حسيت ولمست في بعض الآنسات الانطفاء وعايشه
حياتها عشان الواجبات والمسؤوليات😓
ماعندها شيء اسمه نفسي لها حق علي استنانس واروق لاا مافيه الا ضغط نفسي وقالبه خلقتها طول اليوم🙁.
________________________
اليوم جايبه لك افكار واشياء يمكن ماتجلسين عليها الا ١ ساعه او اذا استانستي مره ساعتين وبتقلب نفسيتك وبتنصدمين😌.
________________________
اول شيء اطلبه منك انك تغيرين فكرتك عن واقعك
بعض الآنسات في بالها انها بتعيش حياتها كلها بالمطبخ ومارح تسوي رياضه ولا رح تهتم ببشرتها وشعرها .
والي يجلس معها يحس بالسلبيه ،عن نفسي اسمع في المجالس الي اكون فيها كلام سلبي جداً واحاول اطلع من هالمجلس او اغير هالفكره اذا كان فيه مجال .
لان ماودي ان سوء الظن بالله تعالى و الطاقه السلبيه تدخل قلبي وروحي ✋🏻،الوحده اذا ماتفائلت واسعدت نفسها منتظره ايش؟ ، اصلا الضيقه تجيب التجاعيد يعني لا انتي الي اهتميتي ولا انتي الي وقيتي نفسك من اسباب علامات تقدم السن✋🏻.
🩰:غيري فكرتك🎯.
____________________
النقطه الثانيه لازم يكون عندك باليوم محطات راحه
💗.
مستحيييل اصدق ان الشغل طول اليوم حبيبتي يومك عباره عن ٢٥٪ شغل و ٧٥٪ عالجوال .
الشيء الي يحسسك انك مشغوله هو (انشغالك عن نفسك وسعادتك🎯).
مو مصدقه كلامي ؟ راقبي يومك شوفي وش الاشياء الي تسوينها انا مااقول ان ماعندك شغل بس اقول حياتك مو كلها شغل✋🏻❤️.
واذا انتي تعانين اصلاً في موضوع الاعمال المنزليه انجزيها اول ب أول وشوفي تتعبين ولالا.
🩰:مراقبة اليوم وفهم طبيعة الاعمال .
______________________
النقطه الثالثه 🌧، محطاتك هي راح تكون كالتالي:
(١) المحطه الاولى: بعد صلاة الفجر :قراءة قرآن (إن قرآن الفجر كان مشهودا) وبعدها اقرئي اذكارك وروحي سوي لك قهوه وكلي معها شيء خفيف❤️.
(٢) المحطه الثانيه: بعد صلاة الظهر :سوي هوايه معينه تحبينها 🌧🧚♀️.
(٣) المحطه الثالثه :قبل المغرب ب ساعه واحده: مارسي الرياضه او اشربي عصير مفيد لجسمك.
(٤) المحطه الرابعه :بعد صلاة المغرب :اشربي قهوه مع مكسرات مع تشوكلت خلي هذي قهوتك الخاصه فيك واجلسي فكري بحياتك وانك تبين تهتمين ب نفسك يعني خاطبي ذاتك💗.
(٥)المحطه الخامسه:ساعه انتي الي تحددين متى: تخصصين ساعه من يومك للعباده اما دعاء او قرآن كريم وغيره💗.
-----عيشي حياتك------
مو عيب ابداً تشترين شيء الناس تقول مو مناسب لعمرك دامه مو حرام ان شاءالله لو هي لعبه! .
مو عيب ابداً تسمحين لنفسك انك تستانسين وتنبسطين
خليك مجنونه وطفله صغيره ومحبه للحياه بحدود الشرع والدين.
🩰انا ماتقيدني عادات وتقاليد✋🏻💗
ولا يقيدني انه ممكن الناس تقول عني كذا او كذا
مايقيدني الا قال الله وقال الرسول صل الله عليه وسلم❤️.
لان الناس لو بنزل لهم من الجنه قالوا وش نزلها من الجنه وش تبي بالارض مارح يتركون شيء❤️.
قاعدة حياة آنستازيا والي اتمنى تكون قاعدتكم كلكم❤️.
انا حدودي هي قال الله تعالى وقال النبي صل الله عليه وسلم ❤️
نعم صحيح بعض العادات والتقاليد تأمرنا بما يأمرنا به الدين
ولكن مقصدي اكفري ب (العيب ) وآمني ب (الحرام)
ولاتهتمين في كلام احد يجرحك الا اذا كان نقد بنّاء❤️.
-انستازيا🩰.
