قولولي كيف ارد عليهم والا اطنشهم والا ايش بالظبط

السلام عليكم

شخباركم

بنات طلبتكم طلبه لاقوا لي حل ترى طفشت من تلميحاتهم واحيانا تصريحات

السالفه انا انخطب كثير بس الله ماكتب نصيب مدري ليش :06:

الحمد لله على كل حال بس اللي يخطبوني انا مااوافق او اهلي مايوافقون

او انهم مايرجعون <<<<< واحد بس اهله شافوني وانحاشوا

المهم اللي اهلي موافقين عليهم وانا رفضت اهلي كانوا مصرين اني اوافق بالتحديد امي

اوانا اللي بعيش معه مو اهلي اشوفه مره مــــــــــــــــــــــره مو مناسب لي وان اللي اهلي رفضوهم افضل منهم بكثير

بس الحين هم خطبوا وملكو وقريب في الصيفيه زواجهم

طبعا في ملكتهم تلميحات مالها داعي من اهله ومن اهلي يعني شوفيهم تزوجوا وانتي مكانك محد بياخذك

اخته تقول انتي من تبغين قولي لي شروطك خليني افهم بالله من بتاخذين

وامه كل ماشافتني تجلس تمدح بولدها مع انه خلاص انتهى ملك بس تفكرني بندم والا ايش ماادري

واخت الثاني تقول كان تزوجتي وصار عندك زي ماعند الحريم بتريقه <<< حامله همي شكلها

وام واحد ثالث لاشافتني قامت تدعي متى اشوف فلان عريس متى افرح فيه وتتنهد هالكلام قدامي

وامي تقول من بياخذك الملك والا الوزير ومره كان فيه برنامج يتكلم عن فارس احلام البنات

وامي تقول بسخريه ايييييييييييه فارس احلامها وانا ماطالعتها لاني ادري انها تقصدني اصلا مافيه احد عندها الا انا

<<<<<<<<< ليش مو من حقي يصير لي فارس احلام

وطبعا غير يوم ملكوا تقولي ملكة فلان يوم الثلاثاء دريتي

قلت انا لااااااا مادريت قالت اخته ماقالت لك قلت لا مااتصلت علي وتطالع بنظرات :D

النظرات نفس الصوره ترى

وكل شوي تسالني بتحضري الملكه والا لا

وانا اعيد واكرر ايه بروح ماصدقت الا لما نزلت السوق اجيب لي ملابس للملكه

وبعد الملكه تعالي شوفي كيف امي واخواتي يتكلمون عنه كأنه مهند اخواته علموه كم حركه يسويها وربي تقليد لواحد

ملك قبله حركاته مره حلوه مع زوجته

كيف يمسك يدينها ويقرب منها ويتلزق فيها ويمسك شعرها الخ

قالوا ندمانه عليه بعد تموت ندم شفتي كيف يسوي معها كانت بتعيش في الجنه لو تزوجته

مع اني والله استخرت وبعد الاستخاره كرهته اكثر

والحين زواجهم بالصيفيه ونفس الشي بيتكرر من تلميحات وتصريحات ومسخره واستهزاء والخ

وربي وربي ماني مفكره في اولادهم والا هامني ولاداخلين مزاجي نهائيا يتزوجون والا مايتزوجون

بس ليش يلمحون لاشياء مافكرت فيها ولا هامتني الا يبوني اندم بالقوه عليهم نظراتهم وكلامهم يقهر

الا تتزوجينهم والا محد بياخذك محد بيطالع وجهك وبتعنسين انا مدري ليش خطبوني من الاساس

بما ان محد بيتزوجني نهائيا من وجهة نظرهم

انا الان مدري اطنشهم والا اقول لهم بلاش هالتلميحات والا ايش بالظبط

عطوني رد مسكت مسسسسسكت :32: