لمن تعيش في بطن الابتلاء⛅، وتسعى للفرج☀️

لكل اخت مبتلاه بأي ابتلاء، صغير أو كبير..


اكتب موضوعي وان شاء الله يصل لأعماقك ويلامس دواخلك ويرد لك الأمل المفقود..


تأكدي أن الحياه هي عباره عن اختبار مدته ٧٠ سنه لو طال ،
وعبارة عن عقبات ومشاكل، وكل انسان يمر بهذي العقبات ويتعثر بها..


لكن الفارق يكون في ردة فعلي انا، وردة فعلك انتي..
الفارق في طريقة تفكيرك وتعاملك مع ظروفك، واستعدادك للصبر والتوكل على الله..


هل تكونين صابره شاكره وترجعين لله،
هل بتشوفين النعم الأخرى اللي متعك الله فيها ولابتركزين ع الناقص واللي منكد حياتك..


هل مستعده انك تكونين قويه وتؤجرين على صبرك ورجوعك لرب العالمين ..


او انك تتخذين طريق الاستسلام والهروب والشكوى وندب الحظ والتعب النفسي وممكن تقعين في التسخط لاسمح الله..


الأنبياء قدوتنا كانت ابتلاءاتهم أعظم واكبر من اللي نمر فيه،
فإبتلاءك ربما هو منحه ا و هبه من الله تعالى حتى ترجعي اليه وفرصه ينبهك فيها..
فلانه انتي مقصره اما آن لك ان تصلين بخشوع، وتقرأين القرآن وتتدبرينه وتستغفرين لذنوبك؟

كل إنسان في هذه الدنيا يضع الله في طريقه علامات للتنبيه علشان يرجع ويعود ويتوب، والعاقل هو اللي يفهم ويستوعب وينفض يده من البشر ويتعلق بخالقهم..


طيب انا دعوت الله ودعواتي مااستجيبت،
انا لي سنين ادعو وماتغير شي..
الفرج ماجاني وانا ادعو واقرا القرآن وقريبه منه تعالى بس ماجاني فرج..


طيب ماآن لك انك تفكرين بطريقه أخرى..


ربما الفرج يكون في رضاك بما كتب الله لك والتسليم، يمكن عدم رضاك وتسخطك الدائم عن واقعك هو المشكله الاساسيه لكن الرضا هو الحل..


ربما الفرج آتي لكن يحتاج منك الصبر، وحمد الله على النعم المتوفره..


ربما اللي انتي شايفته ابتلاء الان باطنه رحمه ورأفه وحكمه لايعلمها الا الله..


يمكن يكون صبرك واحتسابك هو سبب دخولك الجنه دون سابق حساب او عذاب..


عاد تخيلي الجنه دون سابق عذاب، والله تنعاف الدنيا بما فيها..


اللي عليك انك تتقربين من الله، بالدعاء والقرآن والصدقات + ترضين بالمكتوب + يقين مطلق وعالي + عدم استعجال..
وتخلصين النيه في كل شي تسوينه،
والله انه الفرج بيجيك وانتي مكانك بس اصملي واصبري..


تعرفون متى يجي الفرج؟
لما تبداين تنسين مشكلتك وتستلذين بالعباده والقرب من الله،
تعرفي لو وصلتي لهذا الشي؟
اقسم بالله بتنسين كل مشاكلك وتعيشين في سلام داخلي رهيب ومعد تهمك الدنيا زي ماكانت..


كلامي كثير وغير منمق او مرتب لكن والله خرج من القلب وان شاء الله يصل للقلب..
اذا وصل لقلبك لاتنسيني حبيبتي من صالح دعائك ❤️