معتقدات خاطئه عند اهل الزوج

]السلام عليكم ورحمة الله وبركاته
حياكم الله اخواتي هذي اول مشاركه لي بعد طول انقطاع
الحقيقه موضوعي باختصار يخص معتقدات خاطئه لأهل الزوج
تسببت في احداث العديد من المشاكل وتسببت في تعاسة
الكثير وهدمت بيوت كانت قائمه على الموده والحب
قبل اي شيء وقبل اقول اللي بخاطري احب اؤكد على أن لي أم
ولي أخوان متزوجين وأحب أن أبرها وأحب أن أرى بر أخواني فيها سوا المتزوجين أو غير المتزوجين ولي أبناء صغار سيكبرون وسيتزوجون يوما ما وأرجو برهم وسأرى مافعلته فيهم
لاحظت كثيرا المشايخ يوجهون رسائل لزوجة الابن وحثها على مخافة الله في ام الزوج ومساعدة زوجها على بر امه
واهمال الجانب الاآخر وهو حث ام الزوج واهل الزوج ومخافة الله في بنت الناس اللي اصبحت في عصمة ابنهم وكانها خادمه استقدمت لخدمة ابنهم وخدمتهم لا حقوق لها ويمتنون عليها بانها
تزوجت ابنهم
اهل الزوج لهم حقوق والزوجه لها حقوق وهذي معادله لا تحل بشكل صحيح الا بحكمة الزوج وقدرته على الموازنه واعطاء كل ذي حق حقه لكن عندما يكون الزوج حساس اشد حساسيه من جهة اهله ومفهومه بالبر محصور في انه يستغل كامل استغلال
حتى وان وصل الامر به ان يتنازل عن حقوقه مقابل رضى اهله ويهمل حقوق زوجته وحقوق ابنائه
من المسؤول ومن الضحيه ؟؟!!
الآن نجي لمربط الفرس لما تكون الأم لديها ابناء كثير و فيهم الخير ولكن لا يضحون بحقوقهم ممن اجل رضاها ورضى بناتها يبرونها ولكن بدون تضحيات
وتتركهم ولا تطلب منهم شيءكما تطلب من ابنها الذي مستعد ان يضحي بكل شيء من اجل رضاها حتى وان كان على حساب زوجته وابنائه
واعتقادهم في هذا الموضوع ان احنا أولى فيه من زوجته
وان احنا نعرفه قبل تعرفه وان لنا حقوق عليه اكثر وانه ملزوم في اهله اكثر ونبي ناخذ قبل ماتاخذ هي كل شيء ...الخ
وان امه تعبت عليه اكثر من زوجته وانهاولدته وربته وكبرته عشان يبر فيها طيب نحن نعرف هذا الشيء بس هذي سنة الحياه كل الامهات يولدون ويربون ويتعبون وان الرجال لابد يتزوج ويجيه عيال ويستقل بحياته مع زوجته وعياله مافيه شيء غريب بالموضوع هذي سنة الله في خلقه لو الكل بيمشي على قاعدة الاهل اولى بخدمة ولدهم كان محد تزوج ولا الامهات جابو عيال خوف من العيال يتركون الامهات ويروحون مع اولادهم
انا موضوعي متشعب وعندي مشكله تسببت فيها هالاعتقادات
مشكلتي زوجي ضعيف شخصيه مع اهله جدا لدرجة الاستغلال
انا لايهمني هو حر مع اهله لكن يتطور الموضوع احيانن انه يريد ان يقدم مصالحهم ع مصالحي انا وابنائي بدعوى ان الدنيا فانيه
وانها لا تهمه
صارلي معاه سنوات طويله فوق العشر سنوات وهذا مبدأه بالحياه تعبت منه ومن سلبيته انا وابنائه اخر تفكيره
ولله الحمدلله مو منقص عليناالأشياء الأساسيه وعايشين حياه عاديه بالوسط
لكن مااأمن مستقبل أبنائه لا بيت ولا رصيد ولا شيء
مع ان المفترض ان وضعه يكون فوق الممتاز مقارنه بمن مثله في وظيفته
والسبب قروض تراكمت على ظهره من جراء استغلال اهله وسكوته على ذالك لاتجيني وحده تقول هوالمسؤول انا ادري بس امه لها دور كبير لانها كانت ادآة ظغط من قبل اخوانه واخواته
اذا كان يبون شيء وتردد في تنفيذه على طول يدخلون أمهم وهي بدورها تتوسط بدون مراعاه للظروف يابنات بالعاده اللي اعرفه انه بعض الزوجات هم الي بالعاده مايرحمون الزوج ويطلبون بدون
مراعاه ولكن بموضوعي والله العظيم العكس انا اللي انذهل من الطلبات اللي يطلبوها الام والاخوات والاخوان وكأن ولدهم وزير وطايح على كنز
يطلبون بشكل اسبوعي وفوق المعقول وفي حالآت نادره جدا يعتذر منهم والاغلبيه تعتبر طلباتهم اوامر
لا تجيني وحده وتقول محتاجين ابد مش محتاجين وطلباتهم كلها ترفيهيه اخوانه متزوجين واغلب اللي ياخذوه لزوجاتهم وابنائهم
زيادة ترفيه والأدهى والأمر يكونو مترفهين اكثر من ابنائي
بتقولولي كلمي زوجك زوجي جنوبي وشخصيته ضعيفه عندهم لكن قويه عندي يسكتني انه بيعوضنا وخلاص بيفكر في ابنائه ومررات ينكر اللي يسويه ومرات يعصب ويقول تكرهين اهلي
تعبت من سلبيته وبجد حسيته موكفو يكون اب يوم من الايام وموكفو يتزوج اللي مثلو المفروض يبقى طول عمره عند اهله واخوانه يخدمهم ويرفهم وخلاص ع فكره مو الاخ الكبير فيه ثنين اكبر منه وكلهم معتمدين عليه اعتماد كلي مع الام مع انهم في وظائف مرموقه وعليها الكلام ولكن اتعودو خلاص ان لهم نصيب في راتب اخوهم غير السيارات اللي اشتراها لهم
أنا أعاني كثير من سلبيته وشخصيته الضعيفه عند اهله واستغلالهم له ومع كل ذلك انا يا أخوات ماااأواجهم ولا اتكلم ابلع موس واسكت واجاملهم ياليت عاجبهم يغارون مني ويكرهوني ولا أشوف اي تقدير لي عندهم اشوفهم يقدرون حريم اخوانه ويعزمونهم ويهتمون في ضيافتهم يجتمعون كل يوم عند بيت وحده منهم ولما احدد يوم بزورهم بالسنه مره مااحصل الا امهم جالسه بلحالها وهم يصرفون انفسهم انا بالنسبه لهم بظل اللي اخذت اخوهم وحرمتهم منه مع اني مو مقصره سويت كل شيء من اجل اكرامهم لكن الآن آمنت أن الناس ما يملا عيونهم الا التراب ولا يقدرون الا اللي شايفه نفسها عليهم
كرهت عالمهم وكرهت نفاقهم لأنهم عند زوجي يبينون انهم يحبوني ويحبون عيالي وان التقصير كله مني انا كرهت زوجي لأن دايم واقف في صفهم واذا شاف شيء واضح وضوح الشمس يدل على ان الحق معاي قال انا مالي دخل بينكم افكر بجديه بالانفصال
لاني مااحس بالآمان معه
اتمنى كل وحده تكتب راأيها بدون تجريح واتمنى كل وحده تحط نفسها مكاني وتقول وش بيكون موقفها
لا تقولون لي ابطلب اللي ابي وماعلي منهم انا مش طالبه مصروف انا طالبه تامين بيت ملك وتامين مستقبل ابنائي بس مافيه مجال يتحقق هذاالشيء طالمها فيه ناس انانيه تطلب وتستغل وناس تضحي وانا بالوسط ماني عارفه كيف افهمهم ان اللي يصير غلط ...!