مشكلة بنتي وظلم زوجها لها //اكتفى من الردود

السلام عليكم

بنات قدر الله على بنتي وتزوجت قريبنا هي توها صغيره عمرها 18وحملت على طول طبعاً ساكنه بشقه بالدور الثاني عندهم المهم حملها من اوله كان تعب نزيف وترقيد بالمستشفى واخر شي ولدت قيصري طبعاً زوجها اللي مايخاف الله مايبينا يااهلها نعرف او نتدخل بحياة بنتنا بشي ابد مايشحن لها جوالها وممنوع تكلمنا واخر شي طردنا من بيته وطلعت ياعمري من غرفة العمليات لبيته وجيت ابكي لامه ابي اهتم ببنتي زي باقي الامهات ابي اساعدها انظف لها اطبخ لها قالت امه انا اقوم بالواجب ماعليك والله العظيم قعدت شهر ونص محرومه منها ومن ولدها واخر شي صار يجيبها بس كل يوم جمعه مثلاً من 3العصر الى 10بالليل طبعاً مازلنا مطرودين ممنوع يعني نزورها ببيتها وممنوع كل عماتها وخالاتها واعمامها واخوالها وجداتها يزورونها بعد وهي نفس الشي ماتروح لهم تخيلوا جتنا عزيمه بيوم اربعاء تقول ترجيته لين بكيت عيالا يجيبها والفطور غصب عنها كل يوم تنزل تفطر مع امه والطلعات والتمشيات والسفر الا بشور امه ممنوع تروح اي مكان الا بوجود امه الحين لها سنه و3شهور من يوم تزوجت تخيلوو والله العظيم انه بايع ذهبها كله ونظامه طول الليل من بعد المغرب بالاستراحه وهي منطقه بالبيت جتنا امس الجمعه تفطر عندنا وقامت بنتي تصيح وتبكي مسكها ابوها وش فيك علمته بالسالفه كلها والضغوط والتسلط اللي عليها قال ابوها خير ان شاء الله لاجا ياخذك قوليله ابوي يبغاك انزل شوي وفعلاً جا ونزل عند ابوها ناداها ابوها وقال بنتي فيه حاجات انت مضايقها فيها الحين هي بتتكلم قامت بنتي تقول وش اللي مزعلها منه وهذا قام ينافخ ويقول انا رجال بكيفي ولو تحب السماء مالها الا يوم الجمعه تزوركم مالي شغل انا ويتهدد ويتوعد ويوم قال ابوها طيب ليش بعت ذهبها قال هي باعته طيب وين فلوسه راحت قال ناسي الحين بعدين اشوف قال ابوها ابي منك سند ورقه يعني يكتبها بالمبلغ قام وقال مالكم شغل انا ارجع لها اللي اشوفه الحين مااكتب شي والبنت قامت تدعي عليه وتبكي وتقول وربي كذاب باعه عشان مزنوق يقول والحين يجحدني المهم قام ابوها وقال له ترى بيننا المحاكم انت افعالك ماينسكت عنها قام الولد وقال في حريقه بس ابي ولدي قلناله روح المحكمه واشتكينا الولد لامه وطلع

طبعاً حابه اوضح شي هذي مو اول مشكله بينهم دايم ابوها حتى وهو مطرود يروح بنفسه ويحل مشاكلهم وبنتي فيها طبع مررره خوافه مسكينه البارحه كلنا استغربنا من شكواها وكلامها وشلون جتها الجرأه وهي تقول من كثر ماعانيت ماعاد تفرق معي تعبت من الظلم ابي اعيش زي الناس

الحين ابو الولد اتصل هو بعد يهدد ويتوعد والله لاوريكم والله لاجرجركم بالمحاكم

يابنات حنا مانبي الشر بس الظلم شين والله العظيم وعندي كم سؤال حابه اسألكم فيه لو صار وراح المحكمه هل بتاخذ حقها وبينصفها القضاء الشي الثاني لو طلقها الولد يقدر يسحبه منها الحين عمره 6شهور واخر شي تكفون الله يسعد من ترد حطوها حسبة بنتكم او اختكم وش التصرف السليم في هالحاله وجزاكم الله خير