طبعاً انا كنت خايفة من كثر ما اسمع انه يألم خاصة اني بكرية ويالله رضيت فحصت لي وكان 1 سانتي بس قالوا لي تبين تنويم لحد الولادة لو بترجعين البيت وبعدين ترجعين قلت لا برجع البيت سألت زوجي قال ظلي بالمستشفى احسن لو حصل اي شي لا سمح الله اتكونين عندهم والله انتي ورايج اتصلت الى امي وعلمتها انه مفتوح 1 سانتي شنو رايج اظل او امشي .. المسكينة امي الله يجازيها كل خير بتصالي ما شافت نفسها الى ألم في بطنها وصادها حتى اسهال من الخوف ..
المهم نرجع الى القصة .. قررت اضل ودخلوني غرفة الولادة وكانت المشرفة على حالتي بحرينية طيوبة كل شوي وقالت لي الله يتمم لج على خير وتقومين بالسلامة وتجي تمسح على ايدي قالت ألحين اعطيج حقنة شرجية عشان يتنظف البطن وفعلاً .. وبعد ساعة قالت لي بعطيج ابرة عشان تفتح الرحم بسرعة وصارت تعطيني اياها في المغذي ويش الآلم ألي شفته شفت الموت بعيوني كان كل ساعة يفتح عندي الرحم سانتي واحد يعني اتصوروا طلق وكل ساعة سانتي بس وكل ما اسمعها تقول بس زيادة سانتي اقعد اصيح زيادة اقول هذا ما وصل 10 والآلم جذي الى حد الساعة 2 الظهر قالت 4 سانتي وانا في حالة يرثى منها وكل شوي تجي ممرضة تفحص كم سانتي .. الى حد ما وصلت حدي عاد وكنت اصرخ من قمة راسي وادعي الى امي الله يجازيها كل خير والى زوجي كان كل همي اموت ولا اشوف امي وزوجي والبيبي .. جابت لي الممرضة أكسجين قالت كل ما حسيتي باللآلم شميه .. وكان الطلق اكثر شي في الظهر ذبحني .. وعلى حدود الساعة 3وربع بدء البيبي يفتر ويستعد للخروج وفعلاً بحدود الساعة 3 و36 دقيقة عصراً بتاريخ 22/9/2010طلع البيبي لكن وا عليه ما كان يصيح اخذوه ينظفونه وجابوا لي والدكتورة تخيط لي وكان ألم قوي واشعر بكل ابرة ... بعدها اخذوني لغرفة الملاحظة نصف ساعة وطلعوني الى اهلي اول ما شفت امي بكيت وقمت ابوس فيها واقول الله يجازيج كل خير بغيت اموت يا يما وهي بعد تبكي وياي وبوستني اختي واخوي واخت زوجي ووصلت الى الحبيب زوجي قمت احضنه وابوس فيه بغير شعور وهو بعد يبوس ويبكي و الى الآن اذا اتذكر الموقف وكيف بوست في زوجي قدام اخوي اموت من الفشيلة وبعد يومين طلعت من المستشفى ...

والآن ولدي عمره 3 شهور و13 يوم

وهذي قصتي وسلامت قلبكم ... والله يقوم كل وحدة حامل بالسلامة ويرزق المحرومين