~ جريدة ~
في كل صباح .. تحمل العالم يديني
أخبار .. مآسي .. حروب
أقرأها في طي الجريدة
قهوتي سادة
والجريدة .. أخبارها زيادة
في الزاوية آخر خبر ..
واحد في الانعاش ..والثاني انتحر ..!
وجنبه اعلان :
الليلة حفلة يحييها فنان !!
وفوقهم مجرم على كتفه حمامة ..
قالوا: ذا " صانع سلام "
بعدها بصفحات .. صورة مدينة
و مباني حزينة ..
وحشية و دمار ..
ياحلوها الاخبار ..!!
قهوتي سادة ..
والجريدة اخبارها زيادة ..
إعلان : ضاعت كلبة فلان .. واللي يلقاها له جائزة مليون
إعلان : ملايين البشر من جوعهم يشكون .. !
حادث: في تمام الساعة الفاجعة من منتصف الويل .. حادث اغتصاب .. طفلة يعتدي على عرضها شاب ..
و القهر .. ماتعدت من عمرها الاعوام ..
و الحكم .. عشرين عام.. وبالتمام ..
بين قوسين.." كلها سنتين وياخذ افراج"
حسن سيرة و سلوك ..!
قهوتي سادرة ..
و الجريدة .. اخبارها زيادة ..
وبعدها صفحة ملونة ..
وحدة قرعة .. ماتدري ليش ..
كأنها واحد داخل الجيش ..
و الثانية شتان .. شعرها واقف طويل ..
تحسب انه مهرجان ..
و فوضة مابعدها فوضة ..
ولما تمعنت و قريت .. عرفت انها الموضة ..
أبراج .. قلت أنا بقرا الابراج
يمكن ألقى لي خبر .. يطيب الخاطر ويعدل لي المزاج
العقرب : انت مريض و جايز تموت ..
كذبت احساسي .. وقلت في نفسي ..
اكيد انا ناسية ... مو هذا برجي ..
اكيد ذا برج العدو .. قلت انا بقرأ " الدلو "
قهوتي سادة .. والجريدة .. اخبارها زيادة ..
...
..
طبقت الجريدة مثل ماكانت .. وقعدت ادور ..
وين الذي باعها وين ؟!
ولما لقيته ... رجعت الجريدة
!!
