كيف التعامل مع هالاشكال

السلام عليكم


حابة أسألكم لأن ماعندي خبرة بهالموضوع كيف اتعامل مع هالاشكال ( الحريم اللي عيالهم يضربون ويوصخون وماتتكلف تقوم تلاحقه) او عالاقل تقول عيب او تتأسف


انا صارلي كم موقف وحدة من الحريم نجتمع شبه أسبوعيا مع بعض لاني ازور امها للقرابة وهي تكون موجودة وعيالها اللهم ياكافي شقيين يناقزون وبالفناجيل يحذفون انتظر متى يجيني الفنجال على راسي القعدة كلها رعب والبيبي منهم يصيح ساعه بدون مبالغة وماتتكلف تقوم تسكته او تحاول تعطيه شي او تطلع برا المكان لين يهدا تصير قعدتنا انا وامها كلها عالصامت مانقدر نتكلم من ازعاجهم كل هذا يهون
الا ان واحد من عيالها كم مره يمد يده علي واخر مره مدها وانا توني مسوية قيصرية مالي ثلاث شهور هبدني على ظهري وانا غافلة ابدل لولدي مرتين ورب البيت حسيت انها ضربة رجالل يده قوووووووووية قووووية وهو متعافي عمره خمس سنين وهي والله انها بدون مبالغة تتقهوى ولا كنها تشوف ولا تسمع الوضع بالعكس شكيت انها مرسلته لانه ورا ظهري هي وولدها وحتى وربي بدون مبالغة ما قالت عيب ولا تأسفت ولا كنه صار شي وقعدت يومين ظهري يألمني وعمليتي توجعني بس بلعتها عشان خاطر القرابة وما ابي اسوي مشاكل
والمشكلة حتى ولدي عمره سنه ماسلم ذاك اليوم ضربوه كف على غفلة مني ويوم بكي قالو دلوع الكف خفيف!!!
الصدمة ان امها تربيهم عالعنف وهي تشجع العدوانية فيهم هذاك اليوم عشان خالته نهته عن فعل وقرصته قامت قدامي ما استحت تحرج اختها حرمه شكبرها جلست تهاوشها ومسكت ولدها قالت اضربها زي ماضربتك وصار يجر بشعرها ويمخش فيها ويضرب كفوف وهي مبسوطة انه خذا حقه بهالطريقة!! وقدام الناس ما استحت


انا ماهموني احرجتها او لا لانهم يعبدونها من كثر حبهم لها ولعيالها رغم انهم يصبحونهم بكف ويمسونهم بكف لدرجة ان جدته كل زيارة فيها اثار حفيدها يا عضه يا قرصة يا كدمة وتقول من الحب والشوق يسوي فيني كذا 🙂🙂🙂 يعني كل البيت راضي تمام الرضى عن تربية البزارين ووالله شوف عيني اذا ضربهم يقولون يا لبيه او فديتك او ياحبيبي ويضمونه بدال مايمسكون يده عن الكفوف او يفكون شعرهم لا يخلونهم يكملون ضربهم قدام الحريم مادري ليه هالضعف


والله ان عيالها انهم يضربون وهم حتى مامشو عدل من كثر ماهي عادة عندهم ماخذينها
انا قلت هالتفاصيل عشان تعرفون موقفي بالوضع واني كيف اعدل واعالج فيه بهالوضع الصعب


واهم شي كيف ادافع عن نفسي وعن ولدي وافتك من اذاهم لنا