كيف اعرف اذا زوجي يحبني والا لا ؟؟؟؟؟؟

السلام عليكم


الله يهدي وحدة من البنات هنا ارسلت لي رساله خاصة تقول فيها ان زوجي شكله يحب وحدة ثانية عشان كذا ما يبي اطفال مني وانه ما يبغى يظلمني وممكن انه يطلقني .

رسالتها هذي في بالي وصرت اهوجس وبديت اشك ان زوجي يحب وحدة ثانية لان من تزوجنا وتصرفاته غريبة
يعني في اشياء تخليني اشك انه يحب وحدة ثانية اولها من تزوجنا ما حسيت بشهر العسل اللي اسمع عنه قصدي انه ما مشاني ولا حسسني اني عروسه وفرحان فيه وثاني شي انه اغلب اوقاته اشوفه حزين وانا ما اعرف ليه رغم انه ما قاصره شي ابد والشي اللي يشكك اكثر انه شاعر ومستحيل يخليني اقرا شعره وهو عنده دفاتر يقفل عليها بدرج ومخبي عني المفتاح واذا قلت ابقرا شعرك يقول لا ما احب احد يقرأ خواطري .
وزيادة على كذا هو وسيم مرة وهذا بعد يقهرني بس انا احلى منه بس هو ابد مو نعومي . وفوق هذا ما يبي اطفال الا بعد خمس سنوات ولا تقولون مريض او عقيم بالعكس انا وهو سوينا فحوصات وطلعنا سليمين .

ونفس الشي تجيني هواجيس واقول في نفسي اكيد انه يحبني والا ليه في بدايه زواجنا جابلي قفاز وما يبي احد يشوف كفوفي رغم اني قبل لا اتزوج وانا ولله الحمد عبايتي على الراس بس ما كنت البس قفاز .
وبرضه هو غيور علي من اخواني ويمنعني البس بنطلون او قصير قدامهم لانه مره هزئني في بدايه زواجنا عشان ذالشي . ونفس الشي بعد كل زواج احضره يتحلفني اني ما رقصت .

الحين انا محتارة هو يحبني والا لا
وكيف اعرف انه يحب وحدة ثانية . لانه دايم محزن وعاطفي بس تعامله معي متقلب يعني مزاجه غريب مرة وربي الحين لنا اكثر من سنة متزوجين الا اني ما فهمته .
تعرفون يوم تحسون انفسكم مراقبين انا زي كذا معه دايم يسوي لي اختبارات وانا ما افهم قصده الا بالاخير وانا على نيتي وهو قصده يشوف تفكيري ويبغى يعرف اللي بقلبي وانا عاجزة افهم اي شي منه مرة مرة .