محتاره بين أوافق او ارفض

السلام عليكم

انخطبت من ابن ولد عّم ابوي، هو اكبر عني بسنتين، يدرس ويشتغل وهذي اخر سنه له في الجامعة وهو اكبر واحد في اخوانه، عنده اخ اصغر عنه بسنه واخت وحده اصغر عنه بسبع سنوات وعايش مع أمه وابوه، ومن شروطه انه مايريدني اشتغل ، وانا باقيلي سنة ونص واتخرج من الجامعة، واهله يبون يزوجونه هو واخوه في يوم واحد
المهم، انا ماكنت افكر في الزواج الحين لان اول شي ابا أكون نفسي وأكون انسانه مستقلة ماديا ودارسه ومعتمدة على نفسي بعدها اتزوج بس كلام امي خلاني مااستعجل في الرد وأفكر في الموضوع اكثر
وقالتلي ان كل شي بأيد الزوجة هي تقدر بذكائها تغير من زوجها وحتى ابوي قالي نفس الكلام وقالي ان الزواج معناه تعيشين مع شخص يكون معاك طول الحياة تتزاعلون تتراضون مالكم غير بعض شخص يكون شريكك في الحياة
فقلت اذا بوافق فراح أوافق اذا وافقوا على شروطي، ومنها بيت لحالي، وإني اشتغل وأكمل دراستي، واخاف ارفض ومايجيني شخص احسن عن هذا
وقلت اذا برفض فراح ارفض اذا ماوافقوا ع شروطي كلها، ولان الخاطب عمره 24 سنه والشباب الحين في هذا العمر يكون بعده مايتحمل مسؤولية الزواج، والسبب الثالث انه من الأهل وهذا الشي الي كثير متخوفه منه لان ممكن يكون سبب في زيادة المشاكل بعد الزواج ومافيه المواصفات الي انا اتمناها
انا بصراحه خايفة من الزواج، ومن المشاكل الي اسمع عنها ومابا اتزوج واعيش تعيسه معاه ، اخاف هذا الزواج يحرمني من اني أعيش حياتي نفس ماانا ابا و نفس مااهلي معيشيني، مرات أفكر اقول ليش اتزوج واوهق نفسي دام اني عايشه في بيت اهلي ومرتاحة وأهلي مب مقصرين معاي في شي الحمد لله، وأحس صعب أتأقلم مع الزوج بسرعة لاني خجولة واايد، في نفس الوقت الزواج هو سنة الحياة
احترت مااعرف شو اريد ونفسيتي تعبت من كثر ماافكر في الموضوع


صليت استخاره ودعيت ان الله يكتب لي الي فيه الخير ويصرف عني الي فيه الشر
دعواتكم