لو قريتي مشكلتي اكون شاكره ولو عطيتيني حل اشكرك اكثر

بسم الله الرحمن الرحيم
السلام عليكم ياحلوات00

حابه استشيركم بموضوع هو صحيح انه سهل وبسيط والحمد لله لكن بصراحه
منغص علي شوي ومضيق صدري ومخليني اشيل هم كل مازارني احد

شوفوا يالغاليات لما يزوروني بعض الأقارب بمجرد ما افتح لهم الباب حتى قبل اقول هلاومرحبا
اللقاهم انتشروا في البيت 00 بشكل فوضوي جدا
يدخلون كل مكان بدون استئذان وبدون احترام للخصوصيه بصراحه انا اتضايق كثير
وراح اعطيكم مثال
اخر زياره جوني فيها قرايبي ومعاهم وحده من جاراتهم وبمجرد مافتحت الباب على طووول انتشار 00 اللي دخل غرفه النوم واللي دخل الحمام واللي دخل المجلس واللي في المطبخ
وتشوفونهم يتفرجون في البيت كنهم داخلين متحف
حتى ثلاجتي يفتحونها
بدون استئذان ولا مراعاه والله يابنات اني اتضايق بالمره
لاني احيانا اكون ناشره ملابسي ومنها الملابس الداخليه 00 اكون ناشرتها مثلا بغرفه فاضيه ومسكره الباب اللقاهم داخلين ويدورون بالغرفه ووو
بدون حياء 00 طيب اذا هم مايستحون 00 انا استحي احد يشوف خصوصياتي واغراضي
بتقولون شيليها وخبيها اواو
يابنات صدقوني الموضوع اصعب من كذا 00 يعني مثلا اذا انا دوبي غاسله ملابسي 00 معقوله بشيلها وبخبيها وهي رطبه 00
ومو معقوله بقعد اخبي كل شي في بيتي تحسباللضروف
والله كذا مابرتاح في بيتي ابدا
غير كذا 00 كم مره يدخلون على زوجي بغرفه النوم 00 واحيانا يكون نايم
وكم مره يدخلون غرفتي ويفتحون دولابي ويتفرجون وووو
يعني بصراحه قله ذوق
تصدقون حتى الفرن يفتحونه
الأدراج الرفوف كل شي يفتحونه ويتفرجون فيه
انا اللي اعرفه وتربيت عليه انو لما ازور وحده في بيتها حتى لو تكون اختي 00 اجلس بمكاني وما اتحرك حتى لو ابي الحمام اناديها واقولها ابغى الحمام واخليها توصلني لين باب الحمام
واحيانا اقولها ادخلي قبلي شوفي يمكن فيه اشياء خاصه عشان تشيلينها
ولما يكون زوجها بالبيت اقولها تنتظرني عند باب الحمام لين اطلع عشان مايمر زوجها بالغلط او شي
واي حركه اتحركها في بيتها اكون لابسه عبايتي وطرحتي على راسي
ولما تكون ساكنه بيت جديد انتظرها لين تجي هي تفرجني عليه 00 مو مثل بعض الناس يدورون في البيت بنفسهم ماينتظرون راعيه البيت تفرجهم عليه

والله يابنات انا مره مضايقني هذا الموضوع مو عارفه وش اسوي ؟؟
تصدقون اني احط القهوه والشاي واقعد انتظرهم يخلصون من الجوله التفتيشيه عشان اقدر اقهويهم
باللهي هذي حاله ؟؟
هذا غير الأسئله اللي يسئلونها

هذا من وين ؟؟ وبكم ؟؟
هذا من وين ؟؟ وبكم ؟
كل شي يسألون عنه
طيب انا حره ومااحب احد يتدخل بخصوصياتي
والمصيبه اذا هم مايقولون لك شي ويخبون عنك كل شي ويبون يعرفون عنك كل شي

بصراحه صرت اكره انهم يزوروني واحيانا والله اذا عرفت انهم جاييني بكره اني ما انام الليل من كثر الهم اللي اشيله منهم
ما ادري وش اسوي يابنات ؟؟
وتدرون وشو اللي ادهى وامر
انهم لما يدخلون بيتي يجون ايد ورى وايد قادم
ويأخذون كل شي من عندي
مثلا 00
الأمواس 00امواس الحلاقه ماغيرها 00
عطيني شوي امواس لزوجي
العصير 00حطي لي شويه عصير اخذه معاي
القهوه 0000حطي لي بكاسه قهوه مطحونه باخذها معاي
الأندومي 00 عطيني كم حبه
المناديل 00 البساكيت 00 الشكلاته 00كل شي يجي على بالك
طيب كل هذي الأشياء انا شاريتها على قدي 00 مو معقوله بعطيها وبقعد عالحديده
المشكله يابنات انهم بخير وعندهم كل شي 00 بس مدري ليه مايعجبهم الا اللي عندي

انا عادي اعطيهم ومن طيب خاطر لكن توصل فيهم اني اذا جيت ازورهم يقولون لي جيبي معاك طحين عشان نسوي لك معجنات
او جيبي معاك اغراض الحلى الفلاني عشان نسوي لك حلا
انا لو مشتهيه حلا بسويه بنفسي 00 هذا وانا ما ادخل عليهم الا وبيدي شي 00 اجل كيف لو ادخل وايدي فاضيه ؟؟
ولما يجون يزورون ناس غيري مايدخلون الا كراتين الحلا واكياس الهدايا بأيديهم
هذا غير الحسد 00 من يشوفون عندي شي يحسدوني عليه 00 ويقعدون يتكلمون بدون مايذكرون اسم الله
وهم عندهم خير 00لكن سبحان الله الرازق في السماء والحاسد في الارض


يعني ابغى افهم 00؟؟
وش القصد بالتصرفات هذي ؟؟
وايش لازم اسوي معاهم ؟؟
وكيف اقدر امنعهم من الأنتشار في بيتي بالشكل الهجومي الهمجي هذا؟؟


على فكره هم من القرايب وما اقدر اقطعهم 000 صدق من قال الأقارب عقارب
وشكرا مقدما