ممكن تعتبروني زوجه اولى وبعضهم يقول ثانيه ... لكن

هلا خواتي الله يحفظكم من كل شر ... ترا انا موعادتي اشكي ولا ابكي الى لحالي واحيانا اكلم نفسي يعني اشكيلها طبعا بعد الله عز وجل ... فاستعراضي لموضوعي اليوم ممكن تقولوا فضفضه وما طلعته الا من الحره والمرض ... والله ياخواتي صدقت انه القهر وراء كل عله ومرض ولا جتني امراض الدنيا وانا توني صغيره والله الدكتور ذاك اليوم يقول هذه الحاله ماتجي الا لسيده عمرها فوق الخمسين والله وانتى توك صغيره ومستغرب صراحه خفت على عمري وقلت وش تسوى الدنيا ... الله يقويني على طاعته ويخليني لبناتي ولا يجعلني انقهر الا على ديني ولا يوريني مكروه في بناتي ... معليش طولت عليكم في المقدمه بس سالفتي انه زوجي اخذني وهومنفصل عن زوجته وهي من جماعته وعنده عيال صغار الله يحفظهم المهم ابو الشباب بعد ماتزوجني قرر يرجع زوجته رأفة بعياله واصرار اهله خصوصا انك جبت واحده من برا الجماعه سألني ولقيت من الافضل اني اوافق لان الاصرار رايح يولد عنده العناد هذا اولا وثانيا زوجي نوعا ما ابن حلال يعني احسن من رجال كثير للامانه بغض النظر يعني كريم حنون طيب يتدارك الخطا يخاف الله يحاول وانا اقول يحاول يعني هناك تقصير من يوم رجع زوجته ... طبعا الفتنه اشد من القتل وزوجته الله ... بس اش اقول ضقت المر منها ومن كيدها ومو ضروري اسرد القصص والمقالب ... الي ماتخطر على بشر مع اننا مانتقابل ولا نحتك ببعض ... مع انها تخاف زوجها موت بس وش اقول ويشهد على الله العلي العظيم اني ماذيتها بكلمه اوفعل والله الشاهد وطبعا اهل زوجي تغيروا على كلهم لدرجة المقاطعه وزوجي الله يصلحه قصر في حقوقي وانا صرت امل من المطالبه بها حتى تركته في حاله وفوضت امري لله ويوم مرضت وطحت صرت الومه على معاملته الغير عادله وان هذه سبب القهر لي وعلى بناتي ... الله يهديه بكل برود يقول وانا متأكده انه مو كلامه موكفايه اخذتي منها زوجه واخذتيني من عيالها انا لفت الدنيا فيني وسكت ... وقلت وانا خانقتني العبره امساك بمعروف اوتسريح باحسان وبناتك الله يستر عليهم خذهم ماعندي القدره اربيهم لحالي وبعدين تاخذهم ... ويوم تذكرت بناتي طحت مغشيه ... ادري بعضكم يقول انتى زوجه ثانيه تحملي وبعضكم يقول ليش رضيتي من الاول بس انا ماابي حلول انا فوضت امري لله بس بغيت اوجهه رسالتي لكل زوجه زوجه معدد ... اختى في الله ادري موهين عليك تشاركك وحده في زوجك والله ادري بس هذا امر الله وانكتب ولا هو حرام تدخل عليه الزوجه النار لكن الحرام والمحاسبه عليه انك تفرقي بينها وزجها وعيالها بضغينه او بفتنه لا تحبيها مو ضروري المحبه من الله ولاتذكريها بخير حتى بس اكفي شرك عنها انا مااتكلم من خلال موقفي انا بس انا اتكلم بشكل عام والله على ما اقول شهيد ... والله ياخواتي اني طلبته بس اعيش مع بناتي وماابي منه شي بس يدخل على بناته ويسأل عنهم اصلا بعد ماطحت هانت الدنيا في عيني والحمدلله انا انسانه متعلمه وميسوره الحال وممكن انشغل بحياتي بس والله ماكسر ظهري غير بناتي وصحتي ... والله يابنات اني ودي اقابلها واقولها خذيه اشبعي فيها والله اني عفته وعفت الحياه الى كلها مكائد وظلم وما اقول غير انه هذا قضاء الله قدره على ولازم ارضخ لهذا القضاء والحمدلله على كل حال ... هذه نصيحتي وشكواي ... والله اني احس هم وانزاح عن صدري لما فضفضت ... وسامحوني على الاطاله ... الله يفرجها على كل مهموم ومغلوب على امره
اتمنى تفاعل من زوجات معدد ولك جزيل الشكر