لي كم يوم ابكي

السلام
والله جدي الله يطول عمره تزوج اربعة وخلف
عشان كذا ابوي اخوانه واخواته كثار ماشاء الله
والله واحد من عيال عمي توه صغير حليله عمره يجي ٢٤ سنة
كان يشتكي من الام بالظهر واليد يحس نفسه مكسر اخر يوم امه قالت له روح افحص يمكن كورونا راح فحص النتيجة سلبية وراح عند دكتور الدكتور شك فيه قاله روح حلل وسوي رنين مغناطيسي
سواهم واذا الفاجعة الكبرى
سرطان بالعظام
الدكتور صارحه قاله ضروري تبدأ علاج قبل ماينتشر
الولد على قول اخوي رجع ماقدر يدخل بيته من صدمته قعد على الرصيف مقابل البيت الناس تفكره مهموم ومحتاج الين اخوه طلع شافه قاله وش عندك صار يبكي وقاله سرطان الالم هذا طلع سرطان
اعوذ بالله اعوذ بالله الله يبعد عنا وعنكم هذا المرض الخبيث
والله يوم خبرت انسدت نفسيتي كلها خلاص الحياة صارت سوداء بعيوني
الله يعين سبحان الله كيف يبدل ربي حال الانسان بلحظات
والله من خبرت هذا الخير ودموعي عيي ماتوقف عليه المسكين امس بلش علاجه الله يكون معاه
اسأل الله العظيم رب العرش العظيم ان يشفي ولد عمي شفاء لايغادر سقما