مستشفى احمد ابانمي وولادتي

بسم الله الرحمن الرحيم

كيفكم ياحوامل الله ييسر ولادتكم ويتمم عليكم بخير

انا كنت متابعه جيده للمنتدى طوال فترة حملي وبحثت كثيرا عن مستشفى مناسب للولاده وبناء على نتائج البحث حبيت اجرب مستشفى الدكتور احمد ابانمي اللي في مخرج 9 بعد مامدحتهم وحده هنا بالمنتدى وايضا شفت موقعهم وعجبني مدحهم لنفسهم وان عندهم امكانات ودكاتره على مستوى

رحت لهم وتابعت مرتين قبل الولاده عند الاستشارية الفلبينية وكانت ممتازه في الكشف والدقة وعليه قررت اولد عندهم

رحت لهم يوم الولادة وانا واصله الرحم مفتوح 8 سم ولما وصلت لهم على طول طلعوني فوق في جناح الولادة وحضرت الدكتوره ومعاها طاقم كامل بما انه مافيه ولاده الا انا فكان الجميع عندي وكنت وصلت لمرحلة خروج الطفل وكانوا محتاسين كانها اول حالة ولاده تجيهم المهم اطلب منهم مسكن رفضوا قالوا خلاص البيبي بيطلع ولو اخذتي مسكن ماقدرتي تساعدينه بالدفع المهم كل مالطلق يجي واحاول ادفع تجي القابله تدخل يدينها عشان تسحبه اشهق وماقدر ادفع وعلى هالحال لاكثر من ساعتين لين خلاص طلعت روحي وانا اقول لهم اتركوني انا بدفع لحالي ولما يطلع البيبي انتم ذيك الساعه اسحبوه لاتتدخلون الحين كذا ماراح يطلع البيبي المهم واقعد اتحايل عليهم ابي اسوي عملية ماراح اقدر ادفع وهم يتدخلون بهالشكل وكل ماطلبت منهم مسكن او عملية ويريحوني هم ولا على بالهم في وادي ثاني يضحكون ويسولفون وكنهم قدام تلفزيون يعرض مسرحيه فكاهيه قمة الفجاجه وقلة الحياء

بعد ما تعبت وخلاص بموت الدكتوره خافت راحت نادت اخصائية وجت وحاولت ونادوا دكتوره ثانيه وبالاخير طلبوا الدكتور يجي يشوف وش الحل لخافوا يموت البيبي انا رفضت يدخل الطبيب وكان جزاه الله خير متفاهم طلب زوجي وقال له لازم ادخل عشان اسحب الجنين لانه يمكن يموت وهو طول في ممر الولاده ولازم ياندفعه يرجع ونسوي عملية والا نسحبه بشوف ا الوضع واقرر وش لازم نسوي المهم انا رفضت يدخل الدكتور وقعدت اطلب من ربي الفرج والحمد لله ربي فرجها وطلع الطفل بس بعد الموت والحمدلله رب العالمين رحمته واسعه

بعدها جلست اتألم واطلب منهم مسكن ماحد معطيني وجه وقامت القابله تخيط ولا دقيقتين الا وخلصت ( بعدين اكتشفت انهم خيطوا نص الجرح مش كله ) حسبي الله عليهم عشان ارجع لهم يسوون خياطه ثانيه

جلست ساعتين في غرفة الولاده بعدين طلعوني لغرفتي اللي هي غرفه عاديه مع دورة مياه تخلوا من اي شي ثاني

حتى التلفزيون خربان

معاملة الممرضات جيده ولكن نصابات وماعندهم ذمة لما حطوا المغذي في يدي كان مكان المغذي وارم والدواء ينزل تحت الجلد وانتفخ مكان الابره وجوا وسحبوا الابره وشالوا المغذي ولما جت الدكتوره قالوا لها انهم حطوا ثلاث علب مغذي وهم حتى واحده ماكملوها

كنا دافعين للولاده 5900 وزياده ولما طلعت وراح زوجي يسوي اجراءات الدخول قالوا لنا الحساب 7680

مادري من وين طلعت هالزيادة

غير كذا المرافق يدفع 100 ريال يوميا واكله من برى او يدفع مقابل اكله اللي يطلبه من عندهم

اكلهم طبعا ماينوكل

الطفل لم يتم تطعيمه من الدرن لعدم توفرها

كل النساء اللي في التنويم يقولون حرام هذا اسمه مستشفى

يعني فعلا اللي فيه مالهم دخل بشيء اسمه طب لاممرضات ولادكاتره ولا قابلات فعلا جالسين يتعلمون بهالبشر ولاحسيب ولارقيب

تحسفت قد شعر راسي اني ولدت عندهم وترى هذي سادس ولاده لي


الحمد لله على كل حال


حبيت ابين لكم عشان تكونوا على بينه قبل تروحون لهم