تجربة مريت بيها وكانت جدا صعبة، وهي الورم الليفي والبداية كانت بنزيف حاد اثناء الدورة الشهرية وكنت عندي شكوك ان هذة الشي مو الدورة الطبيعية اللي كانت تجيني 5 ايام او 6 ايام كمان شكل ولون الدورة كأنه دم عادي مو مثل الدورة العادية
اهملت الموضوع بسبب طبيعة حياتي واني دايمًا اداوم في العمل بس كنت اسوي احطياطات كثيرة مثل الفوط الصحية معي وانا اروح واجي بسبب النزيف والغزارة اللي كانت تجيني فيها الدورة لين ما وصلت الدورة ل 10 ايام متواصلة واوقات 12 يوم
قررت اني ما اسكت بعد كدة خلاص ، ولازم اشوف طبيب يوضحلي ازاي كدة
كانت الصدمة ! قالي اني لازم استئصل الرحم!!!
لاني كنت مهملة في البداية فصار حجم الورم الليفي كبير
وانا من زمان واحب اطالع العلوم وكدة سألت الطبيب وقولتله هو الورم الليفي حميد قالي نعم حميد وما يضر مثل السرطان اللهم عافينا
قولتله طب ليش ما تشيل الورم بس وتترك الرحم والمبيض ايش الحكمة وليه انت تقول حاجة زي كدة؟
قالي بعد ما اخذنا العينة وبعد ما سوينا منظار الرحم اكتشفنا ان حجم الورم الليفي مرة كبير ويمكن يتجاوز حجمه ثلاث ارباع الرحم!!!!
ولازم نستئصل الرحم مع المبيض كمان لان الدورة الجاية ماراح توقف وبيصير معاكي نزيف وراح يسببلك انيميا شديدة
بصراحة يا بنات ما حد يقصر مع حاله واستشيروا الطبيب فورًا لين ما تطمنوا وقالي الطبيب لو كنتي جيتيني من الاول ما كنا احتاجنا نسوي اجراء زي كدة
الله يستر على الجميع ويحفظكم
متى يكون حجم الورم الليفي خطير؟