مأساتها مع الطلاق

سبق وعرضت قصه صديقتي وحيرتها في موضوعها على هذا الرابط لكن القصه من صاحبه الموضوع اكثر وضوح مني انا واعتذر ان كنت نقلت بعض جوانبها بدون توضيح او لبس في الموضوع اعتذر مره اخرى

http://forum.hawaaworld.com/showthread.php?t=1309733&page=6

اعتذر على التأخير في الرد ... لكن حبيت اقولكم ان صديقتي مازالت مطلقه عارفين ليه لأنها طلعت من العدة ومازالت عندها امل انها ترجع لبيتها بعد ما يحاول زوجها يتعامل معاها كأنسانه ....


اتتركم معها هي تشرح لكم كل شي افضل مني انا


انا ما ادري قلت لكم ايش صار ولا لا عموما راح اقولكم ايش صار .. انا صاحبه المشكلة انا دخلت بأسم فونه وحبيت اوضح امور لم يعرفها احد غيري اسباب الطلاق كثيره منها مااعتذر عن توضيحها اكثر لكن جعلتني اعاني اثار جسديه متعبه جدا

قبل لا انسى فعلا انا فيني عيوب مثل زوجي.. عيوبي كنت اجتماعيه مرحه وعلشان احاول أكسب زوجي اصبحت انطوائيه مثله

عيبي حبته حاولت أخليه احسن الناس تركت كل صديقاتي بما فيهم فونة

على فكرة الرجال مافيه عيوب رجال طيب هاديء بس عيبه ماعنده شخصيه وعنيد ..

المصيبه ان خواته هم اللي يفكرون عنه ويقررون عنه وهو ينفذ ما يطلبونه منه بالتفصيل دون مرعاة شعوره هو او شعور من تشاركه الحياة


تنازلت عن اشياء كثيره ..

صدقوني ما سوف اخبركم به حقيقه .. انا انسانه عاديه عشقت زوجها مثل اي زوجه كانت حبيبه وزوجه وصديقه وكل شي لكن الرجل فهم تضحيتها انها مجبوره تقدم هذا الشي له وكان يخبرني انا دفعت فيك المهر الفلاني علشاني تخدميني وتجيبين لي عيال هذا شغلك
بعد محاولات كثيره ..صدقوني انا مازلت أحترم هذا الشخص لأنه زوجها سابقا ووالد اطفالها حاليا .. حاولت أتواصل معاه قبل وقوع الطلاق لأطلب منه تعديل سلوكة ..قال لي احمدي ربك اني ماخذك ,,عندك خوات اكبر منك غير متزوجات وانتي عندك زوج ..هنا كنت اقول هل من حقه انه يعايرني اني متزوجه واخواتي لم يكتب لهم الرزق ..
انا تركته لعل الله يعوضه زوجه ابرك مني تفهمه وتسعده ..

اخواتي صدقوني

لما الزوج يقول انه يحب زوجته وعلى اتفه الأسباب يقول عاجبك ولا الباب يوسع جمل هاذي مصيبه

لما الزوج عمره ماطلع خارج السعوديه لوحده مع زوجتة حتى البحرين ما عمرها راحت الا وخواته معاها .. هذي ما ادري ايش اسميها

طيب متى الواحد يعيش حياة استقرار وحريه

كنت اقوله ابي استمتع اني عروس واطلع بدون مسؤليه اطفال بعد فتره راح تتغير حياتنا مسؤليه تربيه الطفل تتطلب ترتيبات وتوقيت وتاخذ من حريتنا الكثير
انا متزوجتة من 12 سنه وعمري ما طلعت مشاكلي برا بيتي مو علشان شي بس علشان احاول احافظ على بيتي
زوجي تمادى صار ما يحسسني بأي شي الا حاجته الجنسيه
انا بصراحه خفت على نفسي وقلت له ياحبيبي ابي تعاملني برومنسيه انا زوجه انا حبيبه قال لي هذا طبيعي ايش اعمل لك

لما الزوج بعدما تزعل زوجته وتطلع لأول مره من البيت بعد زواج دام 12 سنه وتحاول تهدده بهجره وتركه ..
انا طلعت من البيت بدون ملابس كافيه ..اخذت مع ابني الصغير وتحججت بأنه مشتاق له وحاب يكلمه ..انصدمت لما قال لي ليه ما اخذت اغراضك .. قلت له بعدين
خرجت من غير مصروف وكنت اتمنا يتصرف معاي بأي تصرف يدل على انه شاريني ..اتصلت علي اخته قالت لا تتصلين عليه اي شي تبغيه اطلبيه مني وانا اروح للبيت اجيبه لك .. قلت ليه انا بعدني ما تطلقت وهذا بيتي من حقي ارجع
ليه هو كان دايم يهددني وكم مره يقولي انا ما ابيك انت مجرد خدامه لي ولعيالي ويوم انا اللي زعلت قال اللي يبيعيني ابيعه ..

وبعدها ارسل لي اخته مره ثانيه قالت يقول رجعي جواله اللي اشتراه لك .. رجعي اللاب التوب اللي شراه من فلوسه
رجعي المموري اللي شراه من فلوسه

قلت وانا وولده عند اهلي من شهر ونص ما فكر يرسل لنا مصروف ريال ويسأل عن جوال وعن لاب توب وعن مموري
قالت والله انا مجرد رسول وما على الرسول الا البلاغ وبعدها بكم يوم

يرسل ملابسي بأكياس زبالة مفتوووحه يعني حتى ما كلف عمره يربط اكياس الزبالة اللي فيها ملابس زوجتة الداخليه ويرسلها مع اخوه الكبير وأولاد اخوانه الشباب المراهقين ..معقوله هذا الزوج يحب زوجته ولا يحترمها ..

لما الزوج ياخذ حتى العيادي من اولاده قبل زيارة امهم علشان ما تصرفها عليهم هل هذا الزوج قدر العشره اللي كانت هل تذكر تضحيت الزوجه اللي تحملت راتبه يوم كان الفين ريال والان وصل راتبه 18 الف يستخسر يخلي العيديه مع عياله ويقول لبنته علشان لا تنسرق
لما البنت تقول لأمهما ماما انا بعد مراح اقول لبابا انك مشتاقه له علشان ما يروح يقول لعماتي وعماتي يهاوشون ويقولون لا تقولين هذا الكلام لأبوك .. هل هذا الرجل فعلا محل لثقه ..

لما انصدمت بكلام من بنتي الصغيره 3 ابتدائي تقولي ماما بابا ماعنده قرار لأن قراره عند عماتي لييييييييييييييه
ليه يشوه صورته قدام بنته ليه
كنت اتمنا بنتي تستمر تشوف بأحلى صوره حاولت بس هو الله يهديه كان يتحرك بتوجيه من خواته ..

اخته كلمتني بعد شهر ين من خروجي من البيت قالت ليه طلعتي من بيتك قلت لها اخوك دايم يهني قالت عادي تحملي ..قلت ما قدر وقفتي معاه وانا عمري مازعلت واحد منكم لا صغير ولا كبير والله يابنات ثم والله انها ردت علي قالت لا تمنين علينا بأنك وقفتي معاه ولا انك تتعاملين معانا بأسلوب زين كل بنات الناس يسون مثلك وزود قلت انا ما ابي شي زود انا ابيه يحسسني انه شاريني .. تدرون شنو ردة علي ..قالت يكفي انه سامح لي اني اكلمك هذا اكبر دليل انه شاريك ..قلت لها نعم ليه انا متزوجتك انتي ولا متزوجته هو .. قالت خلصينا الزبده انتي شاريه بيتك ولا لا
قلت ابيه يتغير قالت انت احسن من غيرك قولي الحمدلله ..قلت الحمد لله بس ابيه يتغير قالت وان ما تغير ؟؟قلت الله يعوضه ابرك مني قالت الشرهه مو عليك الشرهه على امك واهلك اللي افتحو الباب لك ..!!!!

بعدها بساعه زوجي اتصل .. وقال لأمي بنت طالق ...


وبعدها بشهر سمعت انهم يخطبون له والان هو تزوج او ملك .. وانا الى هذا التوقيت مازلت مطلقه .. تتوقعون هذا الشخص شخص شاري زوجتة او بيته وللعلم والله ثم والله ان ولا احد من اخواني او ابوي حاول يتعدى عليه عارفين ليه
يقولون علشان ما نخربها معاه اخاف انه يغير رايه ويقول ما عندي مانع ارجعها ..تخيلو

انا الإهانه ما جتني من بس زوجي حتى اهلي اهانونني .. الموضوع مش موضوع متعه وجنس لا
موضوع ان الزوجه صعب تقدم تضحيات وصبر وبعد اقل محاوله لتغير وضعها للأفضل برفض تصرف او شي تنقلب عليها الطاوله ..

الشخص اللي فكر يرتبط فيني اهله كلهم جو لبيت اهلي وطلوبني بس انا طلبت فرصه افكر
علشان اطفالي علشان ذكرياتي مع زوجي .. بس كل ما اتذكر موضوع ملابس في اكياس زباله ليه ليه من جد ليه احس ما ترك لي منفذ ادخل فيه علشان اقدر ارجع لبيتي وحتى لما حاولت رفض انه يرد على جوالي واتصالتي ورسايلي...

وقال لوالدي زوجها باعها وانا اشتريها واشتري عزها وعز رجالها ..

انا مازلت انتظر دعائكم ولا استغنى عن نصائحكم ..

هناك اسرار زوجيه احبرتني على طلب الطلاق ليس كرها بزوجي لكن كرها بأسلوبه .. يكفيني انه ابو اطفالي لأحاول البقاء في ظله لكن لم يجعل لي فرصه ..

انا اتحسر على فراق اطفالي
اموت على فراق مملكتي واصوات لعبهم حولي
اذوب من خوفي عليهم من البرد والمرض ..
واتألم على نظره من حولي لي على اني جريحه منكسره .. ومصابه بمرض الطلاق ...
آآآآآآآآآآآآآآآه يااطفالي كم انا اشتاق لتلك المداعبات واللعب والكلمات المبعثرة من افواه قمه في البراءة
لا تنسوني من صالح دعائكم بالهدايه