كيف نسويها هذي ؟؟
نحتاج بصل مقطع صغار مع فليفلة .. وبالمقلاة .. نحمسهم بشوية زيت او سمن حسب اللي تفضلونه ..
ونخليهم لمن يتحمرون وبعدين نضيف لهم الربيان (( انا اسلقة شوي عشان يذوووب بالفم اثناء الأكل )) وبعدين نضيف البهارات { ملعقة صغيرة ليمون اسود ، ملعقة صغيرة بزار ، شوية هيل مطحون مخلوط بزعفران ، ولا ننسى اهم شي الملح } ..
وعلى النار تحريك وتحريك الى ان خلاص يختلطون مع بعض .. بعدين 5 بيضات على الحمسة وتقليب مستمر الى ان تستوي البيضة .. وبذلك تكون حمسة المحمر جاهزة ..
وهذا شكلها ..
الحين نجي للمحمر ..
المحمر يصلح بالتمر ويصلح بالدبس .. انا سويته بالتمر ..
طبقة اليد تمر لأربع طبقات يد رز .. { وممكن اكثر اذا حابينه حالي } ..
بالجدر حطينا التمر واضفنا له الماي ..
وما ننسى نضيف ملعقة بزار ورشة طحين ( لازم نحطه امي تقول مع الماي والتمر حتى قبل لا نشغل النار ع الجدر ) .. ونشغل النار ونخليه لما يبدا يغلي .. وطق طق طق بالتمر عشان يطلع طعمة عدل .. ونخليه لمن يطلع فقاعاته ..
بعدين خلاص نصفيه بالمشخل .. وناخذ الماي ونتخلص من التمر خلاص .. ونرجع الماي بالقدر ونضيف له شوية بصل وشوية زيت او دهن .. ونغسل العيش ونكبه عليه لمن يستوي ..
بعدين اذا استوى .. ننجبه بصحن التقديم ونحط فوقه الحمسة اللي بالربيان .. ويصير هذا شكله النهائي ..
وبالهناء والعافية ..
