مشاكلي من بعد عين امي الله يرحمها

ترددت كثير قبل ما اكتب موضوعي بس اليوم نفسيتي تعبت كثييييييير و قررت اني اكتب لكم عل و عسى افرغ شي من جبال الهموم اللي شايلتها في قلبي ..

مشكلتي يا بنات بعد وفاه امي الله يرحمها .. توفت امي و انا مراهقه و ما عندي خوات بس انا بنت و جدتيني توفو من زمان . من بعد وفاه امي الله يعلم يا بنات بالضيم اللي صابني تحملت مسؤوليه بيت كامل و انا اشوف صديقاتي و بنات عمي ما عندهم هم غير الطلعه و الزيارات و الحفلات. مرت عليي ايام كنت اتمنى أي احد يسألني شنو فيج ولا حياه لمن تنادي .. ابوي دايما مشغول و اخواني شباب و لاهين في حياتهم . صار واجب عليي اني امثل بيتنا و ازور كل وحده مريضه في عايلتنا و كل وحده ولدت و كل شخص تزوج و اجيب لهم هديه و الا كلهم بيشرهون عليج و يقولون لج انج ما عندج سنع تخيلو يا بنات و عمري ما كان اكثر من 15 سنه و كل شي اجيبه من مصروفي الخاص لاني كنت استحي اطلب فلوس من ابوي .

سبحان الله يا بنات الناس في المناسبات اللي لازم اروح لهم يتذكروني لكن لو صادني شي محد بيسأل و لا احد بيتذكر اني موجوده . و اكثر شي يحز في نفسي اني احس اني وحيده و محد مفكر فيني ,, يعني خالاتي و عمتي ما يقصرون بس بعد الام غير .. يعني مثلا يا بنات لما نكون في جمعه حريم اشوف خالاتي كل وحده تنادي بنتها عشان تسلم على الحريم و تعرفهم عليها .. و كل البنات ينادونهم و انا اضل قاعده في مكاني .. ولا احد يقول لي تعالي يا فلانه ولا شوفو فلانه .. احس اني شي زياده او شي شفاف الناس ما تهتم فيه ..

الشي الثاني يا بنات اللي يحز في نفسي كثيييييييير هو الاعراس و العزايم ... يعني من بعد المرحومه ولا احد من معارفنا فكر انه يطرش لي بطاقه دعوه ولا يعزمني على شي .. والله يا بنات اني امووووت اشوف قريباتي كلهم يتجهزون و يروحون الحفلات على طووووول وانا الوحيده اللي اقعد ولما اسمع تعليقاتهم بعد العرس احس اني ما اعيش في نفس الدنيا اللي هم عايشين فيه و اتمني اني اقدر اشوف اللي يشوفونه و احس ان همومي مكبرتني عشرين سنه زياده عن عمري .. لا تقولون لي احسن لج عن الاثام .. يا بنات انا الحمدلله عارفه ربي و قايمه بواجباته لكني مهما كان بنت توي في العشرينات ابي البس و ابي اطلع و ابي اشوف الناس و الناس يشوفوني و يعرفوني


سامحوني يا بنات اذا كدرتكم او ثقلت عليكم بس هذا جزء بسيط من اللي في قلبي

اللي اطلبه منكم هو الدعاء حق امي بالرحمه و ان الله يعوضني خير عن اللي قاسيته بالزوج الصالح اللي يريحني و الذريه الصالحه