لبس النقاب وكورونا 🌺

السلام عليكم ورحمة الله وبركاته ..
كيفكم جميعاً أتمنى تكونون بخير وعافيه .. حابه أتكلم عن موضوع مهم ولاحظته بكل مكان سواء مستشفيات أو الشارع أو غيره وهو إن الحريم معتبرين النقاب يحل محل الماسك ويحمي بعد الله من المرض وهذا خطأ النقاب مفتوح من تحت ونوعية القماش اللي مصنوع منه مايمنع الفيروسات إنها توصل لك ولاحظت عندنا في المستشفى الحريم بالعيادات داخلين بنقاباتهم فقط ويسولفون مع بعض بدون تباعد وهذا اللي يفسر ازدياد عدد الحوامل اللي يصابون بالمرض وتقول أنا ببيتي ما أطلع ولا أزور أحد وهي بالعياده تلمس كل شي وتسولف مع كل اللي حولها ولابسه نقابها فقط وهذا خطأ وللأسف بعض الحوامل المصابات تسوء حالتها ويضطرون يسوولها قيصريه يطلعون الجنين حتى لو مااكتمل حتى ينقذون الأم وممكن ينقذونها وممكن لا .. لذلك حبايب قلبي البسي ماسك تحت نقابك واحرصي تتركين مسافه بينك وبين الأشخاص ومو ضروري تتعرفين على كل الحريم لما تحضرين موعدك خلصي بسرعه وعقمي يدينك بعد ماتلمسين أي شي واحرصي ماتلمسين وجهك سواء عيونك أو أنفك أو فمك حتى القلفز مايحميك اذا بتلمسين كل شي وترجعين تلمسين وجهك واذا رجعتي بيتك لا تلمسين أطفالك إلا بعد ماتشيلين عبايتك وطرحتك ونقابك وترمين الماسك وتغسلين يدينك واغسلي ملابسك ولو تاخذين شور وتبدلين ملابسك يكون أفضل .. تجنبوا الأماكن المغلقه والمزدحمة مو حرام تشربين قهوتك وتحلين بالهواء الطلق مو لازم كوفي وجلسه ومو لازم تروحين المول اطلبي أون لاين وفري جهد ووقت وأطفالك ماله داعي تاخذينهم لكل مشاويرك اذا اضطريتي خذيهم وانتبهي عليهم ولبسيهم ماسكاتهم وعلميهم مايلمسون أي شي ويلمسون وجههم وعقمي يدينهم خلوكم قد المسؤوليه والله يحفظكم جميعاً من كل شر 🌺