مشكلتي مع امي وام زوجي وزوجي وولدي

مرحبا حبيباتي
كيف حالكم
بعد سنوات الانتظار والبطاله اخيرا ولله الحمد حصلت شغل وما تتصورون فرحتي بالشغل الي تمنته ودعيت ليل نهار اني احصله لاني فعلا محتاجه له ماديا ومعنويا ..
طبعا انا متزوجه وعندي ولد عمره سنه ,, اعيش في بيت اهل زوجي في شقه في الدور الثاني ,, ام زوجي طبيعتها ما تحب تمسك الاطفال وترعاهم يعني مع كل عيالها جذي ومو بس معاي ,, يعني اذا كنت بخلي الصغير عندها وبروح اسوي لي شغله ما اقدر اطول عن ساعه لانها تتصل فيني تعالي اخذيه وهذي طبيعتها وبناتها ايضا تعاملهم بنفس الاسلوب وما تمسك اطفالهم , وحتى لو كان الطفل عندها تخاف توديه الحمام لان مره طاح منها ولدها في الحمام وتعقدت على قولتها :22:
اما امي مسكينه هي كبيره في السن وانا اخر البنات عندها ,, طبعا لو بروح اي مشوار او بسوي اي شي اقط ولدي عليها عسى الله يخليها لي محد نافعني وشايلني غيرها ولو يصير لها شي لا قدر الله اضيع لان شايلتني وشايله ولدي لكنها مره كبيره وفي الاونه الاخيره صادها الديسك ومحتاجه عمليه يعني ظهرها ما يعلم فيه الا رب العالمين وانتو تعرفون الطفل يحتاج متابعه وحمل ...
الحين مشكلتي الاساسيه وبطلو عيونكم زين ان دوامي مو مثل العالم والناس , لاااااااا دوامي شفتات يعني خفارات وحق الي ما يعرف اوقات بالعصر واوقات بالصبح وهذي طبيعه دوامي وانا وزوجي تفاهمنا على هالنقطه لان هالدوام افضل شي انعرض علي وما ابي ارفس النعمه
يعني لو بسجل ولدي في حضانه ممكن اودي لهم ولدي يوم واحد الصبح واسبوع ما يروح لان دوامي العصر فاهمين علي ؟؟ يعني الحضانه حل ملغي الغااء تام من قاموسي لانها ماراح تفيدني لو كان عندي دوام العصر .....
ام زوجي حاولت اعرض عليها الموضوع بطريقه غير مباشره ما ابدت استعداد ولا عرضت علي وانا استحيت بلاخص انها تعودت تاخذ راحتها وما بي اقيد حريتها بطفل وهي حتى عيال بناتها ما تمسكهم ...
امي مسكينه طاقه صدرها وقايله لي عطيني الولد في عيوني بس والله كاسره خاطري تعبانه وكبيره في السن وولدي حركي وشيطان وما يقعد ويبي له واحد فاتح عيونه 24 ساعه ...
بتقولون لي خدامه , اقولكم شقتي صغيره وين احطها ؟؟؟؟ ومابي اخليها وتقتحم خصوصياتي مع زوجي يعني شقتي مافيها الا غرفتين , يمكن تقولون لي حطيها في بيت اهل زوجك تحت , اقولكم غرفه الخدم في بيت اهل زوجي صايره في الخارج يعني ملحق وكثيرات هربو لهالسبب حتى ان ام زوجي اعلنت شعار لا للخادمات وصارت ما تتعامل معاهم ...
والله حيرتي حيره مادري وين اودي ولدي , خواتي مساكين يبونه لكن بيوتهم بعيده والابواب كلها مسكره الا باب رحمه الله ,, فكرت اني لو استقدمت خادمه اوديها مع الطفل لامي عشان يكون تحت متابعه الوالده بس باشراف الخادمه بدل ما تتعب لكن وين احطها ؟؟؟؟؟؟؟؟؟
لا تقولون لي رفضي الشغل صار لي سنين انطر فرصه مثل هذي ولو فرطت فيها بكون غلطانه لان انتو شايفين سوق العمل شلون صار وتخصصي مو مقبول في كل مكان ...
واذا سالتو وين موقع زوجي من الاعراب بقولكم ماله موقع لانه رجل باختصار ومو شايل هم حاجه
يالله يابنات ساعدوني تكفون الله يساعدكم وعطوني الحل او عطوني جزء اضيفه لشقتي وييصير غرفه للخادمه هههههههههه
انتظركم