انا عملت النهاردة كيكة التفاح
جبت الطريقة بتاعتها من ع النت
سهلة جدا جدا جدا
ومابتاخدش أى وقت خالص
المقادير
بيضة واحدة بس
كيس فانيلا
1/2 كوب سكرة بودرة
1/3 كوب زيت
ملعقة سمن بلدي
(لأني بموت في السمن البلدي ومااقدرش اعمل الكيكة من غيرها مابيبقاش ليها طعم)
ملعقة صغيرة قرفة
ملعقة صغيرة مليانة بيكنج باودر
تفاحة ونصف مبشورة
وطبعاً الدقيق كباية واحدة بس
الطريقة
اضربي البيضة مع السكر والفانيلا والقرفة كويس جدا
وبعدين هاتي التفاح
ابشرية
وقلبيه كويس مع البيض والسكر والفانيلا
بعد كده هاتي الدقيق وانخليه مع البيكنج باودر
نزلي عليه الخليط السابق
وقلبيه كويس جدا بمعلقة خشبية
بعد كده هاتي القالب
وادهنيه سمنة ودقيق
بعد كده صبي الخليط
طبعا تكوني مشغلة الفرن من قبل ما تبدئي في عمل الكيك
دخليها الفرن على درجة حرارة متوسطة
هتعد معاكي تقريبا من 1/4 ساعة لـ 1/3 ساعة بالكتير
عموما ريحتها الحلوة هتطلع طبعا
وهتعرفي انها استوت
هتلاقيها احمرت
وهنا بعد ما طلعت من الفرن
سيبيها تبرد وبعد كده اقلبيها
وابدئي الشغل
يتبع
انا هنا دهنتها بمربى التين
بيكون طعمها روعة مع القرفة
بعد كده قصيت ورق زبدة على شكل تفاحات وحطيتهم فوق المربى
بعد كده انا رشيت جوز هند
بعد كده نفضت عنها جوز الهند
وحطيتها في طبق التقديم
وشلت ورق الزبدة
وده شكلها النهائي
ايه رأيكم بقااااااااااااااااااااا
أظن مفيش شرح بالتفصيل أكتر من كده
ياللا كل واحدة تقوم تعملها دلوقتي خالا
ودي صورة بتبين اد ايه هي هشة وطريه
على فكرة طعمها تحفة بجد
حلوة جدا جدا جدا
جربوها والله على ضمانتي
ياللا جربوها
ماتنسونيش بالدعاء انا وبناتي