ماعندي شي بس ادخلوا انصحوني ادعولي اي حاجة

السلام عليكم ورحمة الله وبركاته

ههههه على كثر ماكنت ادخل هالمنتدى واقرا الا اني ما توقعت يوم من الايام اكتب فيه شي

ادري في النهايه بتقولون ماعندك شي وجايه على الفاضي تكتبين
بس للامانة ماجيت كتبت الا من ضيقه في صدري وابغى اطلعها

انا بنت عمري عشرين سنه مو متزوجة والحمدلله ادرس جامعه ومعروفه جدا بحبي للدراسه وشغفي وتقدرون تقولون يضرب فيني المثل في هذا الشي

الحمدلله لي فتره ربي هداني وتغيرت اشياء كثيره بحياتي للافضل والله يزيدني هدايه وثبات

احاول قد ما اقدر اجاهد نفسي على الطاعه على الرغم اني من عايله جدا متفتحه يعني مش محافظه او حياتنا مبنيه على الدين لا للأسف

الحمدلله وضعنا الاسري جدا مستقر امي وابوي واخواني الله يحفظهم كلهم نعم من ربي اشكره على وجودهم حولي

بس لي فتره احس بضيق احس اني بعدت عن ربي .. يجيني احساس انه ابتلاء وربي يبغى يختبر صبري وانا اعرف هالشي ومقتنعه انه ابتلاء الا اني اتعب واستسلم لبعض المعاصي بعض الاحيان .. وصدق اني بعدها احس بالذنب وابكي كثير كثير كثير احس اني قاعده انافق واقعي وانافق امام جميع الناس اللي ماخذين عني فكره اني انسانه محافظه وفيها دين
نظرتهم هذي تتعبني كثير زياده على تعب المعصيه بالخفاء

غير كذا احس لي فتره اعيش بملل حبيت العزله ، اكره اروح جمعاات اقاربنا وبنات خوالي وعماتي وحتى صديقاتي ، مع اني كنت سباقه على هالجمعات وانا اللي اجمعهم ووالله اني حتى بالجمعات معروفه اني اكون ملح القعدة ما احب الفتور والرسميات احب الضحك واللعب والحياه

الحين لا تغيرت جدا الكل ملاحظ .. لدرجة حتى اقرب صديقاتي بديت افقدهم وافقد قربهم واهتمامهم .. صاروا يجتمعون بدوني واكتشف انهم اجتمعوا ولا قالوا لي مع اني قبل كنت من اول المعزومين

تقدموا لي ناس كثير مرة بس كله كلام مو فعليا وجو البيت وكذا ، لا اغلبهم يصير زي اللي عطينا رقم امك واهلك او يفاتحون اقاربنا فيني وبعدين ينتهي الموضوع فجأه يعني ماعاد نسمع خبر ابدا
مع انه بتقولون ايه زي كل بنت بتقول حلوه عن نفسها وماخذه مقلب
لكن والله العظيم جد انا انسانه على قدر من الجمال واغلب اللي يشوفوني يقولون فيك قبول وتدخلين القلب على طول
وحتى كذا مره امي تقول لي يابنتي مدري ليش حظك كذا ، تقصد انه يصير كلام وناس يتكلمون فيني بس مايصير شي ، للامانه هالشي زعزع ثقتي بنفسي كثير

مشكلتي ملخبطه ادري
احساس بالذنب
عزله
فقدان ثقه بالنفس

والله قمت افكر بالزواج كثير احس ابغى اغير حياتي وروتينها ابغى انسان صالح يعاوني على الطاعه انسان يخاف الله فيني يعاوني على دراستي

انتهيت مع اني مدري وش كتبت فوق بس كذا ابغى احد اتكلم معه مالقيت غيركم لاني اكره افضفض لأحد اعرفه احس بالضعف

ادعوا لي دعوه في ظهر الغيب لعلكم اقرب الى الله مني

( هدايه وصلاح وبر والدين وتوفيق من الله عز وجل وحُسن خاتمه )

احبكم في الله