كل ماتذكرت ولادتي ابكي الحمدلله من قبل ومن بعد

 مرحبا حوائياات
قصة ولادتي قبل شهر




محدثتكم بكريه عوشرت وحامت كبدي من الحمل ابي اولد باي طريقه خبركم الشهر التاسع وش طوله وعرضه وثقله
مشاوير عالمستشفى بالفاضي ونفس الكلام الرحم مافتح بس نص سانتي
وكل الخلطات شربت وكل الطرق جربت
والرحم راكب راسه ماتغير عن نص سم
اخر شي قالوا المستشفى انتي مفوته وفي خطر عالجنين راح نعطيك صناعي عشان تولدين ماصدقت خبر انبسطت اني بولد (لاني ماكنت ادري وش الطلق الصناعي) بس لازم تنتظرين لين الصباح لين يجي الاستشاري يوقع
من الوناسه قلت ننتظر لبكره وش ورانا انتظرت تسعه شهور
واقعد هذيك الليله ضحك وكركره انا وخويتي اللي معي بنفس الغرفه واصوات ضحكنا لاخر السيب ويوم يجي اليوم الثاني ويجي الاستشاري ويوقعوني على الطلق الصناعي واوقع وانا كأني اوقع عقد اللي طايحه على غنيمه
قالوا بعد الغدا كنهم دارين انها اخر وجبه باكلها وانا بقلبي اقول ياربيه مصخوها ابي اخلص 
وجا وقت التحميله الاولى وكان الشعور طبيعي بعدها نمت عادي
وجا وقت الثانيه اخذتها وجيت بنام حسيت بالالام كني قاعده على جمر حاولت انام وين انا والنوم وين
وكل شوي يجون يقيسون الرحم
اخيرا فتح نص ثاني وصار واحد سم 
وحطوا التحميله الثالثه
والى اليوم الثاني الرحم ماتعدى الواحد سم
وانا خلاص وصلت الى مرحلة الهستيريا من الالم اقولهم قيصري قالوا لازم الاستشاري
ويجي الاستشاري يتفلسف على راسي المهم قال حالتك ماتستدعي قيصري الطبيعي افضل والقيصري له مضاعفات بس خلي الدكتوره تشوف لك كم فتح الرحم
وتجي الدكتوره تقيس وبنفس الوقت تسوي تحريض هي حطت يدها وفرت وافتر راسي معها وانهبل
وانط وفحط وافكر شلون اشق بطني هبلني الصناعي قالوا الحين موعد التحميله الرابعه
عاد هنا توحشت قالت برا
قالوا نحط تخطيط البيبي قلت برا
قالوا نشوف الرحم قالت برا
واقعد ادور في الغرفه والطلق زي النار وامسك اسفل ظهري ورحمي الم لايوصف شي من الجنون
قالوا وقعي ان اي شي يصير للبيبي على مسؤوليتك وقعت وقلت اطلعوا برا
اكلم اختي بما ان زوجي مو بنفس الديره
وقلت تعالي طلعيني بروح خاص انا لازم اولد الحين باي شكل بموت
وتجي اختي تركض واكلم صديقتي قلت لها رتبي الوضع في مستشفى خاص الحين بنجي يولدوني قيصري
ولكن المستشفى اللي انا فيه رفض يطلعني وقعدت اختي تحاول فيهم لكن قالوا فيه خطر عليها يمكن تولد بالطريق
ويوم جت اختي تقول لي انهم رفضوا يطلعوني
بعز الالم والتعصر جاني غضب قلت ابنزل اتهاوش معهم ولكن الالم ماخلاني اقوم من مكاني انتظرت يخف الالم عشان انزل لهم كانت اختي وقتها تدلك ظهري وتقرا علي
شوي اسمع صوت شي قال بق
واحس بدفااااا تحت
قلت لاختي في شي في تحت المويه نزلت
جات الممرضه تركض ولاده ولاده
قلت هاه ولاده يالله يالله وانا في حال يرثى لها
كانت الساعه 4 العصر وكان وقت نزول المويا الرحم فتح4 سم
حسبت اني بولد بنفس الوقت
دخلت غرفة الولاده ويصبرون علي وانا اتألم واتلوى مسكنات ماسوت شي ولا عطوني ابرة ظهر ولا عندي خلفيه عن هالامور اول مره
الى ان وصلت الساعه 9 وعليها
وصل الى 6 سم
وانا اتالم واون مادري وين حطوا لي ابرة الصناعي 
ويزيد الطلق
كان لما تجي الطلقه يقولون ادفعي انا ماكنت اعرف شلون ادفع كانوا يقولون كأنك بتتبرزين
وادفع وانا مافيني حيل يومين بالطلق ولا اكل ولا نوم ولكن الله ساعدني لين طلعت بنتي نور عيوني
اول ماطلعت من بطني فجأه اختفت كل الالام 
اول ماطلعوها حطوها على حظني خفت شوي بس سبحان ما يقذف الرحمه بقلب الام على طول حنيت
من وقتها تغيرت حياتي ونظرتي للحياه
وقت الم الطلق كنت اشوف ان الاستشاري قاسي وظلمني لما رفض القيصريه
واشوف الممرضات مايخافون الله
لكن الان ادعي لهم الله يوفقهم والحمدلله اني ولدت طبيعي ربط اختار لي الخير 
والالم مازادني الا حب لبنتي