كسرني

تحملو فضفضتي


بعد ماضربني بعدها بكم يوم جا يدور مشكله يسأل عن اشياء قديمه ولما قلت له انا ما اعرف شي ورجاء خلني وحدي قال لي احمدي ربك ماكسرت عظمك ورميته للكلاب
ساكته عنه وهو يقول كلام كثير شتيمه فيني ويقول ما اطيقك
قلت له انا ماعاد ابغاك بعد ماضربتني ياتطلقني ياتتركني لورعاني غير كذا ارحمني انت انسان منت طايقني مثل ماتقول اتركني طيب ابعد عني اعتبرني ميته وش تبي بانسانه منت طايقها
قال كذا اتهزأ بحالك وانا جالسه ارتب دولاب ورعاني
قال كلمه مثل السهم صابت قلبي قال يلعن اليوم اللي تزوجتك فيه منتي حلمي منتي مثل باقي الحريم


مدري وش يقصد وش فيه اني ماني مثل باقي الحريم
والله الذي لا اله الا هو اني اصغر وانظف واجمل ولا اعرف اجرح احد وبحالي ولا احب المشاكل


بنفس اليوم زارني ابوه وجلس ينصحني المراه مايصير صوتها عالي المراه اذا ضربت زوجها ماعاد يبغاها ويحق له يتزوج
انكتمت وضاق فيني المجلس قلت ياعم من اللي تضرب زوجها مين اللي تقدر على رجال حسيته يغير الموضوع ويعطي نصايح المراه ماتهجر زوجها


عرفت زوجي مكذب على ابوه يبغا ابوه يصير واقف معه وقالب كل الموضوع وكل شي سواه فيني حطني انا مسويته فيه
ابو زوجي يقول لي اللي تسب ابو زوجها اكيد زوجها بيسب ابوها واحنا ناس طيبين نمشي مع العالم مانحط بالخواطر


قلت ياعم انت فاهم غلط وحلفت بالله اني ماقلت ذا الكلام وزوجي هو اللي قال وضربني


رفض يصدقني يقول ماضربك الا لسبب قلت فعلا لسبب والسبب انه هاجرني ولا يبغاني وجيت اعرف ليه يعاملني كذا واتفاهم معه وضربني


رفض يصدق قلت ولدك يسولف مع نسوان وبرامج وعلاقات
ابوه مارضا عليه ورفع العصا بوجهي قال اكسر خشمك ان حكيتي كذا على ابو فلان ( يقصد زوجي )


قلت اشتكيكم لله


وجلس يصارخ ويرفع صوته يقول منتي متربيه بخليه يرميك للكلاب الضاله ياضاله


وقال هو قالي بعرس وبختارها انا انتم ربطتوني بذي لاتحسبين جبتي ورعان صرتي شيخه علينا الشيخه لنا يوم عطيناك ولدنا


قلت منكم لله هذا اللي اقوله
شوي ويضربني عشان قلت عن خرابيط ولده
تعبانه ماهم تاركيني بحالي ولا هم راحميني
مدري كيف التفاهم معهم
تقولون لي وين اهلك كلميهم علميهم
اهلي يقولون تجين لحالك براسك ورعان هالعايله مانبغاهم
( اهلي طاردين ورعاني يقولون ورعان عايلة فلان مانبغاهم والسبب عمي اخ والدي طلق بنت من عايلتهم مو اختهم بس من نفس العايله وصاير بينهم مشاكل الرجال )
ومتفضلين علي ان ولدهم ماطلقني مثل ما سوا عمي اخ والدي وانا ما اتحمل اعيش من دون ورعاني ليله واحده


بين نار زوجي واهلي
مشتاقه لامي ابكي على صدرها وتثلج قلبي بدعاها