كيف أنظم وقتي برمضان

السلام عليكم ورحمة الله وبركاته
الله يلحقنا شهر رمضان لافاقدين ولامفقودين ويحفظ لنا أهلنا
بنات برمضان أتعب أتعب أتعب أصل لمرحلة أحس إني هلكانة ودايم معصبة بسبب الشغل ياناس أنا متى أتعبد الله؟وصلت لمرحلة مرات ماقدر أنام أشتغل أشتغل ثم نمت عن الفطور وقامت أمي تهاوش تقول حرام تنامين عن الفطور طيب أنا أنام من التعب وأضطر مرات أواصل حتى أفطر ثم نمت وإذا قمت ألقى البيت محيوس المشكلة الكبيرة إذا تلخبط نومي تعالوا عاد شوفوا متى أنام ومتى أشتغل ومتى أفطر ومتى أتعبد تصدقوووووون صار لي كذا رمضان زين بس إني أصلي الصلوات الخمس وأصوم حتى مرات أقرأ قراءة وأسمع أمي تنادي تبي أشتغل مر علي كذا رمضان ماختمت قرآن




لو بس حنا وأخواني ماصار البيت كذا حوسة وكانت حوسة أهلي خفيفة بس أخوي الكبير بلانا ربي فيه يجمع الرياجيل إلي يعرفهم ويعزمهم عندنا مرات يجمع رياجيل كثثثثثير ومرات يحصل رجالين يعرفهم ويجي ساحبهم وياربي أنقذنا ومرات يجيب رياجيل ويجيب زوجته وعياله وزوجته طبعا ضيفة وعيالها يحوسون وإذا ماجاب رياجيل جاب زوجته ليلي ليلي نادرا نادرا تقعد تفطر ببيتها وهي إذا خلصت فطور مسحت يدها وراحت تصلي التراويح وأنا أكرف بإلي عقبهم وحوستها هي وأخوي أخوي وصلت فيه المواصيل مرات يدق على رياجيل يجون يفطرون عنده ويرفضون الرياجيل وأنا أرفع يديني لسما وأدعي للي رفضوا إنهم يجونا تخيلوا وصلت فيني المواصيل أدعي لناس من قلبي إذا رفضوا عزيمتنا من التعب يابنات من التعب وياليت مع هالتعب يكون البيت نظيف لا دايم حوسة ووسخ لا أني إلي تعبدت الله بضمير ولا أني إلي نظفت البيت والا أني نمت براحة وصرت أحسب متى يخلص رمضان من بداية رمضان لاتلوموني ودي أصلي وأتعبد الله وأدعي وأصوم وأفطر وأنا متهنية وأدعي لحظة فطوري حتى تلفزيون ماتابعه ولا أبي أتابعه ولاهو أكبر همي بس أخوي حرمني من كل هذا الله يحفظه ويهديه أقولكم مرة جهزنا سفرتنا أنا وأمي وأخواني بالمطبخ كنا نبي نآكل بالمطبخ يوم قرب الآذان الا زوجة أخوي ترد السلام بالصالة بغيييييييييت أموت ونروح نحط سفرتين سفرة بالصالة وسفرة لآخواني أنا أتمنى إن زوجة أخوي أو أي أحد يقرب لها إنهم يدخلون هالمنتدى وهالقسم وموضوعي بالذات ويعرفون إن الناس تتعب وتهلك برمضان ياليت تجينا ع الأقل ع الأقل مرة بالأسبوع




وأدري بتجي وحدة تقول قولي لأخوك لايجي أحب اقولكم إن أخوي شبه ماعنده عقل وأهم شي عنده يعزم مدري يبي الناس تمدحه على حسابنا ولا وش قصته وتدرون بعد إنه أغلب شي مايجيب شي من عنده أخواني الباقين وأمي يتكلفون وهو نادرا يجيب شي ومانبيه يجيب نبيه مايعزم لأنا نتعب بالتنظيف نتعب نتعب نتعب وكم مرة نقوله لاتعزم أحد مانبي أحد ويعصب ويصارخ ويطلع ويقول ماراح أجيكم وزعله مايطول يرجع ويعزم عندنا ومرات مايقول بيجيكم رياجيل بدري لا مع نهاية العصر كذا يفاجانا إن بيجينا ضيوووف تصدقون إذا زعل أخوي علينا نفرح لأنا ندري مافيه عزايم حنا نتحمل العزايم إلي بغير رمضان أوكي بس عزايم رمضان تطق نفسي يابنات تطق تطق وأحس بهم كبيييييير ومافيه حل مع أخوي مهما نقوله دايم يحطنا أمام الأمر الواقع ( اللهم إني أستغفرك من الذنب إلي سلطت به أخوي علينا)
الحين أبيكم تقولون لي وشلون أنظم وقتي مع الضغوط؟؟
متى احط وقت لنتظيف البيت؟
متى وقت النوم؟
متى وقت قراءة القرآن؟
متى غسيل المواعين؟ لأني أكون واقفة بالمطبخ من الظهر وأي شي يتوسخ من بعد أمي وأختي أغسله وأختي مطلقة و تتعب نفسي وعندها 4 عيال مبتلشة فيهم يعني مانلحق ع البيت
ساعدوني على تنظيم وقتي مع كل هالظروف إلي قلت لكم عنها وحنا ماعندنا خدامه ولانقدر نجيب الخدم برمضان على خمس آلآف<< راتب موظف