لي سنه وانا مكتومه ممكن 5دقايق من وقتكم عشان افضفض

بسم الله الرحمن الرحيم
السلام عليكم ورحمة الله وبركاته

انا أولا بقولكم شي مهم وهو أني
أنا ماجيت أشتكي بالعكس انا احمد الله على مارزقني من نعم يارب لك الحمد
المهم اني مشتهيه افضفض بس و ما عندي مشكله اللهم لك الحمد واللي تبي تفضفض تكتب بعد

انا بنت متخرجة من الكليه من سنتين طبعا قبل لا أتخرج كنت شخصية ثانية سوالف وناسه
والحمد الله مثقفه بدرجة كبيرة وامووت في القراءة و متفااااااااااااااااااائلة وونيسه وضحوكه ونعومه وكلن يحبني ويحب جلستي حتى مستحيل احد يزورنا الا لا زم وجودي لدرجة ان امي كانت تمزح على اللي يجونا وتقولهم أنتوا جاين عشانا ولا عشان علامو و ذكيه ماشاء الله علي (انواع المدح )
وأهم شي أني ماأحب ابين ضعفي او اني مجروحة لأحد حتى خواتي اللي ساكنين معي مايعرفون وش داخلي لأني كتوومه لدرجة ان كل اللي حولي يحسبوني باردة وعلى هوني واحن عمري يعني (مااضيق صدري ) وهذي مشكلة الكتومه انها ممكن تنفجر بأي لحظه وهذا اللي انا كاتبته اليوم جزء من الإنفجار يعني في أشياء الى الآن مااقدر ابوح بها لأحد
المهم نجي للزبدة
طبعا سنة تخرجي تزوجت اعز صديقاتي واللي كنت انا وياها شي واحد وأقولها بكل شي لاني على ان علاقتي بأمي قويه بس ماكنت اقو لها أي شي ولي بنت خاله (هذي اختي الله لايحرمني منها )في الكويت يعني مانشوف بعض إلا بالعطل والمكالمات اغلبها تروح في سوالف مالها داعي وغير كذا طبيعتي ماافضفض حتى صديقتي اللي قلت قبل شوي مو أي شي أقولها عندي اشياء كثيره اتحفظ عليها طبعا اول ماتخرجت لهينا بالعطلة وبعدين رمضان والعيد يعني مرت السنه الأولى طيران وكنت عادي لكن مع بداية الصيف اللي فات احس صرت إنسانه ثانيه حساسة ويبان علي مو مثل قبل واذا جت الدورة (تكرمون) تقولين ملف ضيقة الصدر انفتح واي شي سلبي في حياتي أتذكره حتى أشياء صارت وانا صغيييييييرة أتذكرها وانواع الصياح ماادري ليش تصدقون من كثر ماصرت حساسة ان مرة جالسه الصبح مع ابوي ويتابع الأخبار قبل لا يروح الدوام طبعا انا مواصلة المهم سألته سؤال مرتين مارد ماكأني موجودة المهم رحت غرفتي وبكيت بكاء يرحمني الكافر لويشوفني المهم السوالف ماعاد عندي سوالف طريقتي في الكلام تغيرت احس صرت دفشه:( ماادري ليش اول كلن يحكي عن نعومتي وذرابتي على الرغم من اني مليانه ماعاد احب الطلعات طبعا هالكلام من قبل لا أتخرج اصلا وعاد إذا جا الخميس نتجمع مع بنات خالتي اذا سولفوا احس اني مااعرف شي كل مواضيعي عن اللي في التلفزيون او بيتنا او اقول سوالف وفي نص السالفة يقولون قد قلتيها شفتو التحبيط
المهم الحمد الله دخلت تحفيظ وابشركم حفظت 6 أجزاء وعلى فكرة احسن اوقاتي تكون في الدار احس ان عندي انتماء فاقدته من تخرجت اما صديقاتي مافيه الا ثنتين الى الآن اكلمهم وحدة اكلمها باستمرار والثانيه من فترة لفترة وهي حامل وتعبانه تكفون ادعولها الله يخليها لزوجها وولدها المهم حتى اذا كلموني ماعندي سوالف هم اللي يتكلمون عن بيوتهم وازواجهم وحدة فيهم دائما تستشيرني في مشاكلها واستحي ازيدها هم ام الثانيه لا مرات اقولها بعض السوالف بس الله يكون في عونها مشغوله أما أمي وخواتي كلهم الصبح في المدارس واذا قمت الظهر إلا هم تعبانين والعصر اروح الدار واذا رجعت يطير الوقت وتصير 10 وكلن ينام وبنات خالاتي اللي عندي كلهم تزوجوا الله يوفقهم فما عندي احد يعني مكتووووومه احس بنفجر واللي زاد انها علي اليوم تصدقون اني اليوم كلمت بنت خالتي اللي في الكويت وقلت لها شوي من اللي احسه بتقولون توظفي اقسم بالله اذا جا طاري الوظيفة اتضايق احس اني ماني عارفه اتعامل مع الناس واحس اني بصير مااعرف شي رغم اني في قرارة نفسي عارفه اني بأبدع في العمل بس ماادري ليش يجيني هالشعورحتى اذ ا قدمت في وظيفة وقالولي مافيه احس براحة طبعا
اللي زاد حالتي اني قبل رمضان جو ناس يشوفوني وكانوا على اساس انهم جادين اقسم بالله من جو حتى السماعة مارفعوها وقالوا ماصار نصيب والله اهون من سكوتهم لأني احس امي كانت متحمسة هي وابوي وغير كذا احنا ماعندنا الحريم يشوفون بس عشان الحرمه تقرب لأمي قالت معليش بس تجين بلحالك المهم الأخت جابت مرة ولدها معها احس أمي وبعدها هالسالفة اذا قالوا وحدة تزوجت احسها انها تتحسر علي من داخلها رغم أني ماهمني لأن الأرزاق عند الله ومرتاحة بالنسبه وبعدها بإسبوع جاني حالة اكتئاب وصرت احس اني بموت وحتى رمضان ماني لحقة عليه تصدقون انها جتني فجأه كنت اتابع في المجد القارة المجهوله افريقيا فجاءة جاني شعور اني خلاص بموت قريب المهم ماعلمت احد الا بعد 5شهور بس كنت ادعي واكبر المهم رحنا زيارة لجدتي خارج الرياض لما جيت انام في الليل والله مانمت بس شوي غفيت وكل تفكير بالقبر وضمته المهم جلست كم يوم انام الفجر والساعه 8 انا قايمه لدرجة وجهي زي مايقولون انخطف لونه وكنا رايحين لبيت عمي جمعة فجأة سألتين مرة عمي فيك شي انتي اليوم ماادري وش فيك دايم تكشخين وتهتمين (طبعا كان شكلي يخرع جلابيه وحاطة على راسي شال طبعا كنا شتا)قلت مافيني شي وطبعا ذاك الأسبوع مااقدر أكل وانا اول اقول ياحظ اللي ماله نفس الله لايعاقبني جربتها يالله شعور فضيييييييع المهم بالليل رحنا بيت عمتي المهم لي فترة طويله المكياج ماطب وجهي بس اترقب ان يجيني شي فتعوذت من ابليس وتزينت واحس اني ارتحت بس من دخلنا بيت عمتي إلى ان رجعنا البيت وانا كل شوي في مكان شوي في غرفة عيالها شوي في المطبخ شوي عند التلفزيون بس احاول اهرب من شي ماادري وش حقيقته على اني قبل كنت قويه وانصح أي وحدة أعرفها فيها ضيقة بس حقيقة عرفت مشاعرهم الله يشفي مرضى المسلمين اجمعين وحتى العشاء كان مغري ماقدرت آكل ويقولون وش فيك قلت ريجيم بعدها بيوم خلااااااص انهرت طبعا قلت لأمي بس ماقلت بالتفصيل بس قلت احس اني متضايقة ويوم نزلت لقيت ابوي وسألني بعد ماقلت له امي وقال اجيب لك مويه مقريه قلت لا وطبعا كلمت وحدة غاليه عندي و اعتبرها امي الروحيه ماادري ليش وانهرت وبكيت بشكل انرحم المهم قالت لي كم دعاء وكان هالحكي العصر يوم الأربعاء المهم نزلت وجلست اقرا اذكاري والحمد الله كان ذاك اليوم اول مره اكل وانا مشتهية
(طبعا زاد وزني من الفرحة يالله يازين راحة البال ) صح الإكتئاب خف بس شوي يروح ويرجع
الحمد الله الواحد مايدري وين الخيرة فيه تصدقون خلاااااص المسلسلات الأفلام مافيه نهائي الله يثبني وصرت احب القرآن حب اليوم اللي ماأقرا فيه احس بضيقة وزاد تعلقي بالله سبحانه وتعالى احسن من قبل وصار ذكر الموت عندي شئ مايخوف بالعكس يحسسني بإني بخير والغفله عنه هي اللي تخوف بس مارجعت لي شخصيتي الأولى رجع بعض الصفات والباقي انتظر رجوعة وثقتي بنفسي ارجعت بس مو مثل قوتها قبل يعني يبغالي شوية دفع آه نسبت قبل فترة رحت اقدم على وظيفة وقالولي السنه الجايه تدرون وش قالت امي (اخاف ان الله استجاب لأدعيتي لما كنت ادعيي عليك يومك صغيرة ومافقك )انا ارتعت وقلت لها طيب استغفري قالت والله اني كل يوم ادعي لك ):icon33: :icon33: طبعا انا خفت ورجعت لي حالتي الأولى على خفيف وصرت أبكي بس الحمد الله من صرت ادعي ماعاد همني والرزق بيد الله والحين بس ادعي ربي يثبتني ويرزقني الرزق الحلال والزوج الصالح المصلح بس احس ارتحت :) :) لما فضفضت وآسفه اذا كنت ازعجتكم بس مالي بعد الله غيركم