مرجوجه جدن:) @mrgogh_gdn

عضوة نشيطة

مانمت من ضيقة الصدر,,أبيكم تدعون لمؤذن مسجدنا

صباح الخير ...

كيفكم ياالطيبات..إن شاء الله بخير..

مؤذن مسجدنـآ شايب عمره ب 60 الله يطول بعمره ..

جدتي تسولف لنا عنه تقول من عرفناه ملتزم وطيب

متزوج وزوجته داعيه وعنده اولاد وبنات...

محد يعرف عنه شي شين مجلسه مفتوح للكل

وعياله ماشاء الله مافيه مثلهم بالوقت هذا الا قليل

متعفف الأدمي هذا لدرجة محد يعرف عن حالته الماديه شي

من طلاب ابن عثيمين الله يرحمه

المهم فجأه فقدنا صوته لما أروح لأهلي متعوده أطلع الحوش واسمعه خصوصا المغرب

شايب وصوته عذب وفيه بحه حلوه تجبرك تسمعينه

اختفى محد يدري عنه شي وبعدين درينا انه بالسجن :(

الكل انصدم لدرجة انه عامل مغسله يبكي يقول ليش كذا يصير معه

هو طيب معي ودايم يجيب لنا كل فتره اكل وبرمضان
فطورنا هو اللي يجيبه لي ولاهلي يوميا

وفيه أم أيتام راحت للمسجد تسأل عنه هي من حي ثاني جت تقول فقدناه كل جمعه يمر على عيالي ومايقصر معنا

طبعا الناس ماشاء الله لاقوة إلا بالله الكل يعرفه

سألوا عنه طلع مسجون بسبب دين ...

كيف حالته متعسره ومحد يعرف عنه ..؟!!

المهم أنا أعرف قريبته كلمتها وسألت عنه

كيف يافلانه وكيف محد منكم ساعده قالتلي

والله مانعرف عنه شيء الا بعد ماانسجن ..

قرايبه محد منهم فاضي كل واحد لاهي بدنياه

بس انه له فتره باع سيارته وسيارة ولده ومحد عرف ليش ,,؟!!

غيره بيته الاجار لشقه اجار اصغر ...

الله المستعان كيف قرايب ومايعرفون أحوال بعض...

طاح عليهم وهو بالسجن وجته جلطه وقرايبه

طلعوه بكفاله اتوقع...مسكين مااتحمل قلبه

تدرون دين مين اللي انسجن بسببه ...

دين زوج بنت اخته ... هذا الله يستر علينا وعليه

نصاب ويتسلف ولايسدد واستغل طيبة الشايب ...

كل فتره دبر لي سلف علشان بنت اختك وعيالها ..

والشايب سمعته طيبه والناس تسلفه بدون تردد

لما كثر الدين وزاد وصل تقريبا 50 ألف ,,والمسكين

كل ماتجيه فلوس يسدد شوي للديانه..

يقول ماتهون علي بنت اختي تعذب معه..

واخر شي قاله خلك كفيل غرامي لسياره

وزاد الدين عليه لما وصل ال 100 الف تزيد او تنقص شوي..

وهو حالته الماديه على قده تخيلوا فرش بيته

تحلف حرمته انها من اول ماتزوجته ماغيرت ببيتها شي

لاغرفتها ولا المجالس لدرجة عياله ماعندهم الا دواليب مافيه اسره فراش وماشاء الله

قانعين ومبسوطين وسمعتهم طيبه...

الدنيا مالها أمان والناس تكلموا على زوج بنت اخته

ووعدهم انه كل شهر بيسدد شوي من دينه مع اني أشك استغفر الله

لأنه معروف مايسدد ابد ...

زبدة الموضوع يابنات حواء...

أبي دعوه طيبه للشايب واهله...ماتصدقون كيف ادعيله وصوته للحين بأذني وهو يأذن...

ادعوا له الله يسهل اموره ويرحم ضعفه ...

هالشايب فيه شباب يقولون المفروض أنه

بعهد الصحابه من قوة دينه ومايتكلم الا بالطيب ..

طبعا الناس يقولونها بتريقه ماعجبهم دينه ..

والله شلت همه اخاف الرجال مايسدد ويسجنونه

مره ثانيه :(

مدري وش فيني من أمس ضايق صدري عليه ...

دعواتكم الطيبه ياالطيبات...

دمتم بود..

يلزم عليك تسجيل الدخول أولًا لكتابة تعليق.

تسجيل دخول

**ميمي المدينه** • 12 سنة

ياقلبي عليهم وربي دمعت

الله يفرجها يااااااااااااااااااااارب

ماروكو الحلوة • 12 سنة

الله يفك دينه يااااارب

مرجوجه جدن:) • 12 سنة

الله يسعدكم دنيا واخره ع الردود الطيبه

ورررده • 12 سنة

,

سبحان الله..!

توني اقرأ كلام الشيح ابي اسحاق عن الإبتلاء

كلام مثل البلسم , يهيئ الإنسان المؤمن نفسيآ وقلبيآ ,فيستعد لتلقي البلاء بـ رضى

البلاء قرين الدعوة وقرين الالتزام،

فإذا سعيت إلى ربك فأنت مبتلى ولا بد،

فلا بد أن تهيئ نفسك للبلاء: «إنما بعثتك لأبتليك وأبتلي بك».

سبحان الله العظيم

اسال الله ان يفرج عليه , وان يرزقه بـرد الصـبر ولـــــــــذة الرضى

امين

:26:

بريق الألمآس .. • 12 سنة

الله يفرج عليه ويفك دينه