لكل بنت عمرها مانخطبت تعالي شوفي حكايتي حيهون عليكي وضعك..... يـــــــــارب عوضني خير

السلام عليكم ورحمه الله وبركاته
انا بنت كان حلم حياتي الاستقرار والزواج وبناء الاسره والامومه ومهما حاولت اشغل نفسي وحالي بي اشياء كثيره مفيده يظل هاجس الزواج والاستقرار مايفارقني ابدا
ماراح اطول عليكم راح احكيلكم حكايتي علي طول
انا قضيت فتره المراهقه كلها من غير مااحد يتكلم عليه او يخطبني ابدا وكنت نوعا ما احس بأحساس اني مو مرغوب فيه بس ماكان الموضوع يشغل بالي ولا افكر فيه كثير لصغر سني ولي انشغالي بدراستي بااستثناء بعض نظرات احد اولاد خالتي ليه ورغم هاذا انا ماحبيته ولا تعلقت فيه
((وبالمناسبه احنا مافي بيننا اختلاط عشان ماااحد يفهمني غلط))
بس كانت نظراته تحسنني باني مرغوبه وفي احد يتمناني في ها الدنيا وكان يعطيني احساس حلو بس ما اعطيت الموضوع إي اهتمام الين مافي يوم من الأيام امه كلمت امي وقالت انها تبغاني لولدها فلان مجرد رغبه من غير مايكون فيه خطوبه رسميه طبعا انا مره فرحت رغم انو ماسار شي رسمي ومرت الأيام والشهور والسنين الين مافي يوم من الايام اتصلت علينا خالتي وقالت باركولنا خطبنا لولدنا فلان طبعا امي باركتلهم ودعتلهم بالتوفيق
انا هذا الموضوع صدمني لانو في الفتره الاخيره قبل خطبته بكم شهر كان يرسلي رسايل عالجوال وطبعا ماكنت ارد عليه بس كانت رسايله بالنسبه ليه تأكيد برغبته في الارتباط فيه وحكيت لي امي انه يراسليني وقالت لي امي لا تردي عليه رسايلو ابدا واذا كرر الموضوع بنحكي لي اخوانك وعملت بنصيحتها بس لما سمعت بخطبتو مره استغربت بس بعد فتره كنت مع خالتي بنتكلم في مواضيع عامه وحكتلي انو ابنها كان رافض الزواج من البنت اللي خطبتها الين ماسارت تحلفو برضاها عليه واخذ البنت الي اختارتها امه وانها خطبت هاذي البنت عشان امها صديقتها الروح بالروح من سنين وحبت ان يكون في بينهم نسب
فأنا قلت خيره وحضرت ملكته وزواجه واتعرفت علي حرمته ومره حبيتها لانها بصراحه انسانه طيبه وخلوقه الله يسعدهم ويوفقهم يارب
مرت فتره المراهقه ودخلت العشرينات وبدأت احس بشبح العنوسه يقرب مني وبدأت افكر بشكل جدي واسأل نفسي ايش فيه شي غلط يخلي الناس ماتفكر فيه ابدا
وصلت العشرين و21و 22و 23 الين ماوصلت 24 وفجأه جاه احد اخواني وقالي انو صاحبه فلان يبي يخطبني فرررررحت كثير واخيرا حلمي حيتحقق وبدأت افكر واحاول اشوفو من الشباك كل مايجينا واحلم بشكلو ياتري هوا يشبه مين؟ ..........الخ
وكان دايما يحكيلي لي اخويا انو بيجيب اهلو للخطبه بس مو قادر بسبب سكن خواته بعيد عن المدينه الي احنا فيها ولأن والدته متوفيه فامضطرين نستني اخواته الين مايجون ويخطبو بشكل رسمي وسكتنا عالموضوع علي هذا الاساس
وبعد سنه بالضبط جاه اخويا وقالنا فلان اتزوج
طبعا انصدمت لانو بنيت احلام كثيره علي هالشخص وكنت مستنيه اليوم الي اعلن فيه للجميع اني اتخطبت لفلان
بس انا قلت خيره برضو
وتوكلت علي الله
حكايتي الثالثه كانت وحده من صحباتي ايام الثانويه دايما تحكيلي عن اخوها فلان وانو مدرس وانو طيب وخلوق وكنت بقلبي احس انها بتلمح لشي بس قررت اني مااحلم كثير ولا اعطي الموضوع إي اهتمام الين ماتحكيلي بشكل واضح
وفعلا
اتصلت عليه بيوم من الايام وقالتي بنجي انا وامي نعملكم زياره هي وامها وماكان في بينها وبين امي إي سابق معرفه انا بدأت اشك بالموضوع انو في خطبه بس اتأكدت لما سارت تسأألني اسأله بنفس المكالمه عن اخواني واخوالي وعماني وزوج اختي ويش يشتغلو وايش اسمأهم واذا كان عندنا امراض وراثيه بالعايله ..................الخ
وسارت الزياره تاني يوم وحسيت اني عجبت الام وبس تمدح فيه قدام امي وصحبتي تمدح فيه قدام الكل وسارت تتكلم مع امي بشكل عام عن المهور واننا كم نطلب مهر بس ماخطبت بشكل رسمي وانتهت الزياره
انا استغربت وامي استغربت يعني الحكايه واضحه وواضح اني عجبتها بس ماخطبت
ونفس الشي اتكرر
بعد حوالي شهرين اتصلت صحبتي وقالتي خطبنا لي اخويا فلان انصدمت للمره الثالثه بس باركتلها واتمنيتلهم التوفيق
وحلفت علي الا ازورها في بيتها وفعلا رحت لها زياره وصارت تحكيلي إن خطيبه اخوها ابوها اتصل علي اخوها واعطاه البنت وهوا ماقدر يرفض بحكم القرابه وانها البنت طيبه بس من غير ماتجيب سيره انهم كانو ناويين يخطبوني ودعيت لهم انو ربي يتمم عليهم بالتوفيق
وبعد فتره من هالحكايه وبعد كم شهر قال واحد من اخواني إن اهل احد من اصحابه فلان بيجو يشوفوني بنيه الخطبه وانو صاحبه هذا طيب وخلوق الخ
وفعلا جونا زياره بعد يومين وانصدمت جدا ناس مستواهم المادي جداااا ضعيف ومن كلام اخت الولد انهم عشرين سنه ماراحو لي احد زياره وانهم قاطعيين علاقتهم بجميع اقاربهم الا للضرروه القصوى وكان فعلا واضح من كلامهم ومن اسلوبهم انهم ناس مالهم اختلاط بي احد كثير
ورغم هذا انا كنت بفكر فيهم بشكل جدي وكنت ناويه اصبرعلي وضعهم المادي بس اهم شي اخلاق الرجل وقربه من الله بس الشي الغريب انو خرجو من غير مايخطبو ولا يتكلمو يعني كانها زياره عاديه
انا قلت خيره واصلا كنت متخوفه من البدايه من القبول فيهم
بعده انا بدأت ايأس من موضوع الزواج وبدأت احس إن مافي احد يبغاني ابدا رغم اني جميله وشكلي اصغر من عمري بكثييير والحمد لله سمعتي واخلاقي الكل يشكر فيها
وبعدت فتره اقترحت وحده من صديقات امي انها تكلم خاطبه واقنعت امي واقنعتني بالفكره
وفعلا بعد كم اسبوع اتصلت الخاطبه وقالت لي امي انو في ناس بيجونا زياره بهدف الخطبه
انا كنت مبسوطه بس بنفس الوقت كنت متخوفه اني اتحطم ثاني لاني تعبت من موضوع الخطب الي ماتكمل
استخرت وسرت ادعي ربنا اني مااتحطم ثاني
وفعلا جوه الناس وكنت مرررره مبسوطه كانو من عيله معروفه ومستواهم المادي عالي وكان واضح عليهم اني عجبتهم وخطبوني وحسيت انها اخيرا انفرجت بس كان عيبه الوحيد انها مطلق مرتين وكنت راضيه وقلت حتي لو كان هو سبب الطلاق انا راضيه بس انستر لان العمر مايستني احد وانا كبرت
وبدانا نسأل عنه وسار الكل يشكر بي اهله بس هوا ماحد يعرف عنه إي شي وكان يشتغل بالتجاره والمقاولات يعني مافي مكان وظيفي محدد عشان نسأل عليه فيه
وزد علي كده انو اهلو من بعد ماخطبوني مارجعلو اتصلو علينا ابدا
بدأت تدريجيا اشيل الموضوع من بالي بعد ما مر شهر عليه من غير مايتصلو اهله وعرفت بعدها انو مريض نفسي بالشكك وكان هادا سبب طلاقه في المرتين الاولي
حمدت ربي انو فكني منه ومن شره
ادري طولت عليكم بس هذا ولا شي جنب الحكايه الجايه
تذكرون صحبتي الي من الثانوي الي كانت تبغاني لي اخوها
بعد ماحضرت زواج اخوها وعملت الواجب معاها وباركتلهم
سارت تتصل عليه بعد كم شهر وتحكيلي عن اخوها انه مو مرتاح مع زوجته وان حياتهم مشاكل بمشاكل وحتي هما كارهينها والله انا كنت اقولها حرام لسه هما بالبدايه حاولو تصلحو بينهم وطبيعي مافي تفاهم بي اول الزواج لي اختلاف الطبايع ...........الخ
الين ماتصلت عليه بعد فتره وقالتلي انها تركت البيت وانه ناوي يطلقها
رجعت انصحها نفس النصايح وانه وانه ...........الخ
الين ماأتصلت عليه بيوم من الايام وقالتلي انه ناوي يطلقها بس الحكايه اتعقدت شوي عشان مختلفين عالمهر وشويه اشياء وانه رسلها اغراضها وملابسها وبدأ يغير بفرش البيت علشان بيخطب وحده ثانيه
قلتلها الله يعينه ويقدمله الي في الخير
قالت بس انا رشحتك له واخويا وافق وبنجي نخطبك
انا قلت لي امي قالت حياهم الله
وفعلا جوه وخطبوني وحلفونا بالموافقه وانهم كانو يبغوني من زمان بس ابو زوجته الاولي طلب ولدهم وماقدرو يردوه بحكم القرابه وقالو احنا مستعدين لي إي شروط بس نوافق وانه موضوعه منتهي مع زوجته الاولي بس هيا مسأله وقت
احنا قلنا خير وسرنا نسأل عن الولد والكل مدح في اخلاقه وفي سمعته وانو مواظب علي الصلاه انا فرحت وحسيت بي الامل
وردينا لهم بالموافقه بعد اسبوعين
بس حصل شي غريب بعد ماوافقنا مر كم اسبوع من غير مايحددو الشوفه الشرعيه ولا اتصلو علينا ابدا انا استغربت وحسيت انه في شي حاصل
اتصلت الام بعد فتره وببساطه شديده وبكل سهوله اعتذرت عن الخطبه بحجه انه ولدها نفسيته تعبانه ومايبي يرتبط باي وحده هالفتره
انا حسيت الارض تدور من تحتي لاني ماعملت ابدا إي حساب لها الشي
والي صدمني اكثررررر وحده من صديقاتي
تقرب لي اهل زوجته الاولي واعترفتلي انهم جوه خطبوني لهدف واحد انه تسمع زوجته الاولي بخطبتهم ليه تقوم ترد له زوجته علي طول وعلي حسب كلامها انهم خطبوني بس عشان (( يربوها ويعلموها الأدب)) وعشان يثبتو لها انه إي وحده تتمناه وموافقتي عليه اكبر دليل
وفعلا هذا الي حصل
حسيت بي اهانه فظيييييييعه وبي احراج من اهلي وحسيت انه مالي إي قيمه يعني انا مجرد كنت جسر ووسيله عشان يرجعو زوجته له
معقوله في ناس بي هالحقاره وعدم الضمير
المهم اكتئبت فتره بس علي طول رجعت لحياتي الطبيعيه وحاولت اكثر التقرب من الله لانه هذا الشي الوحيد الي يريحيني
وخطبني اربعه بعد هالحكايه بس بي اختصار واحد كان اجنبي مع احترامي لجميع الجنسيات وكمان غير عربي وانا قبليه
يعني بي اختصار مستحيل اوافق
والثاني كنت احسه بضيقه كبيره من ناحيته وكنت استخير وابكي طول الوقت هذا غير انه اصغر مني بي 4 سنوات وانا مستحيييييييييل اخذ واحد اصغر مني بصراحه حاولت اأقلم نفسي عالفكره بس والله ماقدرت
وجاني واحد بعدهم اكبر مني بي 13 سنه ومطلق مرتين ووضعو المادي جدا ضعيف وعقيم وتخيلي رغم هاذا كلو وافقت انا للأن مني مصدقه ليش وافقت
المهم مشي الموضوع الين ماوصل للشوفه الشرعيه وبعدها تخيلو رفضني
انا انصدمت والله والله والله اني احلا منه بكثيـــــــــــــــر ولا ليش امه كانت طايره من الفرح لما وافقنا
وبعدها اتصلو ناس وسألو امي عني انا سمره ولا بيضه امي قالت قمحيه قالو لا احنا ولدنا يبغي بيضه امي قالت الله يسهلكم
انا الحين بكمل ال 27ولا زواج ولا خطبه ولا ولد واحس موضوع زواجي كل ماله يتعقد اكثر بسبب عمري
احيانااقول الي فيني مو طبيعي يمكن فيني شي واحيانا اقول لا الحكايه مجرد قسمه ونصيب
والله حلمي الامومه نفسي احس اني ام وراعيه بيت وزوجه وعندي مين اهتم فيه ويهتم فيني
نفسي ارتاح من نظرات الشماته والحزن في عيون الناس
نفسي افرح وافرح امي معايا
احيانا اقول في نفسي انا مو ناقصني شي تعليمي جامعي وحلوه وجسمي هيئته ضئيله وهذا يعطيني اصغر من عمري بكثير
وراضيه بشاب او مطلق ارمل عنده اولاد ولا ماعنده موظف ولا موظف غني ولا فقيرماتفرق معايا لان الحياه تعاون وعادي نجوع يوم ونشبع يوم لانه مافي شي دوم
بس مايكون اجنبي ولا اصغر مني ولا متزوج
ياتري شروطي صعبه؟؟
الله يخليكم لا احد يلومني ليش وافقتي علي هذا ولا ذاك لان محد حيعرف ليش وافقت الا الي بمثل عمري ولا اكبر ولا احد يقولي بعدك صغيره لاني عارفه اني مني صغيره وعندي مين الي يذكرني بعمري طوال الوقت
والله العنوسه نـــــــــــــــــــــــــــــار تكويني يوميا
يمكن ماتصدقو حكايتي ويمكن مايهمكم موضوعي بس انا الي طمعانه فيه مجرد دعوه من القلب ربي ييسير لي امري
الله يخليكم ادعولي بظهر الغيب بالزوج الصالح حتي وان مارديتو عالموضوع وانا املي بالله كبير يعوضني خير عن كل الي فات


:hahaha: