مهمومه لدرجة كبيره,, موضوعي ماله حل //اكتفى من الردود

بسم الله الرحمن الرحيم

حبيباتي مدري من وين ابدأ

بأبدأ بنفسي عمري 29 لي متزوجه 9سنوات عندي 4 اطفال اكبرهم ثاني واصغرهم سنتين ونص

تزوجت زواج تقليدي وكان ابوي الله يطول بعمره يدور الأخلاق والدين بغض النظر عن الامور الماديه

زوجي طيب ويخاف الله ومايقصر اذاعنده

ولكن ظروفه المادية جددددا صعبه

بداية هو امه وابوه متوفين وعنده اخ واحد اصغر منه ويدرس بمنطقه بعيده عنا

ارجع لمربط الفرس زوجي ماعنده الاشهادة المتوسط ومتوظف بوظيفه ع قد شهادته براتب 3000 ريال

الف اجار والف جمعيه داخلين بها لسد بعض الالتزامات و1000 هو اللي يبقالنا عشان نصرف انفسنا

ساكنين ب ملحق غرفتين وصاله وحمام اكرمكم الله

عندي غرفة نوم شريتها مستعمله من وحده من الجيران من يوم تزوجت والله اعلم بحالها

والغرفه الثانيه فاضيه بس موكيت والمطبخ فيه الضروريات بس

زوجي يداوم بالنهار ويكمل دراسته بالليل عشان يقدر يحسن من وضعنا

انا يابنات وما ادراك ما انا اقوم واقعد وانا ابكي وحالتي حاله

ودي اعيش زي العالم والنناس ودي اخرج من البيت ودي اشتري لي اغراض ملابس مكياج ما ابي غالي لكن ع الاقل الشي اللي احتاجه

في العيد نزلت الهرم اخذت لعيالي ك لواحد قطعه وانا اخذت بلوزه وجيت ادور لي عليها بنطلون ولمحت زوجي يفتح المحفظه يحسب الفلوس بتكفي ولا لا وسويت نفسي ماحصلت قال لازم تاخذين هذا عيد

قلت اصلا البلوزه مايصلح عليها الا بنطلون اسود وحرام اشتري وعندي واحد جديد وحاسبنا وطلعنا

هو متأزم اكثر مني ووده انه عنده ويعطينا لكن ماباليد حيله

احيانا ادخل عليه القاه يبكي مثل الطفل الصغير يقول مدري كيف نكمل حياتنا ووضعنا كذا يقول احترق الف مره لا شفت عيالي يبون شي وانا مقصر معهم

طبعا عيالي مساكين يجيب لهم ابوهم حلاوى مع نزول الراتب ويقعدون الى الراتب الثاني صاروا يحسبون للراتب اكثر منا غير الالعاب اللي صارت شي من الاحلام

هالحين جت المدارس ودي اقضي لهم مثل خلق الله درت الاسواق كلها مالقيت شي رخيص قمت غسلت شناطهم حقت العام واعطيتهم ولصقت عليها استكرات عشان اقول انها جديده

طبعا مقاضي البيت ناخذ الضروري والهام فقط وكميه بسيطه جداااا حتى ولدي الصغير فطمته وعمره سنه عشان اوفر حق الحليب وقلت لزوجي رفض يرضع هو مايبي

والنت اشحن شهر وكم شهر اتركه مراعاة للظروف

كل شنه اقول السنه الجايه بيتعدل الوضع لكن للأسف مثل ماهو ماتغير الحمدلله على كل حال

طبعا دورت لي وظيفه ولكن للأسف ماحصلت وحتى حافز مانزل لي عشان انا كنت ادرس بالكليه وسحبت ملفي ما كملت عشان عيالي مافيه مكان احطهم فيه

وحاطيني اني لازلت طالبه ومراجعات واوراق وحوسه وللأن مانزل مع اني لي فتره طويله من انسحبت ما اقول الا حسبي الله ونعم الوكيل

طبعا اهلي ناس مقتدرين ولكن ابوي عنده قناعه انه الرجال لازم يكد ع اهل بيته ومايصلح احد يعطيه وغير كذا زوجي عزيزنفس ولا يرضى ياخذ من احد شي

احيانا اخواتي يحطون بشنطتي مبلغ بسيط من غير ما ادري ولا اعلمه اخاف من ردة فعله بس لا نزلنا السوق شريت اللي يلزم عيالي بسكات
غير سيارتنا المهربده اللي تقعد بالورشه اكثر مما تقعد عند بيتنا وكثير من الايام يصلحونها ولا نقدر نطلعها لضيق ذات اليد

زوجي قايم بجهده واكثر وانا حاولت بجهدي كمان والحياه يبغالها مصاريف وضاقت بنا السبل ولكن السبيل الى الله لا يضيق

طبعا كتبت الموضوع للفضفضه لا اكثروعشان تدعون لي وعشان تشيرون علي ببعض الحلول

ما ااقول الا الحمدلله على كل حال

اخواتي العزيزات خلصت مشاركاتي اليوم لذلك لا استطيع الرد
لا تنسوني من دعوة في ظهر الغيب

حبيباتي كثير منكم اشار عليه بالطبخ ولكني لا استطيع لعدة اسباب
اولها فرني المسكين 4 عيون و3 مسدوده ماتشتغل كويس انه باقي يقوم بطبخنا احنا
غير انه يبغالي تجهيز صواني وقدور واوني كثيره ربعها لا املكه
غير المواد الاوليه من خضار وفواكه والاشياء الثانيه
غير ان مطبخي مترين
وعيالي من بيقوم فيهم لاني انسانه ملتزمه ما احب التزم بشي ولا اوفي فيه
غير اني ما اقدر استلف افرضي ما مشى المشروع من وين اردها
مخليه السلف في حاله وحده اذا مرض احد عيالي بس
هذا ان كان فيه احد بيسلفنا اصلا