لكل اللى طلبوا منى طريقه المفتقه او (الحلبه المعقودة)‏

السلام عليكم ورحمه الله وبركاته



بناء على رد ليا فى احد الموضوعات عن اكتر الاكلات اللى تسبب السمنه فكان جوابى المفتقه او زى مابنقول عليها فى اسكندريه الحلبه المعقوده وجاتنى اكتر من رساله على الخاص عايزين الطريقه وانا كنت عايزه اتأكد من ماما عن طريقتها نبتدى يالا


المقادير

اثنين كيلوا عسل اسود
تمن كيلو حلبه مطحونه ناعم
معلقتين مغات مطحون ناعم
معلقتين دقيق
واحد كوب فول سودانى غير مملح او كوب مكسرات مشكله غير مملحه والافضليه للفول السودانى واللوز ويكون مكسر مش مطحون او مجروش
نص كوب زيت نباتى
عصير ليمونه مصفى
ربع كوب سمسم
ربع كوب جوز هند مبشور (حسب الرغبه)‏



الطريقه

-نسخن الزيت ونخط المكسرات لحد مالونها يبقى دهبى ونصفيهم من الزيت
-فى نفس الزيت المتبقى نحط الدقيق وعليه السمسم مع التحريك السريع لحد مالونهم يبقى دهبى
-نضيف العسل بالتدريج على الدقيق والسمسم مع التقليب السريع وبعد اضافه كل الكميه اول مايبدأ يغلى نكون خلطين المغات والحلبه مع بعض ونضيفهم على العسل بالتدريج علشان ميعملش كتلوبعد انتهاء الكميه وخلطها كويس
-نضيف عصير الليمون
-نسيبها لحد ما تغلى وتبدأ تعمل فقاقيع
-علشان نعرف استوت ولا لاء ناخد معلقه منها ونحطها فى طبق ونشوف درجه تماسكها هى فى الاصل بتكون بكثافه المربى يعنى لازم ناخد فى الاعتبار انها لما بتبرد بتتقل فى سمكها يعنى الموضوع هنا معتمد على تقديرك ليها استوت ولا لاء
- لو لقتيها وصلت للسمك اللى انتى عايزاه ضيفى عليها المكسرات وجوز الهند لو تحبى وشليها من على النار على طول

بعض الملحوظات


- انتبهى كويس لنفسك لاقدر الله ممكن تنحرقى من حراراه العسل وخاصه وهو بيغلى
-الافضل انها تترك برا التلاجه علشان العسل اللى فيه مع البروده ميتكتلش
- لما تاخدى منها تكون بمعلقه نضيفه (يعنى ماتكليش من العلبه مباشره وترجعى تحطى المعلقه فيها مكان الاكل)‏

-سبيها لما تبرد خاااالص وبعدين حطيها فى علبه او برطمان جيد الاغلاق

- انتبهى ومتسبيهاش على النار فتره اطول من اللازم علشان متجمدش منك


واخيرا يا بختكوا انكوا تقدروا تاكلوا الاكله دى لانى من عشاقها وانا مقدرش اكلها لانى فى حرب مع السمنه بقالى سنين بالله عليكم تدعولى اخلص منها

ويارب اكون افدتكم بشئ وتكون الطريقه واضحه وتجيب معاكم النتيجه اللى تتمنوها